ក្រុមអ្នកជំនាញ បានចាត់ទុកថា ការសម្រេចពន្យារពេលអនុវត្តយកពន្ធចំណេញមូលធននេះ គឺជាការលើកទឹកចិត្តដ៏សំខាន់ និងជំរុញឲ្យវិនិយោគិនទាំងក្នុងស្រុក និងក្រៅស្រុកបន្ដវិនិយោគនៅកម្ពុជាកាន់តែច្រើនបន្ថែមទៀត ដើម្បីចូលរួមជាមួយរាជរដ្ឋាភិបាលក្នុងការស្ដារ និងជំរុញសេដ្ឋកិច្ចកម្ពុជាពីវិបត្តិជំងឺរាតត្បាតកូវីដ១៩។
យោងតាមសេចក្ដីជូនដំណឹងរបស់អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ដែលបានចេញផ្សាយនៅថ្ងៃទី ៩ ខែមីនា បានឲ្យដឹងថា រាជរដ្ឋាភិបាលបានសម្រេចឲ្យពន្យារកាលបរិច្ឆេទ កំណត់ការដាក់ឲ្យអនុវត្តពន្ធលើចំណេញមូលធនរយៈពេល ២ឆ្នាំ បន្ថែមទៀត ដោយត្រូវកំណត់ចាប់ផ្ដើមអនុវត្តយកពន្ធនេះ ចាប់ពីថ្ងៃទី ០១ ខែមករា ឆ្នាំ២០២៤ តទៅ។
ជុំវិញការសម្រចរបស់រាជរដ្ឋាភិបាលនេះដែរ លោកឧកញ៉ា ចេង ខេង អគ្គនាយកនៃក្រុមហ៊ុនអចលទ្រព្យ CPL បានបង្ហាញនូវការគាំទ្រយ៉ាងពេញទំហឹងដល់រាជរដ្ឋាភិបាលកម្ពុជា ដែលបានសម្រេចពន្យារកាលបរិច្ឆេទ កំណត់ការដាក់ឲ្យអនុវត្តពន្ធលើចំណេញមូលធន រយៈពេល ២ឆ្នាំ បន្ថែមទៀត។អត្ថបទទាក់ទង!
ឧកញ៉ា ចេង ខេង បានគូសបញ្ជាក់ថា វិបត្តិកូវីដ១៩ បានធ្វើឲ្យប៉ះពាល់ដល់ប្រជាពលរដ្ឋកម្ពុជា រួមទាំងអ្នកវិនិយោគផងដែរ ដូច្នេះ នៅពេលរាជរដ្ឋាភិបាលពន្យាការអនុវត្តពន្ធបន្ថែម គឺជាការរឿងដ៏ប្រសើរបំផុតសម្រាប់អ្នកវិនិយោគ។ អ្នកជំនាញផ្នែកអចលនទ្រព្យរូបនេះ ក៏បានសង្កត់ធ្ងន់ដែរទៀតថា វិធានការនេះនឹងកាន់តែធ្វើឲ្យវិស័យមួយនេះ កាន់តែមានភាពច្បាស់លាស់ ពិសេសនឹងធ្វើឲ្យមានភាពស្មើគ្នារវាងក្រុមហ៊ុន និងបុគ្គល។
ជាមួយគ្នានេះ លោកឧកញ៉ា លឹម ហេង អនុប្រធានសភាពាណិជ្ជកម្ម យល់ថា នេះការលើកពេលអនុវត្តយកពន្ធចំណេញចំណេញមូលធនរហូតដល់ឆ្នាំ២០២៤ គឺជាការសម្រួលបន្ទុក និងលើកទឹកចិត្តដល់អ្នកវិនិយោគ ក៏ដូចជាប្រជាពលរដ្ឋ ផងដែរ។ លោកឧកញ៉ា លឹម ហឹង បានបង្ហាញនូវក្ដីរំពឹងថា តាមរយៈការពន្យារកាលបរិច្ឆេទកំណត់ការដាក់ឲ្យអនុវត្តពន្ធលើចំណេញមូលធន នឹងកាន់តែជំរុញឲ្យវិស័យវិនិយោគ និងអចលទ្រព្យ នៅកម្ពុជា កាន់តែមានកំណើន ពិសេសជួយជំរុញនូវសេដ្ឋកិច្ចរបស់ប្រជាពលរដ្ឋ ដែលបានរងគ្រោះដោយសារតែវិបត្តិកូវីដ១៩ នាពេលកន្លងមក។
សូមបញ្ជាក់ផងដែរថា ពន្ធលើចំណេញមូលធននេះ គឺជាការយកពន្ធទៅលើប្រាក់ចំណេញពីការលក់ ឬផ្ទេរមូលធន ដូចជាអចលនទ្រព្យ ភតិសន្យា ទ្រព្យវិនិយោគ កេរ្ដិ៍ឈ្មោះអាជីវកម្ម កម្មសិទ្ធិបញ្ញា និងរូបិយវត្ថុបរទេសជាដើម ដោយអត្រាពន្ធលើចំណេញមូលធន ត្រូវបានកំណត់តាមអត្រាថេរ ២០%នៃប្រាក់ចំណេញ។
ក្រុមអ្នកជំនាញ នៅតែមានក្ដីរំពឹងថា វិស័យវិនិយោគ និងអចលទ្រព្យ នៅឆ្នាំ២០២២នេះ នឹងប្រសើរឡើង ដោយបន្ទាប់ពីពួកគេមើលឃើញថា នារយៈពេល ២ខែដំបូង ក្នុងឆ្នាំ២០២២ វិស័យវិនិយោគ និងអចលនទ្រព្យ កាន់តែបង្ហាញនូវសញ្ញាវិជ្ជមាន ផងដែរ៕
None
