ការនាំចូលរបស់ប្រទេសចិន នូវទំនិញសំខាន់ៗផលិតដោយសហរដ្ឋអាម៉េរិក ដូចជាកប្បាស រថយន្ត និងផលិតផលថាមពលជាដើម បានធ្លាក់ចុះយ៉ាងខ្លាំងក្នុងរយៈពេលពីរខែ ដើមឆ្នាំ២០២៥ នេះ បន្ទាប់ពីការដំឡើងពន្ធគយរបស់លោក ដូណាល់ ត្រាំ បានធ្វើឱ្យក្រុងប៉េកាំង ខឹងឆេះដុំ និងចាត់វិធានការសងសឹកវិញ។
យោងតាមការវិភាគរបស់សារព័ត៌មានអន្តរជាតិ Bloomberg ទៅលើទិន្នន័យដែលបានចេញផ្សាយកាលពីថ្ងៃទី២០ ខែមីនា បានបង្ហាញថា ការនាំចូលរបស់ប្រទេសចិន នូវទំនិញសំខាន់ៗផលិតដោយសហរដ្ឋអាម៉េរិក បានធ្លាក់ចុះខ្លាំង ដោយក្នុងនោះការនាំចូលកប្បាសបានធ្លាក់ចុះ៨០% ការនាំចូលរថយន្តធំៗបានធ្លាក់ចុះជិត៧០% ហើយការនាំចូលប្រេងឆៅ និងឧស្ម័នធម្មជាតិរាវ (LNG) បានធ្លាក់ចុះជាង៤០% បើធៀបនឹងឆ្នាំមុន ហើយនេះឆ្លុះបញ្ចាំងពីការរអាក់រអួលកាន់តែខ្លាំងនៃពាណិជ្ជកម្មពិភពលោក។ សូមបញ្ជាក់ថា ទំនិញទាំងអស់នេះសុទ្ធតែបានប្រឈមនឹងពន្ធសងសឹករបស់ប្រទេសចិន។
សង្គ្រាមពាណិជ្ជកម្មសងសឹកទៅវិញទៅមករវាងសហរដ្ឋអាម៉េរិក និងមហាយក្សចិន ក្នុងរយៈពេល៦សប្ដាហ៍មកនេះ បានបង្កឱ្យមានស្ថានភាពមិនប្រាកដប្រជា និងទំនិញឡើងថ្លៃសម្រាប់អាជីវកម្មនានា នៅទូទាំងតំបន់។ ក្រុមហ៊ុននានា កំពុងមានប្រតិកម្មឆ្លើយតបរួចទៅហើយ ដោយក្រុមហ៊ុនចិន បានកាត់បន្ថយការនាំចេញកញ្ចប់ទំនិញតូចៗកាលពីអំឡុងខែកុម្ភៈ ខណៈដែលបណ្ដាក្រុមហ៊ុនលក់រាយរបស់សហរដ្ឋអាម៉េរិក ដូចជាក្រុមហ៊ុន Walmart ជាដើម បានស្នើសុំឱ្យក្រុមហ៊ុនផ្គត់ផ្គង់នានារបស់ខ្លួនបញ្ចុះថ្លៃទំនិញ ដើម្បីទប់ខាតពីការបង់ពន្ធទាំងនេះ៕
ដោយ: តែម សុខុម
