ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្ម បានបង្ហាញក្ដីរំពឹងថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នេះនឹងអាចចូលជាធរមានក្នុងពេលឆាប់ៗខាងមុខ ខណៈប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន ថ្មីៗនេះ ក៏បានស្នើឱ្យភាគីកូរ៉េឲ្យពន្លឿនការផ្ដល់សច្ចាប័នលើកិច្ចព្រមព្រៀងនេះឲ្យបានឆាប់ផងដែរ។ ប្រធានរដ្ឋសភាកូរ៉េ បានបញ្ជាក់ថា កិច្ចព្រមព្រៀងពាណិជ្ជកម្មកម្ពុជា-កូរ៉េ នឹងត្រូវផ្ដល់សច្ចាប័នក្នុងពេលឆាប់ៗ ខាងមុខ ពិសេសអំឡុងពាក់កណ្ដាលឆ្នាំ២០២២នេះតែម្ដង។
សម្រាប់កម្ពុជា ច្បាប់ស្ដីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង ត្រូវបានព្រះមហាក្សត្រនៃព្រះរាជាណាចក្រកម្ពុជាបានឡាយព្រះហស្ថលេខារួចហើយ កាលពីថ្ងៃទី២៩ ខែមករា ឆ្នាំ២០២២ ក្រោយពីបានឆ្លងការពិនិត្យរួរាល់ពីរដ្ឋសភា និងព្រឹទ្ធសភា។
អត្ថបទទាក់ទង!
បើតាម ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្ម កម្ពុជា កិច្ចព្រមព្រៀងពាណិជ្ជកម្មសេរីនេះ នឹងផ្ដល់ឱកាសឲ្យភាគីទាំងពីរ គឺកម្ពុជា និងកូរ៉េខាងត្បូង កាន់តែជំរុញកំណើនពាណិជ្ជកម្មរវាងគ្នានិងគ្នាកាន់តែខ្លាំងក្លាថែមទៀត។ បន្ថែមនោះ កម្ពុជា នឹងទទួលបានសម្បទានទីផ្សារច្រើនជាងការផ្ដល់ជូនភាគីកូរ៉េ និងអាចទាក់ទាញវិនិយោគិនពីប្រទេសកូរ៉េ និងប្រទេសផ្សេងទៀត ឲ្យមកវិនិយោគនៅកម្ពុជាកាន់តែច្រើនជាងមុនផងដែរ។ កិច្ចព្រមព្រៀងនេះនឹងសម្រួលពាណិជ្ជកម្មរវាងប្រទេសទាំងពីរ ថែមទាំងកាត់បន្ថយរបាំងមិនមែនពន្ធគយ ក៏ដូចជា ពង្រឹងកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ និងធ្វើឱ្យផលិតផលកម្ពុជា កាន់តែមានសក្ដានុពល នៅលើទីផ្សារអន្តរជាតិ។
សូមបញ្ជាក់ថា នៅឆ្នាំ២០២១ ទំហំពាណិជ្ជកម្មទ្វេភាគីរវាងប្រទេសកម្ពុជា និងកូរ៉េខាងត្បូង មានទំហំទឹកប្រាក់ប្រមាណ ៧៧២លានដុល្លារ មានការកើនឡើង ជិត៦ភាគរយ បើប្រៀបនឹងឆ្នាំ២០២០។ ក្នុងនោះ កម្ពុជា បាននាំចេញទៅប្រទេសកូរ៉េខាងត្បូង មានទំហំទឹកប្រាក់ ១៩៤លានដុល្លារ ខណៈការនាំចូលពីកូរ៉េ មកកម្ពុជាវិញ មានទំហំទឹកប្រាក់ ៥៧៧លានដុល្លារ។ នេះបើតាមរបាយការណ៍របស់ក្រសួងពាណិជ្ជកម្ម កម្ពុជា៕
None
