ចិនធ្វើដំណើរ២ពាន់៩រយលានជើងក្នុងអំឡុងពេលសម្រាកបុណ្យចូលឆ្នាំថ្មី
នៅកម្ពុជាគ្រាន់តែពេលបុណ្យចូលឆ្នាំថ្មីប្រពៃណីខ្មែរម្ដងៗ យើងឃើញចរាចរណ៍មានការកកស្ទះយ៉ាងខ្លាំងនៅតាមផ្លូវជាតិចេញពី…
ករណីហិង្សាទាំងនេះ ស្តាប់ទៅដូចជារឿងប្រឌិត ខណៈដែលសង្គមមនុស្សកំពុងរីកចម្រើនលើការអប់រំ និងប្រកួតប្រជែងលើចំណេះដឹង។
រឿងរ៉ាវថ្មីៗ រួមមានបុរសខ្លះចាប់ប្រពន្ធកូន ចងវាយធ្វើបាបយ៉ាងព្រៃផ្សៃ មានឪពុកខ្លះវាយសម្លាប់និងរំលោភកូនឯង មានគូកំណាន់ខ្លះសម្លាប់គ្នាក្នុងពេលនាំទៅឡើងឋានសួគ៌ មានស្ត្រីខ្លះផឹកថ្នាំពុលព្រោះតែខឹងប្តី ខ្លះមានរហូតគ្រាន់តែភ្ញៀវឈ្លោះគ្នាពេលស៊ីការ ក៏បង្ខំឲ្យកូនលែងលះកាត់សង្វាសគ្នា ឬករណីកាប់សម្លាប់គ្នារវាងបងប្អូនថ្លៃ ហើយនិងរឿងប្រឈ្លោះដណ្តើមកូនគ្នា និងរឿងធ្វើអត្តឃាតដោយចងក និងលោតទឹកសម្លាប់ខ្លួន ជាដើម។
ខាងក្រោមនេះគ្រាន់តែជាសម្រង់នូវហេតុការណ៍មួយចំនួន ដែលកើតឡើងក្នុងអំឡុងខែមករានេះតែប៉ុណ្ណោះ ហើយការលើកមកនេះក៏គ្រាន់តែជាគតិខ្លះ ដើម្បីយកទៅធ្វើការពិចារណារកផ្លូវបញ្ចៀសនូវអំពើហិង្សា និងងាកមករកវិធីដោះស្រាយគ្នាដោយសន្តិវិធី តាមផ្លូវព្រះធម៌អហិង្សា ដូចដែលព្រះពុទ្ធលោកប្រៀនប្រដៅសត្វលោក។
នៅអាទិត្យចុងខែមករានេះ ស្ត្រីកំណាន់របស់បុរសជាប្រជាការពារភូមិ ដែលមានប្រពន្ធហើយ បានរងការវាយដំឡើងជាំភ្នែក ខណៈដែលនាងគ្រាន់តែឃាត់ប្រុសស្នហ៍មិនឲ្យជិះម៉ូតូ ទាំងស្រវឹងព្រោះខ្លាចមានគ្រោះថ្នាក់។ ហេតុការណ៍កើតឡើងកាលពីម៉ោង៧ យប់ថ្ងៃ២១ មករា ២០១៧ នៅក្នុងភូមិទ្រា ៤ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
កាន់តែឃោរឃៅ បុរសជាប្តីបានចងប្រពន្ធនិងកូនវាយយ៉ាងព្រៃផ្សៃ
ហេតុការណ៏ហិង្សាមួយនេះ បានកើតឡើងកាលពីថ្ងៃ១៩ មករា ២០១៧ នៅភូមិកោះត្រាច ឃុំស្វាយទង ស្រុកកំពង់ត្រាច ខេត្តតាកែវ បន្ទាប់ពីបុរសជាប្តីចិត្តឃោរឃៅ ឈ្មោះ អួន យន អាយុ ៣១ឆ្នាំ បានចងប្រពន្ធឈ្មោះ ពេជ គិ អាយុ៣៣ឆ្នាំ និងកូនៗពីរនាក់ នឹងខ្សែភ្លើង ហើយវាយធ្វើទារុណកម្មយ៉ាងព្រៃផ្សៃ។ រឿងហេតុបង្កពីការប្រច័ណ្ធ ព្រោះខឹងប្រពន្ធមិននៅផ្ទះ តែជនល្មើសរូបនេះ ក៏ត្រូវសមត្ថកិច្ចចាប់ខ្លួន រួចចាត់ការបង្កសំណុំរឿងតាមនីតិវិធីច្បាប់។
នេះជាអំពើអមនុស្សធម៌បំផុត និងគ្មានការទទួលខុសត្រូវក្នុងឋានៈខ្លួនជាមេគ្រួសារ តើគាត់សមនឹងមានទោសដែរទេ?
