តាមរបាយការណ៍ដដែលនេះ បញ្ជាក់ថា នៅបីដំបូងឆ្នាំ២០២០នេះ ទំហំពាណិជ្ជកម្មទ្វេភាគីរវាងកម្ពុជា និងអាមេរិក សម្រេចបានជិត ២.៧០០ លានដុល្លារអាមេរិក ក្នុងនោះការនាំចេញរបស់កម្ពុជាទៅអាមេរិក មានទំហំទឹកប្រាក់ជិត ១.៦០០ លានដុល្លារ ខណៈដែលអាមេរិកនាំចូលកម្ពុជាវិញមានប្រមាណតែ ៨៥លានដុល្លារអាមេរិកប៉ុណ្ណោះ។
ទីផ្សារអាមេរិកត្រូវបានគេដឹងថា គឺជាអ្នកបញ្ជាទិញដ៏សំខាន់មួយ សម្រាប់មុខទំនិញផលិតផលសម្លៀកបំពាក់ ស្បែកជើង និងកាបូប របស់កម្ពុជា។ ប៉ុន្ដែ ថ្មីៗនេះ ត្រូវបានសមាគមរោងចក្រកាត់ដេរកម្ពុជាលើកឡើងថា អ្នកបញ្ជាទិញផលិតផលសម្លៀកបំពាក់ ស្បែកជើង និងកាបូប ទាំងនៅ អឺរ៉ុប និងអាមេរិក គឺមានភាគច្រើន មិនបានទូទាត់ប្រាក់ រាល់ទំនិញដែលបានដឹកជញ្ជូនរួចនោះទេ ហើយទំនិញដែលនឹងត្រូវដឹកជញ្ជូនទៅផ្សេងទៀត ក៏អ្នកបញ្ជាទិញទាំងនោះ មិនព្រមទទួលយកដែរ ក្រោមហេតុផលបញ្ហាកូវីដ-១៩។ លើសពីនេះទៀត អ្នកបញ្ជាទិញ នៅអឺរ៉ុប និងអាមេរិក ក៏បានលុបចោលការកម្ម៉ង់ទិញថ្មីសម្រាប់រយៈពេលប្រមាណ ២ ខែខាងមុខផងដែរ។
អត្ថបទទាក់ទង!
ទោះយ៉ាងណា សមាគមរោងចក្រកាត់ដេរកម្ពុជា នៅតែទទូចឲ្យអ្នកបញ្ជាទិញគោរពតាមកិច្ចសន្យា និងទូទាត់ប្រាក់មកកាន់រោងចក្រនៅកម្ពុជា។
ផលិតផលសំខាន់ដែលកម្ពុជានាំចេញទៅអាមេរិកមានដូចជា សម្លៀកបំពាក់ ស្បែកជើង និងកាបូបជាដើម រួមទាំងផលិតផលមួយចំនួនទៀត។
ចាប់តាំងពីខែ កក្កដា ឆ្នាំ២០១៦មក រដ្ឋាភិបាលអាមេរិក បានប្រកាសផ្ដល់ប្រព័ន្ធអនុគ្រោះពន្ធ GSP សម្រាប់មុខទំនិញមួយចំនួនរបស់កម្ពុជានាំទៅអាមេរិក រួមមាន វ៉ាលី កាបូប កាបូបស្ពាយ និងកាបូបដាក់ប្រាក់ជាដើម។
តាមរបាយការណ៍ពីការិយាល័យជំរឿនរបស់អាមេរិក ការនាំចេញរបស់កម្ពុជាទៅអាមេរិកកាលពីឆ្នាំ២០១៩ មានប្រមាណជាង ៥.៣០០ លានដុល្លារអាមេរិក ធឿបនឹងឆ្នាំ២០១៨ មានការកើនឡើងប្រមាណ ៤០% ខណៈការនាំចូលពីអាមេរិកមកវិញ នៅឆ្នាំ២០១៩ មានប្រមាណ ជាង ៥០០ លានដុល្លារ កើនជាង ១៥% ធៀបនឹងឆ្នាំ២០១៨។
បើយើងក្រឡេកមកមើលការនាំចេញជារួមរបស់កម្ពុជា ឃើញថា ទោះបីជាមានការរំខានដោយសារកូវីដ-១៩ ក៏ដោយ ប៉ុន្ដែ ការនាំចេញ ៣ខែ ដំបូងឆ្នាំ២០២០នេះសម្រេចបានក្នុងទំហំទឹកប្រាក់ប្រមាណជាង ៣.៥០០ លានដុល្លារអាមេរិក កើនឡើងជិត ១២% ធៀបនឹងរយៈពេលដូចគ្នាកាលពីឆ្នាំ២០១៩។ ដោយឡែក ចំពោះការនាំចូលវិញ នៅ៣ខែមកនេះ ក៏មានការកើនឡើងដែរ ដោយមានទំហំទឹកប្រាក់ជាង ៥ពាន់ដុល្លារអាមេរិក កើនឡើងជិត១៥% បើធៀបនឹងរយៈពេលដូចគ្នាក្នុងឆ្នាំ២០១៩។ នេះបើតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា។
តាមទិន្នន័យដដែលនេះ បង្ហាញឲ្យឃើញថា នៅ៣ខែឆ្នាំ២០២០ កម្ពុជាមានឱនភាពពាណិជ្ជកម្មប្រមាណ១.៥០០ លានដុល្លារអាមេរិក៕
None
