ក្រុមហ៊ុនវិនិយោគរដ្ឋចិន នឹងចាក់បញ្ចូលប្រាក់ចំនួនជិត២ពាន់លានដុល្លារចូលទៅក្នុងរោងចក្របន្ទះឈីបនៅទីក្រុងស៊ិនជិន

ក្រុមហ៊ុនចិន CR Micro ដែលចុះបញ្ជីនៅក្រុងស៊ាងហៃបាននិយាយក្នុងឯកសារមួយកាលពីថ្ងៃអង្គារ ទី១៥ ខែសីហាថា ក្រុមប្រឹក្សាភិបាលរបស់ក្រុមហ៊ុននេះបានអនុម័តផែនការសម្រាប់ក្រុមហ៊ុនបុត្រសម្ព័ន្ធបន្ទះឈីបរបស់ខ្លួននៅទីក្រុងស៊ិនជិន គឺក្រុមហ៊ុន Runpeng ដើម្បីលក់ភាគហ៊ុនទៅឱ្យវិនិយោគិនជាច្រើន។
កិច្ចព្រមព្រៀង ដែលនៅតែរង់ចាំការអនុម័តពីក្រុមភាគហ៊ុនិកនេះ នឹងពង្រីកដើមទុនចុះបញ្ជីរបស់ក្រុមហ៊ុន Runpeng ពីចំនួនជិត៣៣០លានដុល្លារ ជាមួយការចាក់បញ្ចូលដើមទុនពីក្រុមហ៊ុន National Integrated Circuit Industry Investment Fund Co. Ltd. ដែលគេស្គាល់ថាជា «មូលនិធិធំ (Big Funds)» និងមូលនិធិវិនិយោគ ដែលគាំទ្រដោយរដ្ឋាភិបាលចំនួន៤ផ្សេងទៀត។
មូលនិធិដែលគាំទ្រដោយទីក្រុងស៊ិនជិនចំនួន៣ ដែលជាម្ចាស់ភាគហ៊ុនបច្ចុប្បន្នរបស់ក្រុមហ៊ុន Runpeng នេះ នឹងស្ថិតក្នុងចំណោមអ្នកវិនិយោគមួយចំនួន។ នេះបើយោងតាមប្រភពពីក្រុមហ៊ុន Resources Microelectronics។

ប្រតិបត្តិការនេះនឹងកាត់បន្ថយភាគហ៊ុនរបស់ក្រុមហ៊ុន CR Micro នៅក្នុងក្រុមហ៊ុនស្ថិតនៅក្នុងទីក្រុងសិនជិនមួយនេះពី ជិត៩៩%មកនៅត្រឹម៣៣% បន្ទាប់មកគឺក្រុមហ៊ុន Big Fund មកនៅត្រឹម២៥% ហើយអ្នកវិនិយោគថ្មីគឺក្រុមហ៊ុនមូលនិធិកែសំរួលរចនាសម្ព័ន្ធសហគ្រាសគ្រប់គ្រងដោយរដ្ឋនឹងទទួលបានភាគហ៊ុន១០%។
ក្រុមហ៊ុន CR Micro បាននិយាយថា ការវិនិយោគនេះមានបំណងណែនាំក្រុមអ្នកវិនិយោគជាយុទ្ធសាស្រ្តជាមួយទំនាក់ទំនងដ៏រឹងមាំទៅនឹងអាជីវកម្មស្នូល និងការសហការគ្នាដ៏សំខាន់ក្នុងការផ្តល់មូលនិធិ និងការគាំទ្រធនធានឧស្សាហកម្មដើម្បីសាងសង់រោងចក្រផលិតបន្ទះឈីបទំហំតូច សមត្ថភាពខ្ពស់នៅទីក្រុងសិនជិន៕