តើមូលហេតុអ្វី បានជាធ្វើឲ្យតម្លៃម្ទេសនៅពេលបច្ចុប្បន្ននេះធ្លាក់ថ្លៃខ្លាំងដល់ថ្នាក់នេះ?
អ្នកស្រី រស់ ពិសសិដ្ឋនារី ជាកសិករដាំម្ទេសនៅស្រុកសង្កែ និងលោក សា ម៉េត ជាកសិករនៅស្រុកឯកភ្នំ ខេត្តបាត់ដំបង សុទ្ធតែបានត្អូញត្អែរស្រដៀងៗគ្នាថា ដោយសារតែកសិករនាំគ្នាសម្រុកដាំម្ទេសច្រើនពេកឆ្នាំនេះ គួបផ្សំនឹងបច្ចុប្បន្ន មានព្រឹត្តិការណ៍ឆ្លងកូវីដ-១៩ ចូលសហគមន៍លើកទី៣ បានប៉ះពាល់ដល់អាជីវកម្មបម្រើឲ្យវិស័យម្ហូបអាហារជាច្រើន ក៏ដូចជាប៉ះពាល់តម្រូវការម្ទេសយ៉ាងខ្លាំង ដែលធ្វើឲ្យតម្លៃក៏ចុះថ្លៃទៅតាមនោះដែរ។
ស្រដៀងគ្នានេះដែរ លោក ហ្វី យ៉ាន ជាឈ្មួញកណ្តាល ដែលទទួលទិញម្ទេសពីប្រជាកសិករយកទៅលក់នៅប្រទេសថៃ និងម៉ាឡេស៊ី ក៏បានប្រាប់ក្រុមការងារ សារព័ត៌មាន ឌីជីថល ខេមបូណូមីសតាមទូរស័ព្ទថា តម្លៃម្ទេសចុះថ្លៃខ្លាំងដូចនេះ ដោយសារតែនៅបណ្តាប្រទេសដែលធ្លាប់នាំចូលម្ទេសពីប្រទេសកម្ពុជាយើង ដូចជា ថៃ និង ម៉ាឡេស៊ី ជាដើម គឺ ចំពេលដែលប្រទេសទាំងនេះ ដល់រដូវប្រមូលផលម្ទេសដែរ ខណៈដែលវៀតណាមក៏កំពុងប្រមូលផលម្ទេសនេះដូចគ្នាដែរ។ ដូច្នេះ វាបានធ្វើឲ្យម្ទេសចាល់សល់ច្រើន ហើយប្រទេសទាំងអស់នោះត្រូវកាត់បន្ថយការនាំចូលពីកម្ពុជា ប៉ុន្តែបើនាំចូលបាន ក៏លក់ក្នុងតម្លៃថោកដែរ។
អត្ថបទទាក់ទង!
ជុំវិញនឹងបញ្ហាម្ទេសចុះថ្លៃនេះដែរ ត្រូវបានលោក ឈឹម វជិរា ប្រធានមន្ទីរកសិកម្មខេត្តបាត់ដំបងក៏បានទទួលស្គាល់ដែរថា តម្លៃម្ទេសពិតជាការចុះថ្លៃច្រើនពិតមែន ប៉ុន្ដែ លោកថា មូលហេតុចម្បងចំពោះការចុះថ្លៃនេះ គឺដោយសារតែបញ្ហាការរីករាលដាលនៃជំងឺកូវីដ១៩។
បើតាមប្រធានមន្ទីរកសិកម្មខេត្តបាត់ដំបង និង លោក ហ្វី យ៉ាន ជាឈ្មួញកណ្តាល បានបញ្ជាក់ថា ជាទូទៅ ចាប់ពីក្រោយបុណ្យចូលឆ្នាំប្រពៃណីជាតិខ្មែរយើងទៅ គឺតម្លៃម្ទេស ចាប់ផ្តើមឡើងថ្លៃជាបន្តបន្ទាប់វិញមិនខាន ប៉ុន្តែបច្ចុប្បន្ន ដោយសារមានជំងឺកូវីដរាតត្បាតជាថ្មី ដូច្នេះគេមិនទាន់អាចប៉ាន់ស្មានបានទេ ដោយត្រូវរង់ចាំមើលស្ថានភាពជំងឺកូវីដ-១៩ មានការធូរស្បើយសិន៕None
