នៅប៉ុន្មានខែមុនការប្រកួត ចិនសម្រេចមិនលក់សំបុត្រឲ្យសាធារណជនចូលទស្សនាឡើយ សូម្បីតែប្រជាជនក្នុងស្រុក ខណៈអ្នកគាំទ្រនៅក្រៅប្រទេសក៏មិនអាចធ្វើដំណើរមកគាំទ្រក្រុមជម្រើសជាតិរបស់ខ្លួនបានដែរ។ នេះក៏ដោយសារតែគោលនយោបាយទប់ស្កាត់កូវីដ១៩ដ៏តឹងរ៉ឹង ពីរដ្ឋអំណាចក្រុងប៉េកាំង។
ប៉ុន្តែចាប់តាំងពីការប្រកួតបានចាប់ផ្តើមកាលពីដើមខែកុម្ភៈមក ចិនអនុញ្ញាតឲ្យមានអ្នកចូលទស្សនាចំនួន ៣០%នៃទំហំទីតាំងប្រកួតសរុប ខណៈអ្នកគាំទ្រទាំង៣០%ដែលអាចចូលទស្សនា គឺសុទ្ធសឹងជាក្រុមគោលដៅ ដែលអាជ្ញាធរកំណត់ នឹងមានសិទ្ធិទទួលបានសំបុត្រចូលទស្សនា។
យ៉ាងណាមិញ សម្រាប់ជំហានបន្ទាប់អ្នករៀបចំព្រឹត្តិការណ៍អូឡាំពិក នឹងអនុញ្ញាតឲ្យមានអ្នកចូលទស្សនាច្រើនជាង៣០% ផ្អែកទៅតាមស្ថានភាព និងតម្រូវការជាក់ស្តែង។ នេះក៏ដោយសារតែស្ថានភាពកូវីដ១៩នៅរដ្ឋធានីប៉េកាំង ជាទីដែលទទួលរៀបចំកីឡាអូឡាំពិករដូវរងាបានស្ថិតក្រោមការគ្រប់គ្រងរួចទៅហើយ។ នេះបើតាមការអះអាងពីលោក ហ័ង ឈុន ប្រធានការិយាល័យបង្ការ និងគ្រប់គ្រងជំងឺរាតត្បាតរបស់គណៈកម្មការអូឡាំពិក។
អត្ថបទគួរអាន
អ្នកទស្សនានឹងត្រូវបានបំបែកចេញឆ្ងាយពីអត្តពលិក និងមនុស្សផ្សេងទៀត ការចេញចូលកន្លែងប្រកួត ត្រូវមានច្រកទ្វារជាក់លាក់ ហើយត្រូវអង្គុយនៅក្នុងតំបន់ដែលគេបានកំណត់រួចជាស្រេច។ អ្នកទស្សនា ក៏នឹងត្រូវធ្វើតេស្តស្វែងរកជំងឺកូវីដ១៩ ជាប្រចាំ និងឆ្លងកាត់ការពិនិត្យសុខភាពជារឿយៗផងដែរ។
បើតាមអ្នកនាំពាក្យរបស់គណៈកម្មការរៀបចំព្រឹត្តិការណ៍នេះតែម្តងឲ្យដឹងដែរថាស អ្នកទស្សនា នឹងមិនចាំបាច់ធ្វើចត្តាឡីស័កឡើយ បន្ទាប់ពីទស្សនាការប្រកួតចប់ ប៉ុន្តែមិនអនុញ្ញាតឱ្យស្ថិតនៅឬទៅកន្លែងណាដែលមានមនុស្សច្រើនកុះករឡើយ។
សូមបញ្ជាក់ថា គិតត្រឹមថ្ងៃទី៨ខែកុម្ភៈសប្តាហ៍នេះ អ្នករៀបចំកម្មវីធីអូឡាំពិកប៉េកាំង បានប្រកាសថា មិនមានរកឃើញជំងឺកូវីដ១៩នាំចូលថ្មីៗទៀតនោះទេ ប៉ុន្តែមាន៦ករណី ត្រូវរកឃើញនៅតំបន់ស្នាក់របស់បុគ្គលិក និងអត្តពលិក ដែលនេះជាអត្រាទាបបំផុតក្នុងពេល២សប្តាហ៍មកនេះ៕
None
