បើតាមការចុះផ្សាយរបស់សារព័ត៌មាន Reuters ការសម្រេចដកផ្នែកខ្លះនៃប្រព័ន្ធអនុគ្រោះពន្ធ EBA ដោយសហភាពអឺរ៉ុបនេះ ប្រទេសកម្ពុជានឹងបាត់បង់ប្រហែលជា ២០% នៃសិទ្ធិអនុគ្រោះពន្ធដែលខ្លួនទទួលបាននៅក្រោមកម្មវិធី EBAនេះ។
បើតាមសេចក្ដីប្រកាសព័ត៌មានរបស់គណៈកម្មការអឺរ៉ុប ការសម្រេចប្រកាសដកផ្នែកខ្លះនៃប្រព័ន្ធអនុគ្រោះពន្ធ EBA ពីកម្ពុជានេះ នឹងត្រូវដកលើផលិតផលសម្លៀកបំពាក់ និងស្បែកជើង និងផលិតផលធ្វើដំណើរ និងស្ករសជាដើម។ ការសម្រេចដកភាពអនុគ្រោះពន្ធផ្នែកខ្លះ នៃ EBA ពីកម្ពុជានេះ ត្រូវបានគណៈកម្មការអឺរ៉ុបប៉ាន់ប្រមាណថា មានប្រហែល ១ភាគ៥ ឬស្មើនឹង ១ពាន់លានអឺរ៉ូ ឬស្មើនឹងប្រមាណ ១,០៩ ពាន់លានដុល្លារអាមេរិក នៃការនាំចេញប្រចាំឆ្នាំរបស់កម្ពុជាទៅសហភាពអឺរ៉ុប។
បើសិនជាសភា និងក្រុមប្រឹក្សាអឺរ៉ុប មិនមានការតវ៉ាអ្វីនោះទេ ការសម្រេចដកនូវប្រព័ន្ធអនុគ្រោះពន្ធ EBA ពីកម្ពុជានេះ នឹងត្រូវចូលជាធរមាននៅថ្ងៃទី ១២ ខែសីហា ឆ្នាំ២០២០ខាងមុខ។
អត្ថបទទាក់ទង!
មុននឹងឈានដល់ការផ្អាកផ្នែកខ្លះនៃ EBA នេះ សហភាពអឺរ៉ុបបាននិយាយក្នុងរបាយការណ៍៍របស់ខ្លួនថា ក្នុងរយៈពេលបីឆ្នាំចុងក្រោយនេះ មានការធ្លាក់ចុះនូវលទ្ធិប្រជាធិបតេយ្យ ការគោរពសិទ្ធិមនុស្ស សិទ្ធិនយោបាយ និងនីតិរដ្ឋ។
ក្នុងថ្ងៃជាមួយគ្នា ដែលកម្ពុជាត្រូវបានគណៈកម្មការអឺរ៉ុបសម្រេចដកប្រព័ន្ធអនុគ្រោះពន្ធ EBA នេះដែរ ប្រទេសវៀតណាមឯណោះវិញ ទើបតែទទួលបាននូវការនូវការឆ្នោតគាំទ្រអនុម័តលើកិច្ចព្រមព្រៀងពាណិជ្ជកម្មសេរី (FTA) រវាងអឺរ៉ុប និងវៀតណាមផងដែរ។ ដោយការបោះឆ្នោតក្នុងសភាអឺរ៉ុបនេះ មានសំឡេងគាំទ្រ ៤០១ សំឡេង និងសំឡេងមិនគាំទ្រ ១៩២ សំឡេង និងអនុប្បវាទចំនួន ៤០។
សភាអឺរ៉ុប យល់ឃើញថា “កិច្ចព្រមព្រៀងនេះ គឺជាកិច្ចព្រមព្រៀងទំនើប ទូលំទូលាយ និងពោរពេញដោយមហិច្ឆតាបំផុត មិនធ្លាប់មានពីមុន ដែលបានសម្រេចធ្វើឡើងរវាងសហភាពអឺរ៉ុប និងប្រទេសកំពុងអភិវឌ្ឍន៍នេះ” នឹងចូលរួមចំណែកក្នុងការបង្កើតស្ដង់ដារខ្ពស់នៅក្នុងតំបន់ ហើយអាចនាំឲ្យមានកិច្ចព្រមព្រៀងពាណិជ្ជកម្ម និងវិនិយោគថ្នាក់តំបន់ ទៅថ្ងៃអនាគតផងដែរ។
សភាអឺរ៉ុប បានគូសបញ្ជាក់ទៀតថា កិច្ចព្រមព្រៀងនេះ “គឺជាសញ្ញាដ៏រឹងមាំមួយ ក្នុងការអនុគ្រោះដល់ពាណិជ្ជកម្មសេរី និងយុត្តិធម៌ទៅវិញទៅមក ក្នុងពេលដែលមាននិន្នាការគាំពារនិយមកាន់តែខ្លាំងឡើង និងបញ្ហាប្រឈមធ្ងន់ធ្ងរ ចំពោះពាណិជ្ជកម្មផ្អែកលើពហុភាគី។
ប្រទេសវៀតណាម គឺជាប្រទេសសមាជិកអាស៊ានទី២ហើយ ដែលមានកិច្ចព្រមព្រៀងពាណិជ្ជកម្មសេរីជាមួយអឹរ៉ុប បន្ទាប់ពីប្រទេសសិង្ហបុរី។
ក្រោយពេលការបោះឆ្នោតសម្រេចរួចហើយនោះ កិច្ចព្រមព្រៀងពាណិជ្ជកម្មសេរីអឺរ៉ុប-វៀតណាម ត្រូវបានរំពឹងថា នឹងចូលជាធរមាន នៅក្នុងខែ កក្កដា ខាងមុខនេះ ដោយវានឹងមានការលុបបំបាត់ពន្ធគយរហូតដល់ទៅ ៩៩%។ ទោះបីជាយ៉ាងណា ប្រទេសវៀតណាម នឹងមានរយៈពេលអន្តរកាលរហូតដល់១០ឆ្នាំ សម្រាប់ការនាំចូលទំនិញមួយចំនួនពីអឺរ៉ុប ដូចជារថយន្ដ និងស្រាបៀរជាដើម៕
None
