Advertisement
ទំនាក់ទំនង​ កម្ពុជា-ចិន-អាមេរិក

សម្តេចនឹងចូលរួមវេទិកា ខ្សែក្រវាត់ និងផ្លូវនៅប៉េកាំង ខណៈអាមេរិកបន្តរិះគន់គម្រោងរបស់ចិន


សម្តេចនាយករដ្ឋមន្រ្តី ហ៊ុន សែននឹងអញ្ជើញចូលរួមវេទិកា ខ្សែក្រវាត់មួយ ផ្លូវមួយ នៅទីក្រុងប៉េកាំង ប្រទេសចិន ខណ:ដែលសហរដ្ឋអាមេរិកបន្តរិះគន់គោលនយោបាយខ្សែក្រវាត់មួយ ផ្លូវមួយរបស់ចិន ថា ខ្វះតម្លាភាព និងគណនេយ្យភាព។
ប្រធានាធិបតីចិន (ឆ្វេង) និងប្រធានាធិបតីអាមេរិក (ស្ដាំ) (http://www.sundaynews.co.zw)
Advertisement

យោងតាមសេចក្តី​ប្រកាសព័ត៌មាន​ក្រសួងការបរទេស​នៅថ្ងៃចន្ទនេះ វេទិកា​ខ្សែក្រវាត់​មួយ ផ្លូវមួយ​លើកទី២​នេះ មានរយៈពេល ៥ថ្ងៃ ហើយនឹងចាប់​ផ្តើមពីថ្ងៃទី ២៥ ដល់ ថ្ងៃទី ២៩ ខែ​មេសា ឆ្នាំ២០១៩។

សេចក្តីប្រកាស​ព័ត៌មាន​ក្រសួង​ការបរទេស​បានសរសេរ​ដូច្នេះថា«នៅក្នុង​សម័យ​ប្រជុំជាន់​ខ្ពស់​នៃវេទិកា​ខ្សែ​ក្រវាត់ និងផ្លូវ​លើកទី២ នៅថ្ងៃទី ២៦ ខែមេសា សម្តេច​តេជោ​នាយករដ្ឋមន្រ្តី​នឹងថ្លែង​សុន្ទរកថា​ពីមូល​បទ​របស់​វេទិកា កិច្ចសហប្រតិបត្តិការ​ខ្សែក្រវាត់ និងផ្លូវៈ បង្កើត​ជោគវាសនា​រួម​ដ៏ត្រចះត្រចង់។»

ថ្នាក់ដឹកនាំ​បរទេស​ប្រមាណជា ៤០នាក់ និងអ្នក​តំណាង​មកពីជាង ១០០ប្រទេស​ផ្សេងទៀត​នឹងចូល​រួមវេទិកា​ខ្សែក្រវាត់ និងផ្លូវលើក​ទី២នេះ នេះយោង​តាម​កាសែត​ចិន People’s Daily។

ចំពោះ​សហរដ្ឋអាមេរិក​វិញ ខ្លួនក៏បាន​ប្រកាសរួច​ហើយថា ខ្លួននឹង​មិនបញ្ជូន​មន្រ្តីជាន់ខ្ពស់​ចូលរួម​កិច្ចប្រជុំ​កំពូល​នេះទេ ដោយសារ​មានការព្រួយ​បារម្ភ​ពីការ​អនុវត្ត​ផ្តល់ហិរញ្ញប្បទាន​របស់គម្រោង​ខ្សែក្រវាត់​មួយ ផ្លូវ​មួយនេះ។

នៅថ្ងៃចន្ទ​នេះផងដែរ ស្ថានទូត​អាមេរិក​នៅកម្ពុជា បានបង្ហោះ​សារ​រិះ​គន់​ថ្មី​លើក្រុមហ៊ុន​សំណង់​រដ្ឋ​ចិន​ដែលបាន​សង់ទំនប់​វារីអគ្គិសនី​នៅប្រទេស​អេក្វាឌ័រ​ដែលហាក់​ដូចជា​គ្មានដំណើរការ​សោះ។

ស្ថានទូតអាមេរិក​បានសរសេរ​ដូច្នេះថា​តាមរយ:​ហ្វេសប៊ុកផ្លូវការ​របស់ខ្លួន​ «សំណង់គ្មាន​គុណភាព និងការមិន​គិតពី​ស្តង់ដា​សុវត្ថិភាព មានន័យថា កសិករ​នៅផ្នែក​ខាងក្រោម​ត្រូវទទួល​រងការជន់​លិចជា​ញឹកញាប់។ សូមអាន​បន្តស្តីពីគម្រោង​សាងសង់​នេះ ក្រោមគោលនយោបាយ​ខ្សែក្រវាត់​មួយ ផ្លូវមួយ​របស់ចិន ហើយនិង​បញ្ហារបស់​វាទាក់ទង​នឹងកង្វះ​តម្លាភាព និងគណនេយ្យ​ភាព​នៅត្រង់នេះ។ តើអ្នកមើល​ឃើញរូបភាព​រួមទេ?»

