កម្ពុជា ស្ថិតក្នុងចំណោមប្រទេសនៅអាស៊ីអាគ្នេយ៍ ដែលងាយរងគ្រោះដោយសារបាតុភូត អែលនីណូ នៅឆ្នាំនេះ ខណៈដំណាំស្រូវរងផលប៉ះពាល់ខ្លាំងជាងគេ

ក្រុមអ្នកជំនាញបា​ន​ព្រមាន​ថា វិស័យកសិកម្ម ជាពិសេសដំណាំស្រូវ គឺងាយរងផលប៉ះពាល់ខ្លាំងបំផុត ដោយសារកង្វះទឹក និងមេឃក្ដៅខ្លាំង ដែលអាចធ្វើឱ្យការដាំដុះ​ត្រូវពន្យារពេល ឬទំហំដំណាំថយចុះ។ ការព្យាករមួយចំនួនបង្ហាញថា ផលិតកម្មស្រូវក្នុងតំបន់អាចធ្លាក់ចុះប្រមាណ២%ទៅ ៨% បើប្រៀបធៀបនឹងឆ្នាំធម្មតា។ ក្រៅពីស្រូវ ដំណាំសំខាន់ៗផ្សេងទៀតដូចជាប្រេងដូងនៅប្រទេសឥណ្ឌូណេស៊ី និងម៉ាឡេស៊ី ក៏អាចរងផលប៉ះពាល់ផងដែរ។ ជាមួយគ្នានេះ ប្រទេសជាច្រើន​នៅក្នុងតំបន់កំពុងប្រឈមនឹងការកើនឡើងតម្លៃប្រេងឥន្ធនៈ អាហារ និងជីកសិកម្មរួចទៅ​ហើយ ​ដែលធ្វើឱ្យជីវភាពប្រជាជនកាន់តែពិបាក។ ​ក្រុម​អ្នកវិភាគព្រមានថា បាតុភូត អែលនីណូ ដ៏ខ្លាំងក្លាអាចធ្វើឱ្យតម្លៃអាហារកើនឡើងបន្ថែមទៀត និងជំរុញកំណើនអតិផរណានៅទូទាំង​តំបន់។

ក្រុម​អ្នកជំនាញព្រមានថា ការឡើងថ្លៃស្បៀងអាហារ ជាពិសេសអង្ករអាចដាក់សម្ពាធលើរដ្ឋាភិបាលនៃប្រទេសនានា ហើយវានឹងជះផលប៉ះពាល់ដោយផ្ទាល់ដល់ប្រជាជនរាប់លានគ្រួសារនៅអាស៊ីអាគ្នេយ៍ ព្រោះអង្ករជាអាហារចម្បងប្រចាំថ្ងៃ។ បើអាកាសធាតុក្តៅខ្លាំង និងហួតហែង​នៅ​តែបន្ត អាចបង្កហានិភ័យភ្លើងឆេះព្រៃ និងភ្លើងឆេះ​ដីកសិកម្ម ដែលនាំឱ្យមានផ្សែងអ័ព្ទ ប៉ះពាល់ដល់សុខភាព និងការរស់នៅរបស់ប្រជាជន។ ជាមួយគ្នានេះ ក្រុមអ្នកជំនាញណែនាំថា ប្រទេសក្នុងតំបន់នៅតែមានពេលត្រៀមខ្លួនដោយគ្រប់គ្រងទឹក បម្រុងស្បៀង និងជួយកសិករ ប៉ុន្តែព្រមានថា ហានិភ័យកំពុងកើនឡើងជាបន្តបន្ទាប់៕

ដោយ: តែម សុខុម