លោក ត្រាំ បង្ហើបថា មេដឹកនាំចិន អាចនឹងមកបំពេញទស្សនកិច្ចនៅអាម៉េរិក ឆាប់ៗនេះ ចំពេលសង្គ្រាមពន្ធកំពុងឡើងកម្តៅ

គេរំពឹងថា មេដឹកនាំនៃប្រទេសទាំងពីរនឹងមានការពិភាក្សាគ្នាលើបញ្ហាមួយចំនួន ជាពិសេសបញ្ហាការដំឡើងពន្ធដាក់គ្នាទៅវិញទៅមកតែម្តង។ ប៉ុន្តែលោកមិនបានបញ្ជាក់លម្អិតជុំវិញបញ្ហានេះនោះទេ ហើយស្ថានទូតចិន ប្រចាំសហរដ្ឋអាម៉េរិក ក៏មិនបានបញ្ជាក់ជុំវិញការលើកឡើងរបស់លោក ត្រាំ នេះដែរ។

ប្រធានាធិបតីសហរដ្ឋអាម៉េរិក លោក ដូណាល់ ត្រាំ បានបង្ហើបកាលពីពេលថ្មីៗថា មេដឹកនាំចិន លោក ស៊ី ជីនភីង អាចនឹងមកបំពេញទស្សនកិច្ចនៅលើទឹកដីសហរដ្ឋអាម៉េរិក ក្នុងពេលឆាប់ៗខាងមុខនេះ ដើម្បីពិភាក្សាលើបញ្ហាពន្ធគយ និងបញ្ហាផ្សេងៗមួយចំនួនទៀត។ ប៉ុន្តែលោកមិនបានបញ្ជាក់លម្អិតជុំវិញបញ្ហានេះនោះទេ ហើយស្ថានទូតចិន ប្រចាំសហរដ្ឋអាម៉េរិក ក៏មិនបានបញ្ជាក់ជុំវិញការលើកឡើងរបស់លោក ត្រាំ នេះដែរ។

អាម៉េរិក ក្រោមការដឹកនាំរបស់រដ្ឋបាល លោក ដូណាល់ ត្រាំ បានសម្រេចដំឡើងពន្ធ២០% លើទំនិញនាំចូលពីប្រទេសចិន ក្រោមហេតុផលទីក្រុងប៉េកាំង មិនបានព្យាយាមទប់ស្កាត់រំហូរសារធាតុអាភៀនសំយោគហ្វេនតានីលខុសច្បាប់ ដែលបានធ្វើឱ្យពលរដ្ឋអាម៉េរិក ជាច្រើននាក់ បានស្លាប់ ដោយសារការប្រើប្រាស់លើសកម្រិត។

ទោះជាយ៉ាងណាលោកដូណាល់ត្រាំ បានបង្ហាញសុទិដ្ឋិនិយមខ្ពស់នៅប៉ុន្មានសប្តាហ៍កន្លងមកនេះ ក្នុងការធ្វើឱ្យប្រសើរឡើងនូវទំនាក់ទំនងជាមួយលោក ស៊ី ជីនភីង។ ប៉ុន្តែវាមានសញ្ញាណតិចតួចណាស់ក្នុងការធ្វើឱ្យប្រសើរឡើងវិញចំពោះបញ្ហា ដែលធ្វើឱ្យមហាអំណាចទាំងពីរនេះខ្វែងគំនិតគ្នា រាប់ចាប់តាំងពីពន្ធគយរហូតដល់បញ្ហានៅកោះតៃវ៉ាន់៕

អត្ថបទ៖ សុខ មង្គល