ការលើកឡើងដូច្នេះ ពីមន្ត្រីជាន់ខ្ពស់ក្រុងប៉េកាំងរូបនេះ ជាការបញ្ជាក់ជាថ្មី នូវការប្តេជ្ញាចិត្តរបស់រដ្ឋអំណាចចិន ក្នុងការនាំយកដែនកោះមួយនេះ មកស្ថិតក្រោមការគ្រប់គ្រងរបស់ខ្លួន។ នេះបើតាមការចុះផ្សាយពីទីភ្នាក់ងារសារព័ត៌មាន រ៉យទ័រ។
ថ្លែងសារពីទីក្រុងប៉េកាំងប្រទេសចិន លោក វ៉ាង យី បានប្រកាសក្តែងៗថា ភាពតានតឹងដែលកើតមានបច្ចុប្បន្នរវាង ក្រុងប៉េកាំង និង ក្រុងតៃប៉ិ មិនមែនដោយសារប្រទេសចិននោះទេ តែដោយសារតែតៃវ៉ាន់ ព្យាយាមពឹងផ្អែកលើសហរដ្ឋអាមេរិក ដើម្បីទទួលបានឯករាជ្យ ហើយអាមេរិកទៀតសោត ព្យាយាមប្រើប្រាស់តៃវ៉ាន់ជាកូនអុក ដើម្បីគ្រប់គ្រង និងមានឥទ្ធិពលលើប្រទេសចិន។
លោកវ៉ាង យី រដ្ឋមន្ត្រីការបរទេស និង ជាទីប្រឹក្សារដ្ឋចិនបាននិយាយចំៗថា ដោយសារតែសកម្មភាពដ៏ច្របូកច្របល់របស់តៃវ៉ាន់ និងសហរដ្ឋអាមេរិក បានផ្លាស់ប្តូរស្ថានភាពបច្ចុប្បន្ន និងធ្វើឱ្យខូចខាតដល់សន្តិសុខនៅច្រកសមុទ្រតៃវ៉ាន់។ លើសពីនេះវាបានបំពានលើការឯកភាពរបស់សហគមន៍អន្តរជាតិ និងបទដ្ឋានជាមូលដ្ឋាននៃទំនាក់ទំនងអន្តរជាតិថែមទៀត។នេះបើទីភ្នាក់ងារសារព័ត៌មានរ៉យទ័រ
អត្ថបទគួរអាន
រដ្ឋមន្ត្រីការបរទេសចិនរូបនេះបានបញ្ជាក់យ៉ាងដូច្នេះថា៖ កោះតៃវ៉ាន់ដូចជាមនុស្សដែលដើរគ្មានទិសដៅអ៊ីចឹង តែចុងក្រោយនៅតែត្រូវត្រឡប់មកផ្ទះវិញ ព្រោះតៃវ៉ាន់មិនមែនជាកូនអុកសម្រាប់អ្នកដទៃប្រើនោះទេ។ ចិននិងតៃវ៉ាន់ ត្រូវតែរួបរួមគ្នានៅថ្ងៃណាមួយមិនខាន។
គួររំឭកថា រដ្ឋអំណាចចិនបានសម្តែងការខឹងសម្បារជាច្រើនលើកច្រើនសារមកហើយ ទាក់ទងនឹងការព្យាយាមផ្តល់ការគាំទ្រតាមគ្រប់វិធីសាស្ត្រដល់ដែនកោះតៃវ៉ាន់ ពីសំណាក់សហរដ្ឋអាមេរិក។ អាមេរិកដែលជាគូកន មិនអាចខ្វះបានរបស់កោះតៃវ៉ាន់ ទាំងក្នុងទំនាក់ទំនងទ្វេភាគី និងការផ្គត់ផ្គង់អាវុធក្នុងតម្លៃជាច្រើនពាន់លានដុល្លារអាមេរិក។
កោះតៃវ៉ាន់ជារឿយៗ បានថ្កោលទោសការដាក់សម្ពាធពីក្រុងប៉េកាំង ដោយនិយាយថា ប្រជាជនតៃវ៉ាន់មានសិទ្ធិគ្រប់គ្រាន់ ដើម្បីសម្រេចជោគវាសនា និងអនាគតដោយខ្លួនឯង និងដោយគ្មានការគំរាមកំហែង៕None
