លោក សេង សុភ័ក្រ អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានវាយតម្លៃខ្ពស់ និងជឿជាក់ថា វិស័យអចលនទ្រព្យកម្ពុជា នៅក្នុងឆ្នាំ២០២៥ នឹងមានភាពល្អប្រសើរជាងឆ្នាំ២០២៤កន្លងទៅ។ ការរំពឹងបែបនេះ ក៏ដោយសារនៅឆ្នាំ២០២៥ រាជរដ្ឋាភិបាលកម្ពុជា បានដាក់ចេញយន្តការលើកទឹកចិត្តមួយចំនួន ដើម្បីជួយគាំទ្រ និងជំរុញវិស័យអចលនទ្រព្យកម្ពុជា ឱ្យងើបប្រសើរឡើងវិញ តួយ៉ាងតាមរយៈការលើកលែងពន្ធប្រថាប់ត្រាសម្រាប់អ្នកទិញផ្ទះលើកដំបូង ដែលមានតម្លៃក្រោម ឬស្មើ២១ម៉ឺនដុល្លារ ក៏ដូចជាយន្តការផ្ទេរកម្ចីរបស់អតិថិជនពីការបង់រំលស់ផ្ទះជាមួយម្ចាស់បុរីមកបង់ជាមួយគ្រឹះស្ថានធនាគារក្នុងអត្រាការប្រាក់ទាបជាដើម។
មិនខុសគ្នានោះទេ លោក ប៉ូ អ៊ាវគង់ អគ្គនាយកក្រុមហ៊ុន អ៊ែតវ៉ានស៍ រៀលអ៊ីស្ទេត យល់ឃើញថា តាមរយៈយន្តការជន្ទល់ធំៗចំនួន២ ដែលរាជរដ្ឋាភិបាលកម្ពុជា បានដាក់ចេញសម្រាប់ជួយគាំទ្រ និងជំរុញការអភិវឌ្ឍរបស់វិស័យអចលនទ្រព្យកម្ពុជា នៅឆ្នាំ២០២៥ នេះ លោកជឿជាក់ថា វិស័យអចលនទ្រព្យកម្ពុជា នៅឆ្នាំនេះនឹងមានស្ថានភាពល្អប្រសើរជាងឆ្នាំ២០២៤ ជាក់ជាពុំខាន ពោលគឺលោកបានចាត់ទុកឆ្នាំនេះ គឺជាឆ្នាំចាប់ផ្តើមនៃការងើបឡើងវិញរបស់វិស័យអចលនទ្រព្យកម្ពុជា ក្រោយវិស័យនេះបានជាប់គាំងអស់រយៈពេលជាច្រើនឆ្នាំ។
បើតាមការបញ្ជាក់របស់ លោក សេង សុភ័ក្រ ទោះបីជាចរន្តទិញលក់នៅក្នុងវិស័យអចលនទ្រព្យកម្ពុជា អាចនឹងមានកំណើនល្អប្រសើរនៅក្នុងឆ្នាំ២០២៥ ក៏ពិតមែន ប៉ុន្តែសម្រាប់តម្លៃអចលនទ្រព្យនៅកម្ពុជាក្នុងឆ្នាំនេះ លោក វាយតម្លៃថា ទំនងជាមិនទាន់អាចមានការកើនឡើងមកវិញនោះទេ ដោយសារតែពេលកន្លងមកការផ្គត់ផ្គង់មានច្រើនលើសតម្រូវការ។ ទន្ទឹមនេះ លោកសង្កេតឃើញថា បច្ចុប្បន្នចរន្តទិញលក់ក្នុងវិស័យអចលនទ្រព្យ ដែលមានសកម្មភាពមមាញឹកឡើងវិញភាគច្រើនជាការទិញលក់ដីធ្លីយកទៅវិនិយោគលើវិស័យកសិកម្ម និងសម្រាប់សាងសង់រោងចក្រសហគ្រាសនានាជាដើម។
គួរជម្រាបថា រាជរដ្ឋាភិបាលកម្ពុជា កំពុងយកចិត្តទុកដាក់យ៉ាងខ្លាំងលើវិស័យអចលនទ្រព្យកម្ពុជា តាមរយៈការដាក់ចេញនូវយន្តការលើកទឹកចិត្តមួយចំនួន ដើម្បីធ្វើឱ្យវិស័យដែលជាជន្ទល់សេដ្ឋកិច្ចដ៏សំខាន់មួយនេះងើបប្រសើឡើងវិញបានឆាប់រហ័សប្រកបដោយសក្តានុពល និងនិរន្តរភាព៕
