ក្រសួងពាណិជ្ជកម្មចិន បានអះអាង នៅថ្ងៃ អង្គារ នេះថា ក្រុមហ៊ុនចិនបានបញ្ឈប់ការទិញផលិតផលកសិកម្មពីអាមេរិក ដែលវាជាការប៉ះពាល់មួយដល់កសិករអាមេរិក ដែលត្រូវបានគេដឹងថា ការនាំចេញផលិតផលកសិកម្មរបស់ពួកគេបានធ្លាក់ចុះជាងមួយឆ្នាំមកហើយ ដោយសារតែសង្គ្រាមពាណិជ្ជកម្មរវាងប្រទេសទាំងពីរ គឺអាមេរិក និងចិន។ នេះបើតាមការរាយការណ៍ពីសារព័ត៌មាន Chanel News Asia នៅថ្ងៃនេះ។
បន្ថែមពីលើសពីការបញ្ឈប់ការទិញផលិតផលកសិកម្មពីអាមេរិកនេះទៀត ក្រសួងពាណិជ្ជកម្មចិន ក៏បានបញ្ជាក់ដែរថា រដ្ឋាភិបាលចិន ក៏អាចនឹងដំឡើងពន្ធគយបន្ថែមលើផលិតផលកសិកម្មអាមេរិកផងដែរ។
ការឈានដល់ការបញ្ឈប់ការបញ្ជាទិញ ផលិតផលកសិកម្មពីអាមេរិកនេះ គឺធ្វើឡើងបន្ទាប់ពីលោកត្រាំ បាននិយាយកាលពីថ្ងៃព្រហស្បតិ៍សប្ដាហ៍មុននេះថា រដ្ឋាភិបាលក្រុងបេកាំង មិនបានគោរពតាមសន្យា ទិញផលិតផលកសិកម្មអាមេរិកក្នុងចំនួនច្រើននោះទេ ហើយលោកត្រាំ ក៏បានប្រកាសនឹងដំឡើងពន្ធគយបន្ថែមលើទំនិញចិនជាង៣០០ ពាន់លានដុល្លារអាមេរិក ចាប់ពីខែកញ្ញាតទៅផងដែរ។
អត្ថបទទាក់ទង!
កាលពីថ្ងៃចន្ទទី ០៥ សីហានេះដែរ ប្រទេសចិន បានទម្លាក់តម្លៃលុយយន់របស់ខ្លួនមកនៅកម្រិត៧យន់ ក្នុង១ដុល្លារអាមេរិកដើម្បីសម្រួលដល់បញ្ហាទីផ្សារដែលកំពុងតានតឹង នឹងជាការវាយបកមួយផងដែរទៅលើការគ្រោងដំឡើងពន្ធ លើទំនិញចិន ៣០០ ពាន់លានដុល្លារអាមេរិក ពីសំណាក់រដ្ឋាភិបាលក្រុងវ៉ាស៊ិនតោន។ ការទម្លាក់ថ្លៃលុយយន់របស់ចិននេះ ត្រូវបានគេមើលឃើញថា គឺជាការទម្លាក់តម្លៃលើកទី១ហើយ នៅក្នុងរយៈពេលជាង១ទសវត្សរ៍ចុងក្រោយនេះ។
ជាការឆ្លើយតបភ្លាមៗ លោក ដូណាល់ត្រាំ បានចាត់ទុកការទម្លាក់តម្លៃលុយយន់របស់ចិននេះថា ជាអ្នករៀបចំឧបាយកលរូបិយវត្ថុ ឬគេហៅថា Currency Manipulator ។
គួរបញ្ជាក់ដែរថា ពន្ធគយដែលចិនបានដាក់លើផលិតផលសណ្ដែកសៀងអាមេរិក កាលពីពេលកន្លងទៅ បានកាត់បន្ថយការនាំចេញផលិតផលសណ្ដែកសៀងអអាមេរិក ជាច្រើន ហើយរដ្ឋាភិបាលលោកត្រាំ ក៏បានសងសំណងដល់កសិករអាមេរិក ក្នុងរយៈពេលពីរឆ្នាំមកហើយ ជាមួយនឹងការចំណាយជារួមប្រមាណ ២៨ ពាន់លានដុល្លារអាមេរិក។
របាយការណ៍ពីការិយាល័យកសិកម្មអាមេរិក បានឲ្យដឹងថា កាលពីឆ្នាំ២០១៨ កន្លងទៅ ចិនបាននាំចូលផលិតផលកសិកម្មអាមេរិក ប្រមាណ ៩ពាន់លានដុល្លារអាមេរិក។
យ៉ាងណាក៏ដោយចុះ ក្រសួងពាណិជ្ជកម្មចិន បាននិយាយនៅក្នុងសេចក្ដីថ្លែងការណ៍របស់ខ្លួនថា ចិនសង្ឃឹមថា អាមេរិកនឹងរក្សាពាក្យសន្យារបស់ខ្លួន និងបង្កើតនូវលក្ខខណ្ឌចាំបាច់ សម្រាប់កិច្ចសហប្រតិបត្តិការទ្វេភាគីលើវិស័យពាណិជ្ជកម្មកសិកម្ម ក៏ដូចជាកិច្ចចរចាឈានទៅរកការបញ្ចប់សង្គ្រាមពាណិជ្ជកម្មផងដែរ៕
None
