សារព័ត៌មានធំៗនៅលើពិភពលោក បានចុះផ្សាយថា លោក ស៊ី ជិនពីង មេដឹកនាំចិន ដែលមានវ័យ៧០ឆ្នាំ និងលោក វ្លាឌីមៀ ពូទីន មេដឹកនាំរុស្ស៊ី ដែលមានវ័យ៧១ឆ្នាំ កាលពីពេលថ្មីៗ បានចុះហត្ថលេខាលើសេចក្តីថ្លែងការណ៍រួមមួយ ស្តីពី ការបង្កើតយុគសម័យថ្មី ដែលមានជំហរប្រឆាំងនឹងសហរដ្ឋអាម៉េរិក លើបញ្ហាសន្តិសុខពិភពលោក ដូចជាបញ្ហានៅកោះតៃវ៉ាន់ អ៊ុយក្រែន កូរ៉េខាងជើង និងកិច្ចសហប្រតិបត្តិការលើបញ្ហាថ្មីពាក់ព័ន្ធនឹងបច្ចេកវិទ្យានុយក្លេអ៊ែសន្តិភាព និងហិរញ្ញវត្ថុ។
បើយោងតាមសេចក្តីប្រកាសដែលចុះហត្ថលេខាដោយមេដឹកនំាទាំងពីរ ជំនួបរវាងលោកស៊ី និងលោក ពូទីន ជាថ្មីនៅសប្តាហ៍នេះ បានឆ្លុះបញ្ចាំងឱ្យឃើញថា ទំនាក់ទំនងចិន-រុស្ស៊ី បានក្លាយទៅជាគំរូដ៏សំខាន់មួយ នៃទម្រង់ទំនាក់ទំនងអន្តរជាតិថ្មី ក៏ដូចជាទំនាក់ទំនងអ្នកជិតខាងដ៏ល្អរវាងប្រទេសមហាអំណាចទាំងពីរ។
វឌ្ឍនភាពគួរឱ្យកត់សម្គាល់ក្នុងទំនាក់ទំនងចិន-រុស្ស៊ី គឺការប្តេជ្ញាចិត្តរបស់ប្រទេសទាំងពីរចំពោះគោលការណ៍យុទ្ធសាស្ត្រសំខាន់ៗចំនួនប្រាំ។ ទី១, ចិន-រុស្ស៊ី ប្តេជ្ញាគោរពគ្នាទៅវិញទៅមកនូវគោលការណ៍គ្រឹះនៃទំនាក់ទំនង និងផ្តល់ការគាំទ្រសម្រាប់ផលប្រយោជន៍ស្នូលរបស់ប្រទេសទាំងពីរ។ ទី២, ប្រទេសទាំងពីរប្តេជ្ញាចិត្តអនុវត្តកិច្ចសហប្រតិបត្តិការឈ្នះ-ឈ្នះ ដែលជាកម្លាំងជំរុញនៃទំនាក់ទំនង និងបង្កើតឱ្យមានគំរូថ្មីនៃផលប្រយោជន៍រវាងប្រទេសទាំងពីរ ខណៈដែលកាលពីឆ្នាំ២០២៣ ពាណិជ្ជកម្មទ្វេភាគីមានទំហំលើសពី២៤០ពាន់លានដុល្លារ ពោលគឺកើនឡើងជិត៣ដងនៅក្នុងរយៈពេលមួយទសវត្សរ៍មកនេះ។
អត្តបទគួរអាន
ទី៣, ចិន និងរុស្ស៊ីប្តេជ្ញារក្សាមិត្តភាពយូរអង្វែងជាមូលដ្ឋានគ្រឹះនៃទំនាក់ទំនង ដោយផ្តោតលើការអនុវត្តផែនទីបង្ហាញផ្លូវសម្រាប់កិច្ចសហប្រតិបត្តិការចិន-រុស្ស៊ី ស្តីពីប្រជាជននិងប្រជាជន និងការផ្លាស់ប្តូរវប្បធម៌មុនឆ្នាំ២០៣០។ ទី៤, មហាអំណាចទាំងពីរបានប្តេជ្ញាយ៉ាងម៉ឺងម៉ាត់ក្នុងការការពារប្រព័ន្ធអន្តរជាតិ ដែលផ្តោតលើអង្គការសហប្រជាជាតិ និងសណ្តាប់ធ្នាប់អន្តរជាតិ ដែលស្ថិតនៅក្រោមច្បាប់អន្តរជាតិ តាមរយៈការជួយសម្របសម្រួល និងកិច្ចសហប្រតិបត្តិការយ៉ាងជិតស្និទ្ធនៅក្នុងវេទិកាពហុភាគីដូចជានៅអង្គការសហប្រជាជាតិ, អង្គការសហប្រតិបត្តិការសេដ្ឋកិច្ចអាស៊ីនិងប៉ាស៊ីហ្វិក ក្រុមប្រទេស G20 ដើម្បីលើកកម្ពស់ និងជំរុញយន្តការពហុភាគី និងសកលភាវូបនីយកម្មសេដ្ឋកិច្ច និងទី៥, ប្តេជ្ញាប្រឆាំងនឹងសង្រ្គាមត្រជាក់ និងគោលនយោបាយអនុត្តរភាព ដែលនៅពេលនេះមេដឹកនាំទាំងពីរបានអះអាងថា នៅតែបន្តកើតមាន និងកំពុងគំរាមកំហែងដល់សន្តិភាពពិភពលោក និងសន្តិសុខនៃប្រទេសទាំងពីរ។
ពាក់ព័ន្ធនឹងសេចក្តីថ្លែងការណ៍នេះ អ្នកវិភាគបានអះអាងថា តាមស្មារតីនៃសេចក្តីប្រកាសរួម សេចក្តីថ្លែងការណ៍នេះត្រូវបានពិពណ៌នាថា ជាការធ្វើឱ្យទំនាក់ទំនងយុទ្ធសាស្ត្រកាន់តែស៊ីជម្រៅរវាងប្រទេសទាំងពីរ ហើយក៏បានលើកឡើងពីផែនការបង្កើនទំនាក់ទំនងយោធា និងរបៀបដែលចិន ក៏ដូចជារុស្ស៊ីនឹងពង្រឹងកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរក្រោមលេសសន្តិសុខក្នុងតំបន់ និងពិភពលោកផងដែរ៕
ដោយៈ សរ សុជាតិ
None
