លោក អុិន ចាន់នី តំណាងសហគមន៍ពលរដ្ឋរស់នៅក្នុងទីក្រុងរណបហ្គ្រេនភ្នំពេញ បានប្រាប់សារព័ត៌មានខេមបូណូមីសនៅថ្ងៃនេះថា ទោះបីជាលិខិតពីសាលារាជធានីបានចេញមកហើយក៏ពិតមែន តែប្រជាពលរដ្ឋនៅក្នុងសហគមន៍ទីក្រុងរណបហ្គ្រេនភ្នំពេញ នៅតែរងចាំមើលការឆ្លើយតបពីក្រសួង ៣ទៀតសិន ដែលតំណាងសហគមន៍បានដាក់លិខិតជូនកាលពីខែកញ្ញា និងក្រុមហ៊ុនពាក់ព័ន្ធផងដែរ។
លោក អុិន ចាន់នី បានបញ្ជាក់ថា៖« បន្ទាប់ពីបានទទួលលិខិតពីអាជ្ញាធរក្រុង ពីអភិបាលក្រុងមកហ្នឹង ប្រជាពលរដ្ឋនៅក្នុងសហគមន៍ហ្រ្គេនភ្នំពេញហ្នឹង គឺបានឃើញហើយខ្លឹមសារហ្នឹង ប៉ុន្តែដោយសារលិខិតហ្នឹងមានដាក់ទៅស្ថាប័នជំនាញជាច្រើនទៀត រួមមានក្រសួងបរិស្ថាន ក្រសួងសេដ្ឋកិច្ចនិងហិរញ្ញវត្ថុ ជាពិសេសក្រសួងដែនដីនគរូបនីយកម្ម យើងរងចាំចម្លើយរបស់លោក ព្រោះសហគមន៍ហ្រ្គេនភ្នំពេញ ដែលបានរស់នៅទីនោះជាង១០ឆ្នាំហើយហ្នឹង លោកច្បាស់ថា ដីលំនៅឋានរបស់លោក ប្រកបដោយបរិស្ថានដែលលោកតែងតែបានទាមទារកន្លងមកហ្នឹង គឺរួមមានស្រះទឹក និងទីលានវាយកូនហ្គោល ដែលត្រូវតែផ្សាភ្ជាប់ជាមួយគ្នាដើម្បីក្លាយជាបរិស្ថានល្អ»។
អត្ថបទទាក់ទង!
នៅថ្ងៃទី០២ ខែតុលានេះ ក្រុមការងារខេមបូណូមីសបានទាក់ទងទៅខាងក្រសួងបរិស្ថាន ដើម្បីសាកសួរលម្អិតពីការឆ្លើយតបរបស់ក្រសួងបរិស្ថាន ចំពោះបញ្ហានេះ តែអ្នកនាំពាក្យក្រសួងបរិស្ថាន បានបញ្ជាក់ថា ក្រសួងបរិស្ថាន បានទទួលលិខិតរបស់ពលរដ្ឋរស់នៅក្នុងទីក្រុងរណបហ្គ្រេនភ្នំពេញនោះហើយ តែក្រសួងពេលមិនទាន់អាចប្រាប់លម្អិតនោះទេ ព្រោះក្រុមការងារជំនាញរបស់ក្រសួងកំពុងពិនិត្យមើលលើការងារនេះ។ ចំណែកអ្នកនាំពាក្យក្រសួងដែនដី នគរូបនីយកម្ម និងសំណង់វិញ ក្រុមការងារខេមបូណូមីសមិនទាក់ទងបានទេនៅថ្ងៃនេះ ព្រោះគ្មានអ្នកទទួលទូរសព្ទ។
បើតាមការលើកឡើងរបស់ លោក អុិន ចាន់នី ខាងសហគមន៍ពលរដ្ឋរស់នៅក្នុងទីក្រុងរណបហ្គ្រេនភ្នំពេញ ដូចជាមិនទាន់បានចរចាជាមួយគ្នាជាថ្មីម្តងទៀតនៅឡើយទេ ចាប់តាំងពីមានការតវ៉ា កាលពីថ្ងៃអាទិត្យ ទី២៧ កញ្ញា ឆ្នាំ២០២០ នោះមក។
លោកបានបន្ថែមថា «សហគមន៍សង្ឃឹមថា នឹងពិភាក្សាជាមួយនឹងក្រុមហ៊ុនពាក់ព័ន្ធ (ក្រុមហ៊ុន ជីប ម៉ុង និងក្រុមហ៊ុន YLP និង ក្រុមហ៊ុន Ciputra ) ដើម្បីនិយាយពីការអភិវឌ្ឍរួមគ្នា ដើម្បីបានផលប្រយោជន៍ទាំងអស់គ្នា ទាំងសហគមន៍ដែលប្រកបទៅដោយបរិយាកាសល្អ ហើយនិងក្រុមហ៊ុន ដែលជាអ្នកនាំឲ្យយើងមានការរីកចម្រើនទាំងអស់គ្នា»។
ដោយឡែក នៅព្រឹកថ្ងៃនេះ ក្រុមការងារខេមបូណូមីស បានទាក់ទងទៅខាងក្រុមហ៊ុនជីបម៉ុង ដើម្បីចង់ដឹង ថាតើមកដល់ពេលនេះ ក្រុមហ៊ុនបានជួបជជែកដោះស្រាយគ្នា ជាមួយអ្នករស់នៅក្នុងសហគមន៍ហ្គេនភ្នំពេញយ៉ាងណាខ្លះ? តែខាងតំណាងក្រុមហ៊ុន ជីប ម៉ុង បានឆ្លើយតបថា ក្រុមហ៊ុននៅតែរក្សាជំហរបស់ខ្លួនដដែល ក្នុងការអភិវឌ្ឍក្នុងនាមជាម្ចាស់កម្មសិទិ្ធស្របច្បាប់។
តំណាងក្រុមហ៊ុន ជីប ម៉ុង បានបញ្ជាក់ថា « យើងមិនទាន់ទាន់ទទួលបានការស្នើសុំជួបពីពលរដ្ឋទាំងនោះនៅឡើយទេ។ យើងបើកទូលាយដល់អតិថិជនទាំងអស់ ដែលរស់នៅក្នុងគម្រោងរបស់យើង ដើម្បីទទួលបានការឆ្លើយតបមួយ ក្នុងធ្វើឲ្យប្រសើរឡើងនូវសេវាកម្មរបស់យើង»។
តំណាងសហគមន៍ បានបញ្ជាក់យ៉ាងច្បាស់ថា៖«យើងដឹងហើយថា ដីហ្នឹង វាមានរូបភាពកម្មសិទ្ធិ តាមទម្រង់ណា ប៉ុន្តែរឿងសំខាន់បំផុតនោះគឺ វិធាននៃការប្រើប្រាស់ដី ដែលមានចែងនៅក្នុងអនុក្រឹត្យនោះ គឺជាកត្តាសំខាន់ណាស់ ដែលសហគមន៍ចង់បានថា បើដីហ្នឹងគោលដៅប្រើប្រាស់ជាបឹង គប្បីរក្សាទុកវានៅជាបឹង ហើយបើដីហ្នឹងមានគោលដៅដើមរបស់វាថា ត្រូវធ្វើដូចម្តេចហ្នឹង គឺរក្សាទៅតាម គោលដៅដើមហ្នឹង នោះឯងត្រូវទៅតាមអ្វីដែលសហគមន៍យើងចង់ឃើញ ហើយចង់មានការចូលរួមក្នុងការពិភាក្សាអភិវឌ្ឍ ឲ្យត្រូវទៅតាមវិធានដើម»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
