ទំព័រហ្វ៊េសប៊ុកក្រសួងទេសចរណ៍បង្ហាញថា ពិព័រណ៍នេះធ្វើឡើងចាប់ពីថ្ងៃទី៣-៤ ខែឧសភា ឆ្នាំ២០១៩ ដោយមានកិច្ចសហការពីសមាគមខ្មែរនៅប្រទេសជប៉ុន។ ក្នុងនោះ មានការសម្តែងរបាំបុរាណខ្មែរ សម្តែងក្បាច់គុនល្បុក្កតោរបស់ខ្មែរ និងច្រៀងចម្រៀងខ្មែរ និងក្រុមតន្ដ្រីករខ្មែរផ្សេងទៀត និងការតាំងពិព័រណ៍ម្ហូបអាហារខ្មែរ វប្បធម៌ និងស្តង់ទេសចរណ៍ប្រមាណ ២៥០និងមានអ្នកចូលរួមប្រមាណជាង ១០ម៉ឺននាក់។
រដ្ឋមន្ត្រីក្រសួងទេសចរណ៍លោក ថោង ខុន បញ្ជាក់ថា កម្ពុជាបន្តការផ្សព្វផ្សាយទេសចរណ៍កម្ពុជា លើទីផ្សារជប៉ុននិង រឹតចំណងមិត្តភាពកម្ពុជា-ជប៉ុន ហើយកម្ពុជាពិតជាស្វាគមន៍យ៉ាងក្លៀវក្លាចំពោះទេសចរណ៍ជប៉ុន ដែលមកកម្សាន្តនៅស្រុកខ្មែរ។ លោករំពឹងថា តាមរយៈពិពណ៌នេះ ពិតជាអាចអន្ទងចិត្តភ្ញៀវទេសចរណ៍ជប៉ុនកាន់តែច្រើនទៀតមកទស្សនាកម្ពុជា។
អត្ថបទទាក់ទង!
ព្រឹត្តិការណ៍ពិព័រណ៍កម្ពុជា ត្រូវបានបើកសម្ពោធក្រោមអធិបតីភាពលោករដ្ឋមន្ត្រី ថោង ខុន និងមានការចូលរួមពីសំណាក់លោក Kenji YAMADA អនុរដ្ឋមន្ត្រីក្រសួងការបរទេសជប៉ុន លោក Masahiro Imamura ប្រធានសម្ព័ន្ធមិត្តភាពសភាជប៉ុន-កម្ពុជា លោក អ៊ុង រចនា ឯកអគ្គរាជទូតកម្ពុជាប្រចាំប្រទេសជប៉ុន លោក Fumiaki TAKAHASHI អតីតឯកអគ្គរាជទូតជប៉ុនប្រចាំកម្ពុជា លោក Yuji Kumamaru អតីតឯកអគ្គរាជទូតជប៉ុនប្រចាំកម្ពុជា តំណាងអង្គទូតនៃបណ្តាប្រទេសសមាជិកអាស៊ាន ប្រជាពលរដ្ឋ សិស្ស និស្សិតខ្មែរ និងភ្ញៀវមិត្តជប៉ុនយ៉ាងច្រើនកុះករ។
កម្ពុជាបានកំណត់គោលដៅទាក់ទាញភ្ញៀវទេសចរជប៉ុន មកទស្សនាក្នុងប្រទេស ឲ្យបាន ៣០ម៉ឺននាក់ ត្រឹមឆ្នាំ២០២០ ខណៈពេលដែលការតភ្ជាប់ជើងហោះហើរត្រង់រវាងកម្ពុជា និងជប៉ុន ដែលបានធ្វើឡើងចាប់ពីដើមខែកញ្ញា ឆ្នាំ ២០១៦មកម្ល៉េះ។
ទោះជាយ៉ាងណាក្ដី អ្នកជំនាញនៅក្នុងវិស័យទេសចរណ៍ ស្នើឲ្យអភិវឌ្ឍផលិតផលទេសចរណ៍ និងពង្រឹងសេវាកម្មទេសចរណ៍បន្ថែមទៀត ដើម្បីគាំទ្រដល់កំណើនភ្ញៀវទេសចរដែលកំពុងកើនឡើងយ៉ាងខ្លាំង។
រាជរដ្ឋាភិបាល ព្យាករណ៍ថា ភ្ញៀវទេសចរណ៍អន្តរជាតិនឹងមកទស្សនានៅកម្ពុជាប្រមាណជាង៧លាននាក់នៅឆ្នាំ២០២០ ប៉ុន្តែភ្ញៀវទេសចរជប៉ុនដែលមកទស្សនាកម្ពុជាមានចំនួនលំដាប់ទី ៦ បើធៀបនឹង ចិន វៀតណាម ថៃ កូរ៉េ សហរដ្ឋអាមេរិក៕
None
