រដ្ឋមន្ត្រីក្រសួងសេដ្ឋកិច្ចជប៉ុន លោក យ៉ាស៊ូតូហ្ស៊ី នីហ្ស៊ីម៉ូរា បានប្រាប់ទៅកាន់អ្នកសារព័ត៌មានថា លោកបានស្វាគមន៍ចំពោះដំណើរការចូលរួមរបស់អង់គ្លេសនេះ នៅក្រោយពេលមានកិច្ចប្រជុំតាមអនឡាញមួយរវាងរដ្ឋមន្ត្រីមកពីប្រទេសចំនួន១១ ក្នុងសប្ដាហ៍នេះ។
លោក នីហ្ស៊ីម៉ូរ៉ា បន្ថែមថា វត្តមានរបស់អង់គ្លេសនៅក្នុងកិច្ចព្រមព្រៀង CP TPP នឹងនាំមកនូវទំហំផលិតផលក្នុងស្រុកសរុប ដែលគ្រប់ដណ្ដប់ដោយកិច្ចព្រមព្រៀងនេះ គឺមានស្ទើរតែជិតប្រហែលទៅនឹងសហភាពអឺរ៉ុបដែរ។
នៅក្នុងសេចក្ដីថ្លែងការណ៍ សមាជិក១១ប្រទេស នៃកិច្ចព្រមព្រៀង CP TPP បាននិយាយថា ការចាប់ផ្ដើមនៃដំណើរការចូលរួមជាសមាជិករបស់អង់គ្លេស និងការពង្រីកសក្ដានុពលនៃកិច្ចព្រមព្រៀង CP TPP នឹងបញ្ជូនជាសញ្ញាដ៏ខ្លាំងក្លាមួយ ទៅកាន់ដៃគូពាណិជ្ជកម្មរបស់ពួកគេនៅទូទាំងសកលលោក។
អត្ថបទទាក់ទង
គួររំឭកថា អង់គ្លេសបានធ្វើសំណើរផ្លូវការដើម្បីចូលរួមក្នុងកិច្ចព្រមព្រៀង CP TPP តាំងពីខែកុម្ភៈមកម្ល៉េះ ខណៈដែលប្រទេសនេះ បានព្យាយាមបើកផ្លូវថ្មី និងបង្កើនឥទ្ធិពលនៅក្រោយពេលចាកចេញពីសហភាពអឺរ៉ុប។
កិច្ចព្រមព្រៀង CP TPP ត្រូវបានគេដឹងថាមានការលុបចោលពន្ធគយដល់ទៅ ៩៥% លើមុខទំនិញនាំចេញនាំចូលរវាងប្រទេសជាសមាជិកទាំង១១ រួមមាន ជប៉ុន, កាណាដា, អូស្ត្រាលី, វៀតណាម, ណូវេសេឡង់, សិង្ហបុរី, ម៉ិកស៊ីកូ, ប៉េរូ, ប្រុយណេ, ឈីលី និងម៉ាឡេស៊ី ជាដើម។
កាលពីខែតុលាឆ្នាំមុននេះ អង់គ្លេស និងជប៉ុន ក៏ទើបតែបានចុះហត្ថលេខាលើកិច្ចព្រមព្រៀងពាណិជ្ជកម្មជាមួយគ្នាដែរ ដែលវាគឺជាកិច្ចព្រមព្រៀងដ៏ធំដំបូងគេមួយ ដែលអង់គ្លេសបានធ្វើបន្ទាប់ពីចាកចេញពីហភាពអឺរ៉ុប។
សូមបញ្ជាក់ថា កិច្ចព្រមព្រៀង CP TPP បានចូលជាធរមានជាផ្លូវការ កាលពីថ្ងៃទី ៣០ ខែធ្នូ ឆ្នាំ២០១៨ត្រូវបានគេដឹងថា ដោយទំហំ GDP សរុបនៃប្រទេសជាសមាជិកទាំងអស់មានប្រមាណជាង ១៣% នៃសេដ្ឋកិច្ចសកល ឬស្មើនឹងទំហំទឹកប្រាក់ប្រមាណជាង ១០ទ្រីលានដុល្លារអាមេរិក និងមានប្រជាជនសរុបជិត ៥០០លាននាក់៕
None
