ក្រុមអាជីវករលក់មាសកត់សម្គាល់ឃើញទៀតថា ក្រោយតម្លៃមាសឡើងថ្លៃពុំសូវមានអ្នកមកទិញមាសនោះទេ ប៉ុន្ដែសម្បូរតែអ្នកយកមាសមកលក់ទៅវិញ ព្រោះបានថ្លៃ។ បើតាមអ្នកជំនាញអះអាង តម្លៃមាសនឹងបន្តកើនឡើងបន្ថែមទៀត ប្រសិនបើសង្គ្រាមរវាងរុស្ស៊ីជាមួយអ៊ុយក្រែននៅតែបន្តអូសបន្លាយពេលយូរ។
លោកស្រី គង់ ពិសី ម្ចាស់ហាងមាសពេជ្រ ហេង ហេង នៅខាង ត្បូងផ្សារធំថ្មីកត់សម្គាល់ឃើញថា តម្លៃមាសនៅកម្ពុជាបានបន្តហក់ឡើងថ្លៃជាង១០០ដុល្លារក្នុង១តម្លឹងនៅមួយសប្តាហ៍ចុងក្រោយនេះ ពោលគឺគ្រាន់តែនៅមួយថ្ងៃយប់ថ្ងៃទី៨ ខែមីនា ឆ្នាំ២០២២ តម្លៃមាសបានហក់ឡើងក្នុងរង្វង់៦០ដុល្លារអាមេរិកបន្ថែមទៀតក្នុង១តម្លឹង ដែលជំរុញឲ្យតម្លៃមាសកើនឡើងដល់ជាង ២.៤០០ដុល្លារក្នុងមួយតម្លឹង គិតត្រឹមព្រឹកថ្ងៃទី ៩ខែមីនា។ បើតាមលោកស្រី គង់ ពិសី ហាងឆេងតម្លៃមាសនៅហាងរបស់លោកស្រីនៅថ្ងៃទី៩ មីនា លក់ចេញក្នុងតម្លៃ ២,៤៥០ដុល្លារក្នុងមួយតម្លឹង។
ម្ចាស់ហាងមាសពេជ្រ ហេង ហេង រូបនេះសង្កេតឃើញថា ចរន្តទិញលក់មាសនៅហាងរបស់លោកស្រីហាក់មានការធ្លាក់ចុះគូរឲ្យកត់សម្គាល់ ក្រោយចំនួនអ្នកឆ្លងកូវីដ-១៩ ប្រភេទអូមីក្រុងនៅកម្ពុជាបានហក់ឡើងដល់តួលេខបីខ្ទង់ នៅប៉ុន្មានសប្តាហ៍ចុងក្រោយនេះ។ លោកស្រី កត់សម្គាល់ផងដែរថា ក្រោយហាងឆេងមាសហក់ឡើងថ្លៃពុំសូវមានអ្នកមកទិញមាសនោះទេ ប៉ុន្ដែសម្បូរតែអ្នកយកមាសមកលក់។
មិនខុសគ្នាពីលោកស្រី គង់ ពិសី នោះទេ ម្ចាស់ហាងមាសពេជ្រ ហង្សមាស និងម្ចាស់ហាងមាសពេជ្រ ដារ៉ា ជាងរ៉ា បានអះអាងដូចគ្នាថា ហាងឆេងតម្លៃមាសនៅកម្ពុជាបានហក់ឡើងថ្លៃជាបន្តបន្ទាប់នៅមួយរយៈចុងក្រោយនេះ ពោលគឺតាំងពីមានសង្គ្រាមរុស្ស៊ីឈ្លានពានលើអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២ម្ល៉េះ។ បើតាមម្ចាស់ហាងមាសពេជ្រ ដារ៉ា ជាងរ៉ា តម្លៃមាសនៅហាងរបស់លោក ដែលយកតាមទីផ្សារធំនៅអូឡាំពិក លក់ចេញក្នុងរង្វង់ជាង ២ពាន់៤រយដុល្លារក្នុងមួយតម្លឹង។