តាមរយ:​ហ្វេសប៊ុក​ដដែល ស្ថានទូត​អាមេរិក​បានភ្ជាប់​នូវអត្តបទ ដែលនិយាយ​ពីទំនប់​វារីអគ្គីសនី​នៅអេក្វាឌ័រ​មួយ ដែលហាក់​ដូចជា​មិនដំណើរការ​បន្ទាប់​ពីសង់ហើយ​បាន២ឆ្នាំ ដោយក្រុមហ៊ុន​រដ្ឋចិន។

អត្តបទនោះ​និយាយថា ក្រុមហ៊ុន​ចិនបាន​សាងសង់​ទំនប់នេះ ដោយមិនគោរព​តាមស្តង់ដារ​សុវត្ថិភាព និងគុណភាព​ហើយដោយសារតែ​ការសាងសង់​មិនល្អ កសិដ្ឋាន​នៅខ្សែទឹក​ខាងក្រោម​បាន​ជន់លិច។

អត្តបទនោះក៏និយាយ​ផងដែរពី​លក្ខខណ្ឌ​និងស្ថានភាព​បំណុល​របស់អេក្វាឌ័រ​សរុប​នាពេល​បច្ចប្បន្ន ដែលកំពុងតែ​ប្រកាស​រកជំនួយ​អន្តរជាតិ ដើម្បីជួយ​សង ឬទិញបំណុល​ចិន។

ការរិះគន់ថ្មី​របស់​ស្ថានទូត​អាមេរិក​នៅថ្ងៃ​ចន្ទនេះ មានបន្ទាប់​ពីការលើកឡើង​របស់ស្ថាន​ទូតចិន អំពីចំនួន​ផ្លូវ ស្ពាន និងវារីអគ្គិសនី​ដែលខ្លួន​បានកសាង​នៅកម្ពុជា។

កាសែតចិន People’s Daily ដដែលនេះក៏បាន​ដកស្រង់​សម្ដី​មន្រ្តីជាន់ខ្ពស់​ចិនដោយ​បដិសេធការចោទ​ប្រកាន់ថា គំនិតផ្តួច​ផ្តើមនេះ​ថា ជាអន្ទាក់​បំណុល តែផ្ទុយទៅវិញ វាជាកិច្ច​សហប្រតិបត្តិការ​ ដែលធ្វើឲ្យ​ប្រទេស​ជាច្រើន​ទទួលបាន​ការអភិវឌ្ឍ។

ហាក់បីដូចជា​អត្ថាធិប្បាយ​លើការរិះគន់​គ្នា​រវាងអាមេរិក និងចិន​ពីរឿងកម្ពុជា លោកហ៊ុយ វណ្ណ: រដ្ឋលេខាធិការ​ក្រសួង​មហាផ្ទៃ បានសរសេរ​តាមហ្វេសប៊ុក​នៅថ្ងៃចន្ទនេះថា«ឱ! លោកអ្នក​ថ្លៃថ្នូរ! ហេតុម្តេច​ក៏មក​ឡូឡាអី នៅរបង​ផ្ទះយើងខ្ញុំ។ សុំមាន​សីលធម៌​ផង កុំមករំខាន​ដល់ដំណេក​កូនៗ​យើងខ្ញុំ។ បើចង់កាច់​កុង​គ្នាលើ​សេដ្ឋកិច្ច ឬភូមិសាស្ត្រ នយោបាយ ក៏សុំ​អញ្ជើញ​ឈ្លោះផ្ទាល់​គ្នាឯងចុះ។ កម្ពុជា គឺជា​ប្រទេស​អធិបតេយ្យ»៕

Advertisement
© 2019 រក្សាសិទ្ធិ​គ្រប់​បែប​យ៉ាង​ដោយ ខេមបូណូមីស។ សម្រាប់​ការ​ប្រើ​ប្រាស់ ឬ​ផ្សាយ​បន្ត សូមទាក់ទង​មក អ៊ីម៉េល sothea[at]cambonomist.com ឬទូរស័ព្ទលេខ​ 089 777 076។



អត្ថបទបន្ទាប់


អ្នកជំនាញ៖ គំរូអភិវឌ្ឍន៍ខេត្តព្រះសីហនុ កំពុងជះឥទ្ធិពលវិជ្ជមាន ទៅដល់ខេត្តមាត់សមុទ្រដទៃទៀត

ព័ត៌មាន
ដូចដែលយើង បានដឹងបានឭហើយថា ខេត្តព្រះសីហនុ នាប៉ុន្មានឆ្នាំចុងក្រោយនេះ បាននិងកំពុងទទួលបានការអភិវឌ្ឍយ៉ាងលឿនគំហុក ពិសេស គឺវិស័យសំណង់ ...

ឧញ៉ា សៀ ឫទ្ធី៖ ធនធានមនុស្សល្អ ចាំបាច់មានការអប់រំពីសាលាផង និងការអនុវត្តជាក់ស្ដែងផង

ព័ត៌មាន
សេដ្ឋី និងជាអ្នកជំនួញដ៏ល្បីឈ្មោះមួយរូប គឺលោក ឧកញ៉ា សៀ ឫទ្ធី បានលើកឡើងនាពេលថ្មីៗនេះថា ធនធានមនុស្ស​ពោរពេញ​ដោយ​សមត្ថភាព មិនត្រឹមតែមានក...
ច្រើនទៀត

អត្ថបទស្រដៀង


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