របាយការណ៍រួមរបស់អង្គការ លីកាដូ និងសមាគម ធាងត្នោត បានរកឃើញថា ពលរដ្ឋកម្ពុជាចំនួន ២.៣៨២លាននាក់ បានខ្ចីប្រាក់ពីគ្រឹះស្ថានមីក្រូហិរញ្ញវត្ថុ ចំនួនជាង ៨ពាន់លានដុល្លារ ហើយការសិក្សានេះបានធ្វើនៅក្នុងឃុំចំនួន១០ ក្នុងខេត្តចំនួន ៤ រួមទាំងទីក្រុងភ្នំពេញ ផងដែរ។
អង្គការ លីកាដូ និងសមាគម ធាងត្នោត បាននិយាយនៅក្នុងសេចក្តីប្រកាសព័ត៌មានដូច្នេះថា ៖ «គ្រឹះស្ថានមីក្រូហិរញ្ញវត្ថុនៅកម្ពុជា ធ្វើប្រតិបតិ្តការកម្ចីដោយអត្រាការប្រាក់ខ្ពស់ ដែលតម្រូវឲ្យដាក់បញ្ចាំប្លង់ដីជាទ្រព្យបញ្ចាំ ហើយស្ថាប័ននេះដាក់គោលដៅលើអតិថិជនក្រីក្រដែលងាយរងគ្រោះក្នុងការបាត់បង់ដីធ្លី។»
កម្ចីនីមួយៗមានប្រមាណជា ៣.៣៧០ដុល្លារ ដែលគិតជាមធ្យមភាគ ឥណទានគឺលើសពីចំណូលមធ្យមសម្រាប់មនុស្សម្នាក់ៗនៅក្នុងប្រទេស ដែលមានត្រឹមតែ ១.៣៨៤ដុល្លារ ក្នុងឆ្នាំ២០១៧។ នេះបើយោងតាមការសិក្សាដដែលនេះ។
អត្ថបទទាក់ទង
សេចក្តីប្រកាសព័ត៌មាន បានបន្តថា ៖ «ទម្រង់នៃប្រាក់កម្ចីដែលមានសភាពធ្ងន់ធ្ងរនេះ បានជួយបង្កើនប្រាក់ចំណូលយ៉ាងច្រើនសម្រាប់គ្រឹះស្ថានមីក្រូហិរញ្ញវត្ថុ និងដៃគូកម្ចីបរទេសរបស់គ្រឹះស្ថានទាំងនោះ ប៉ុន្តែ វាបានផ្តល់ផលប៉ះពាល់អវិជ្ជមានដល់សុវត្ថិភាពនៃសិទ្ធិកាន់កាប់ដីធ្លីរបស់ពលរដ្ឋកម្ពុជា ជាពិសេស សហគមន៍ដែលងាយរងគ្រោះ។»
ស្ថាប័នហិរញ្ញវត្ថុធំៗចំនួន៧ នៅកម្ពុជា បានរកប្រាក់ចំណូលបានច្រើនជាង ១៣០លានដុល្លារក្នុងឆ្នាំ២០១៧ នេះបើយោងតាមអង្គការ លីកាដូ និង សមាគម ធាងត្នោត។
អង្គការ លីកាដូ និងសមាគមធាងត្នោត បានលើកឡើងពីហានិភ័យខ្ពស់មួយចំនួន ដូចជា ការដែលពលរដ្ឋលក់ដីដោយបង្ខំចិត្ត ឬទទួលរងសម្ពាធខ្លាំងពីស្ថាប័នមីក្រូហិរញ្ញវត្ថុ ដែលជាអ្នកកាន់កាប់ប្លង់ដើម្បីឲ្យសងបំណុលទៀងទាត់ពេលវេលា។
របាយការណ៍នេះ អះអាងថា វិធីសាស្រ្តនេះកំពុងធ្វើឲ្យប្រជាពលរដ្ឋបាត់ដីស្រែចម្ការសម្រាប់ដាំដំណាំកសិកម្មរបស់ខ្លួន។
ហានិភ័យដែលគួរឲ្យបារម្ភមួយទៀត គឺពលរដ្ឋដែលមានបំណុលជាច្រើន បានខ្ចីប្រាក់ចងការផងដែរ ដើម្បីយកទៅសងបំណុលនៅគ្រឹះស្ថានមីក្រូហិរញ្ញវត្ថុ។ បញ្ហានេះបានធ្វើឲ្យក្រុមគ្រួសារពួកគាត់សម្រេចចិត្តឈប់រៀនដើម្បីធ្វើការយកប្រាក់ជួយដោះបំណុល ខណៈដែលមានអតិថិជនខ្លះត្រូវបង្ខំចិត្តហូបអាហារតិចជាងមុន។
អង្គការ លីកាដូ និងសមាគមធាងត្នោត បាននិយាយដូច្នេះថា ៖ «កសិករក្រីក្រគួរតែមិនត្រូវបានក្លាយជាកម្មវត្ថុនៃសកម្មភាពហិរញ្ញវត្ថុអសីលធម៌នោះទេ ប៉ុន្តែ គួរតែទទួលបានការឧបត្ថម្ភផ្នែកហិរញ្ញវត្ថុតាមបែបសហគមន៍និងប្រកបដោយនិរន្តរភាព។»
ការហៅទូរស័ព្ទជាច្រើនដង ទៅសមាគមមីក្រូហិរញ្ញវត្ថុកម្ពុជា មិនមានអ្នកណាទទួលទេ នៅថ្ងៃពុធ ទី៧ ខែសីហានេះ ក៏ប៉ុន្តែ បុគ្គលិកជាន់ខ្ពស់មួយរូបបានប្រាប់សារព័ត៌មានបរទេសថា សមាជិកសមាគមខ្លួនបានធ្វើតាមច្បាប់ ក៏ដូចជា គោរពគោលការណ៍ផ្តល់ប្រាក់កម្ចីផងដែរ។
នាយកប្រតិបត្តិស្តីទីនៃសមាគមមីក្រូហិរញ្ញវត្ថុកម្ពុជា ឈ្មោះ ជា សារ៉េន មានប្រសាសន៍ថា ៖ «សមាគមមីក្រូហិរញ្ញវត្ថុកម្ពុជា និងភាគីពាក់ព័ន្ធ មើលការរីកចម្រើនក្នុងវិស័យនេះ ដោយយកចិត្តទុកដាក់ និងចាត់វិធានការសមស្របដើម្បីធានាបាននូវកំណើនប្រកបដោយចីរភាពរយៈពេលវែង»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
