ការប្រកាសរបស់ក្រុមហ៊ុនCP Allនេះ ធ្វើឡើងបន្ទាប់ពី ថ្មីៗនេះ មានសារព័ត៌មានក្នុងស្រុកនៃប្រទេសថៃ គឺ The Nation Thailand បានចុះផ្សាយដោយស្រង់សម្តីរបស់ថ្នាក់ដឹកនាំជាន់ខ្ពស់ក្រុមហ៊ុន CP All បានឲ្យដឹងថា ក្រុមហ៊ុននឹងផ្អាកផែនការពង្រីកសាខា 7-Eleven នៅក្នុងប្រទេសកម្ពុជា និងឡាវ ក្រោមហេតុផលកូវីដ-១៩។
តាមសេចក្ដីថ្លែងការណ៍របស់ CP All បានបញ្ជាក់ថា «យោងតាមព័ត៌មានអំពីការពង្រីកហាង 7-Eleven នៅក្នុងព្រះរាជាណាចក្រកម្ពុជា និងប្រទេសឡាវ ក្រុមហ៊ុនCP All Public Company Limited ដែលមានសិទ្ធិផ្ដាច់មុខក្នុងការបើកនិងដំណើរការហាង7-Eleven នៅក្នុងប្រទេសទាំងពីរបានបញ្ជាក់ថា ទោះបីជាស្ថានភាពនៃការផ្ទុះឡើងនៃជំងឺកូវីដ-១៩មានផលប៉ះពាល់ខ្លះក៏ពិតមែន។ ក្រុមហ៊ុននៅតែបន្ដរៀបចំ និងត្រៀមបើកសាខាទៅតាមផែនការ»។
អត្ថបទទាក់ទង!
យោងតាម សេចក្ដីថ្លែងការណ៍មួយ របស់ក្រុមហ៊ុន CP All បានឲ្យដឹងថា បញ្ហាកូវីដ-១៩ ពិតជាបានបង្កឲ្យមានផលប៉ះពាល់ខ្លះ ប៉ុន្ដែ ទោះយ៉ាងណា ក្រុមហ៊ុននៅតែបន្ដឆ្ពោះទៅមុខ តាមអ្វីដែលជាផែនការរបស់ខ្លួនក្នុងការបើកសាខាហាង 7-Eleven នៅក្នុងប្រទេសកម្ពុជា និងប្រទេសឡាវដដែល។
សូមបញ្ជាក់ថា កាលពីខែឧសភាកន្លងទៅ ក្រុមហ៊ុន CP All ថៃ ធ្លាប់បានប្រកាសពីផែនការពង្រីកសាខា 7-Eeven នៅកម្ពុជានៅឆ្នាំ២០២១ខាងមុខ និងរំពឹងថា អាចពង្រីកសាខានៅកម្ពុជាដល់ទៅ ៧០០ ទៅ ១.០០០ សាខាក្នុងរយៈពេល៥ឆ្នាំ ហើយសាខាដំបូងរបស់ក្រុមហ៊ុនគ្រោងបើកដំណើរនៅកម្ពុជា គឺនៅរាជធានីភ្នំពេញ៕
ក្រុមហ៊ុន CP All (Cambodia) និង CP All (Laos) បានទទួលសិទ្ធិអាជីវកម្មFranchise លើយីហោហាងលក់ទំនិញ 7-Eleven សម្រាប់ការបើកដំណើរការ និងប្រតិបត្តិការ រយៈពេល ៣០ឆ្នាំ។
បច្ចុប្បន្ន ហាង 7-Eleven នៅក្នុងប្រទេសថៃ សរុបមានដល់ទៅជាង១ម៉ឺន ២ពាន់សាខា ហើយនៅឆ្នាំនេះ ក្រុមហ៊ុនមានគម្រោងពង្រីកបន្ថែម ៧០០សាខាទៀត ក្នុងនោះ មានជាង៥១៣ សាខាបានបើករួចហើយគិតត្រឹមខែកញ្ញាកន្លងទៅនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