ជាគន្លឹះនៃការលុបបំបាត់អំពើហិង្សា គួររៀនពី វិធីរម្ងាប់សេក្ដីក្រោធ
រឿងល្ងង់ខ្លៅ ស្ត្រីម្នាក់ខឹងសុំប្តីមកលេងភ្នំពេញមិនបាន ផឹកថ្នាំពុលស្លាប់
ស្ត្រីរូបនេះឈ្មោះ សុទ្ធ សុផាលីស អាយុ២៤ឆ្នាំ រស់នៅភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង។ ស្ត្រីរូបនេះបានផឹកថ្នាំបាញ់ស្មៅសម្លាប់ខ្លួន កាលពីល្ងាចថ្ងៃទី១៧ ខែមករា ដោយសារខឹងប្ដីរបស់ខ្លួនដែលមិនព្រមឲ្យលុយទៅលេងនៅភ្នំពេញ។
ស្ត្រីរូបនេះបានស្លាប់នៅមន្ទីរពេទ្យ ដោយសារស្ថានភាពធ្ងន់ធ្ងរពេក។ ហេតុការណ៍កើតឡើង កាលពីវេលាម៉ោង១១និង២៣នាទីថ្ងៃត្រង់ ថ្ងៃទី២១ ខែមករា នេះ ក៏ជារឿង ដែលគ្រប់គ្រួសារត្រូវតែមានការអប់រំនិងគិតពិចារណាឲ្យបានល្អិតល្អន់ដែរ ព្រោះថា ជីវិតមិនមានលក់នៅទីផ្សារទេ។
មិនថាតែស្រីទេ បុរសក៏គិតខ្លីដែរ ដាច់ចិត្តចងកសម្លាប់ខ្លួន ទុកប្រពន្ធកូន២នាក់ឲ្យកំព្រា
ប្លែកពីរឿងខាងលើបន្តិច ស្ត្រីម្នាក់បានស្រែកយំខ្លាំងៗ ឡើងផ្អើលអ្នកជិតខាងនៅភូមិថ្កូវ ឃុំផ្អាវ ស្រុកត្រពាំងប្រាសាទ រហូតផ្អើលដល់សមត្ថកិច្ច ដោយសារតែបុរសជាប្តី ឈ្មោះ ភាព វិត ភេទប្រុស អាយុ៣២ឆ្នាំ មិនដឹងជាខឹងចិត្តរឿងអី បានដាច់ចិត្តចងកសម្លាប់ខ្លួន ទុកឲ្យនាងនៅមេម៉ាយ និងកំព្រាកូនពីរនាក់ កាលពីរំលងអាធ្រាត្រ យប់ថ្ងៃទី២២ ខែមករា ឆ្នាំ២០១៧។ ករណីនេះសមត្ថកិច្ចនៅមិនទាន់រកមូលហេតុឃើញទេ។ ស្ត្រីជាប្រពន្ធឈ្មោះ ងួន ណយ អាយុ៣៦ឆ្នាំ មានកូន២នាក់ ស្រីម្នាក់ ប្រុសម្នាក់ មុខរបរធ្វើស្រែចម្ការ។
ជារឿងហិង្សាកម្រដែរ ឪពុកវាយកូនដល់ស្លាប់
រឿងរ៉ាវឃាតកម្មនេះ កើតឡើងកាលពីវេលាម៉ោង៥ និង៤៥នាទីល្ងាច ថ្ងៃទី២១ ខែមករា ឆ្នាំ២០១៧ នៅភូមិត្រពាំងកំភ្លាញ ឃុំអង្គរភ្នំតូច ស្រុកអង្គរជ័យ ។ ដោយបុរសជាឪពុក បានយកចបជីកវាយសំពងក្បាលកូនប្រុសខ្លួនឯងរហូតទាល់តែស្លាប់។ ជនដៃដល់ជាឪពុក ឈ្មោះ លាស់ ធី ភេទប្រុស អាយុ៤៧ឆ្នាំ ជាកសិករ ចំណែកកូនប្រុសរងគ្រោះឈ្មោះ លាស់ ទិត្យ អាយុ២១ឆ្នាំ។ តាមអ្នកជិតខាងនិយាយថា បុរសជាកូនតែងតែបង្ករឿងនៅក្នុងគ្រួសារ ចំណែកបុរសជាឪពុក ក៏អ្នកភូមិសង្ស័យដែរថា គាត់មានសតិមិនគ្រប់។ រឿងនេះក្រោយកើតហេតុ សមត្ថកិច្ចបានឃាត់ខ្លួនបុរសជាឪពុក យកទៅកសាងសំណុំរឿងតាមនីតិវិធីច្បាប់។
គន្លឹះនៃការក្លាយជាមនុស្សល្អប្រកបដោយធម៌ គេគប្បីប្រកាន់ខ្ជាប់ សីលប្រាំ
រឿងគ្រួសារឆ្លងសាសន៍ ប្តីកូរ៉េប្រពន្ធខ្មែរឈ្លោះដណ្តើមកូនគ្នាឡើងផ្អើលភូមិ
