រដ្ឋមន្ត្រីការពារជាតិចិន ត្រូវបានដាក់នៅក្រោមការស៊ើបអង្កេត ពាក់ព័ន្ធនឹងអំពើពុករលួយ

រដ្ឋមន្ត្រីការពារជាតិចិន លោក តុង ជុន ត្រូវបានរដ្ឋាអាជ្ញាចិន ដាក់ក្រោមការស៊ើបអង្កេតពាក់ព័ន្ធនឹងអំពើពុករលួយ ដែលជាផ្នែកមួយនៃយុទ្ធនាការប្រឆាំងអំពើពុករលួយរបស់ទីក្រុងប៉េកាំង ដែលបានដកតំណែងមន្ត្រីកំពូលៗមួយចំនួននៃកងទ័ពរំដោះប្រជាជនចិន នាពេលកន្លងមក។ លោក តុង អតីតមេទ័ពជើងទឹកត្រូវបានតែងតាំងជារដ្ឋមន្ត្រីការពារជាតិ កាលពីខែធ្នូ ឆ្នាំ២០២៣ ជំនួសលោក លី សាងហ្វូ (Li Shangfu) ដែលត្រូវបានដកចេញពីតំណែង ក្រោយដឹកនាំក្រសួងនេះបានរយៈពេល៧ខែ។

បើយោងតាមការចុះផ្សាយរបស់ Financial Times លោក តុង ជារដ្ឋមន្ត្រីក្រសួងការពារជាតិចិនទី៣ ដែលត្រូវបានដាក់ឱ្យស្ថិតនៅក្រោមការស៊ើបអង្កេតពីបទពុករលួយ ដោយរដ្ឋមន្ត្រីដំបូង គឺលោក វ៉េ ហ្វឹងហេ (Wei Fenghe) ដែលត្រូវបានដកចេញពីតំណែងកាលពីខែមិថុនា ឆ្នាំ២០២៣ បន្ទាប់មកគឺលោក លី សាងហ្វូ ដែលត្រូវបានដកចេញពីតំណែងកាលពីខែធ្នូ នៅឆ្នាំដដែលនោះ ក្រោមបទចោទបានបំពានគោលការណ៍បក្សយ៉ាងធ្ងន់ពាក់ព័ន្ធអំពើពុករលួយ។

មន្ត្រីយោធារបស់ចិន បានស្ថិតនៅក្រោមយុទ្ធនាការប្រឆាំងអំពើពុករលួយដ៏ទូលំទូលាយចាប់តាំងពីឆ្នាំមុន ដោយមានឧត្តមសេនីយ៍យោធាយ៉ាងតិច៩នាក់ និងនាយកប្រតិបត្តិឧស្សាហកម្មការពារជាតិ មួយចំនួនទៀត ត្រូវបានដកចេញពីស្ថាប័ននីតិបញ្ញត្តិជាតិមកទល់ពេលនេះ៕

អត្ថបទ៖ សុខ មង្គល