អត្ថបទទាក់ទង
ពាក់ព័ន្ធការកើនឡើងតម្លៃមាសនេះ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុ នៃក្រុមហ៊ុនហ្គោលដេន អេហ្វអិកស៍ លីងឃែភីថលបានគូសបញ្ជាក់ថា ការហក់ឡើងតម្លៃមាសយ៉ាងគំហុកនេះ គឺបានកើតឡើងទូទាំងពិភពលោកមិនមែនមានតែនៅកម្ពុជានោះទេ។ ការឡើងថ្លៃតម្លៃមាសនេះត្រូវបានលោកសំណាងវាយតម្លៃថា គឺដោយសារវិនិយោគិនធំៗនៅអឺរ៉ុបបានសម្រុកលក់ភាគហ៊ុន ហើយនាំគ្នាមកវិនិយោគលើមាសជំនួសវិញ ក្រោយបារម្ភពីបញ្ហាសង្គ្រាមរវាងរុស្ស៊ីនិងអ៊ុយក្រែន។ មួយវិញទៀត ក្រោយមានសង្គ្រាមបែបនេះប្រទេសធំៗមួយចំនួនបាននាំគ្នាតម្កល់មាសទុក ដើម្បីត្រៀមស្តារសេដ្ឋកិច្ចក្រោយវិបត្តិនៃសង្គ្រាម។ ព្រោះប្រទេសទាំងនោះបារម្ភថា រូបិយប័ណ្ណរបស់ពួកគេនឹងធ្លាក់ថ្លៃពេលមានសង្គ្រាមផ្ទុះឡើង ដូច្នេះមានតែមាសមានតម្លៃអាចស្តារសេដ្ឋកិច្ចបាន។
អ្នកជំនាញរូបនេះ វាយតម្លៃថា តម្លៃមាសសកលរួមទាំងនៅកម្ពុជា អាចនឹងបន្តឡើងថ្លៃបន្ថែមទៀត បើសិនសង្គ្រាមរវាងរុស្ស៊ីនិងអ៊ុយក្រែនមិនអាចស្វែងរកដំណោះស្រាយបញ្ចប់សង្គ្រាមបាន ហើយបន្តអូសបន្លាយពេលបន្ថែមទៀត។ លោកជឿជាក់ថា តម្លៃមាសលើសកលលោកនឹងអាចហក់ដល់២ពាន់១រយដុល្លារក្នុង១ឱន(៨ជីមាស)ដែលអាចបំបែកកំណត់ត្រាតម្លៃខ្ពស់បំផុតដែលមានត្រឹមតែ២ពាន់៧៤ដុល្លារក្នុង១ឱន។ ខណៈបច្ចុប្បន្នតម្លៃមាសលើទីផ្សារអន្តរជាតិបានកើនដល់ ២ពាន់៧០ដុល្លារក្នុង១ឱនហើយ។
គួររំលឹកថា មុនផ្ទុះសង្គ្រាមនៅអ៊ុយក្រែនតម្លៃមាសនៅកម្ពុជាមានតម្លៃចន្លោះពី១,៨០០ដុល្លារទៅ២ពាន់១រយដុល្លារតែប៉ុណ្ណោះក្នុង១តម្លឹង។ ប៉ុន្តែក្រោយរុស្ស៊ីបើកប្រតិបត្តិការយោធាលើអ៊ុយក្រែនតម្លៃមាសបានហក់ឡើងជាបន្តបន្ទាប់រហូត២ពាន់៤រយដុល្លារទៅ២ពាន់៥រយដុល្លារក្នុង១តម្លឹង ខណៈកាលពីសប្តាហ៍មុនមាស១តម្លឹងលក់ចេញក្នុងតម្លៃ២ពាន់៣រយដុល្លារអាមេរិក៕
None