បន្ទាប់ពីព្យាយាមសុំកូនស្រីពីប្រពន្ធយកមកចិញ្ចឹមមិនបាន បុរសជនជាតិកូរ៉េម្នាក់ក៏ប្រឈ្លោះប្រកែកជាមួយប្រពន្ធខ្មែរ ធ្វើឲ្យផ្អើលអ្នកភូមិ តាមបណ្តោយផ្លូវលំ នៅសង្កាត់ទួលសង្កែ ខណ្ឌឫស្សីកែវទាំងយប់ កាលពីថ្ងៃទី១៧ ខែមករា ឆ្នាំ២០១៧។ បុរសកូរ៉េ ឈ្មោះ SHIN DONG BAEK អាយុ៥១ឆ្នាំ ស្នាក់នៅ ផ្ទះលេខ២៨៨B សង្កាត់ទួលសង្កែ ខណ្ឌឫស្សីកែវ បានគ្នា១០ឆ្នាំជាមួយប្រពន្ធឈ្មោះ ជួង បុប្ផា អាយុ៣១ឆ្នាំ ស្នាក់នៅផ្ទះជួលគ្មានលេខ សង្កាត់ទួលសង្កែ ខណ្ឌឫស្សីកែវ មានកូនស្រីតូចម្នាក់អាយុ៤ឆ្នាំជាចំណងដៃ។
គេមិនដឹងពីមូលហេតុពិតប្រាកដទេ នៃជម្លោះរវាងពួកគេទេ តែករណីនេះ អាជ្ញាធរបានអន្តរាគមន៍ និងកោះហៅទៅដោះស្រាយនៅបុស្តិ៍។ នេះក៏ជាហិង្សាខាងផ្លូវចិត្តមួយ រវាងចំណងស្នេហ៍ឆ្លងជាតិសាសន៍ ដែលកំពុងតែកើនឡើងក្នុងសង្គមខ្មែរសម័យទំនើបនេះដែរ។
រឿងអយុត្តិធម៌របស់ចាស់ទុំ ធ្វើឲ្យរាត្រីទឹកឃ្មុំកូនៗ ក្លាយជារាត្រីទឹកខ្មេះ
រាត្រីទឹកឃ្មុំរបស់កូនកម្លោះកូនក្រមុំ បានក្លាយជារាត្រីទឹកខ្មេះ ព្រោះរាត្រីផ្សំដំណេកត្រូវចាស់ៗបំបែក ដើមហេតុមកពីឪពុកកូនកម្លោះហៅកូនឲ្យត្រឡប់ទៅផ្ទះវិញជាប្រញាប់ បន្ទាប់ពីភ្ញៀវខាងប្រុសនិងភ្ញៀវខាងស្រីឈ្លោះគ្នា រហូតដល់វាយតប់គ្នា និងគប់កែវ គប់កៅអីឆ្វេចឆ្វាចពេញរោងការ ធ្វើឲ្យអ្នកចូលរួមពិធីនិងក្រុមតន្ត្រីរត់ចែកផ្លូវគ្នា កាលពីយប់ថ្ងៃទី១៦ ខែមករា ឆ្នាំ២០១៧ នៅភូមិព្រៃកឹក ឃុំប្រាសាទភ្នំខ្យង ស្រុកកំពង់ត្រាច ខេត្តកំពត។ ហិង្សាក្នុងរោងការដែលទទួលភ្ញៀវ៤០តុមួយនេះ បានក្លាយជារន្ទះបាញ់បំបែកគូស្នេហ៍មួយនេះ ឲ្យដិតដាមដោយអពមង្គលក្នុងជីវិតពិបាកនឹងបំភ្លេច។
ស្រីកំណាន់ត្រូវគូស្នេហ៍ល្បួងទៅធ្វើឃាតនៅផ្ទះសំណាក់
ជារឿងដ៏សោកសៅ ស្ត្រីម្នាក់ត្រូវសង្សារនាងល្បួងយកទៅសម្លាប់ ក្នុងបន្ទប់ផ្ទះសំណាក់«ម៉ារីមានជ័យ» ដែលស្ថិតនៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។ ហិង្សានេះបង្កឲ្យមានការភ្ញាក់ផ្អើលកាលពីវេលាថ្ងៃត្រង់ ថ្ងៃទី១៤ ខែមករា ឆ្នាំ២០១៧ បន្ទាប់គេសង្ស័យ និងរកឃើញសពក្នុងបន្ទប់ផ្ទះសំណាក់ ដែលប៉ូលិសថា ត្រូវគេច្របាច់កនិងខ្ទប់ច្រមុះនឹងខ្នើយ។ ស្ត្រីរងគ្រោះមានឈ្មោះ ប៊ុន សូរៀត ហៅ ប៉ក់ អាយុ៤០ឆ្នាំ ជាស្ត្រីមេម៉ាយកូនមួយ មុខរបរលក់ចាប់ហួយ និងជាគ្រូទាយសន្លឹកបៀ រស់នៅភូមិកន្ទួត សង្កាត់កំពង់ស្វាយ ក្រុងសិរីសោភ័ណ។ ហិង្សាកើតចេញពីរឿងស្នេហាក្រៅផ្ទះនេះ សមត្ថកិច្ចកំពុងតែធ្វើការស្រាវជ្រាវ ហើយនេះក៏ជារឿងដែលស្ត្រីនៅលីវៗ គប្បីមានការប្រុងប្រយ័ត្នមួយដែរ៕
