អង់គ្លេសផលិតនាវាមុជទឹក ដើម្បីទប់ទល់នឹងប្រទេសចិន នៅក្នុងតំបន់អាស៊ីប៉ាស៊ីហ្វិក

កិច្ចព្រមព្រៀងរបស់ចក្រភពអង់គ្លេស ដែលពាក់ព័ន្ធនឹងក្រុមហ៊ុនអង់គ្លេស ចំនួន៣គឺក្រុមហ៊ុន BAE Systems ក្រុមហ៊ុន Rolls-Royce និងក្រុមហ៊ុន Babcock ដែលជាផ្នែកមួយនៃសម្ព័ន្ធមិត្តយោធា AUKUS រវាងសហរដ្ឋអាមេរិក អូស្ត្រាលី និងចក្រភពអង់គ្លេស ដើម្បីទប់ទល់នឹងប្រទេសចិននៅក្នុងតំបន់អាស៊ីប៉ាស៊ីហ្វិក។

រដ្ឋមន្ត្រីការពារជាតិអង់គ្លេសលោក ក្រាន សាប (Grant Shapps) បាននិយាយនៅក្នុងសន្និសីទប្រចាំឆ្នាំរបស់គណបក្សអភិរក្ស នៅក្នុងទីក្រុងម៉េនឆេស្ទឺ (Manchester) កាលពីថ្ងៃអាទិត្យ ទី១ ខែតុលា ថា នាវាមុជទឹកនេះនឹងផ្តល់អំណាចដល់កងទ័ពជើងទឹករបស់អង់គ្លេស ដើម្បីរក្សាបាននូវអត្ថប្រយោជន៍ជាយុទ្ធសាស្ត្ររបស់ចក្រអង់គ្លេសនៅក្រោមសមុទ្រ។

ក្រុមមេដឹកនាំសម្ពន្ធមិត្ត AUKUS បានបង្ហាញគម្រោងនាវាមុជទឹករួមគ្នានេះ កាលពីខែមីនា ឆ្នាំមុននៅក្នុងកិច្ចព្រមព្រៀងមួយ ដែលនឹងធ្វើឱ្យប្រទេសអូស្ត្រាលី អាចជំនួសនាវាមុជទឹកដើរ ដោយថាមពលប្រេងម៉ាស៊ូតរបស់ខ្លួនជាមួយនឹងនាវាមុជទឹកដើរដោយថាមពលនុយក្លេអ៊ែ ដែលបំបាំងកាយ និងធ្វើដំណើរបានកាន់តែឆ្ងាយជាងមុន។

ផែនការនេះមានការពាក់ព័ន្ធនឹងអូស្ត្រាលី ដែលទិញនាវាមុជទឹកដើរដោយថាមពលនុយក្លេអ៊ែរបស់អាមេរិក ហើយបន្ទាប់មកបង្កើតគំរូថ្មីមួយបំពាក់ដោយបច្ចេកវិទ្យាអាមេរិក និងអង់គ្លេស។ នាយករដ្ឋ​មន្ត្រីអង់គ្លេសលោក រីស៊ី ស៊ូណាក់ បានសរសើរថា វាជា«កិច្ចព្រមព្រៀងការពារពហុភាគីដ៏សំខាន់បំផុតសម្រាប់ច្រើនជំនាន់។

នៅក្នុងសេចក្តីថ្លែងការណ៍ដាច់ដោយឡែកមួយ ក្រុមហ៊ុន BAE Systems បាននិយាយថា នាពេលអនាគតនាវាមុជទឹក SSN-AUKUS នឹងក្លាយជានាវាមុជទឹកដ៏ធំបំផុតប្រកបដោយថាមពលខ្លាំងបំផុត និងទំនើបបំផុត ដើម្បីផ្គត់ផ្គង់ដល់កងនាវាចររបស់ចក្រភពអង់គ្លេស។

ក្រុមហ៊ុនផលិតឧបករណ៍យោធារបស់អង់គ្លេសមួយនេះបាននិយាយថា ការវិនិយោគនេះនឹង​គ្រប​ដណ្តប់លើការងារផលិតរហូតដល់ឆ្នាំ២០២៨​ និង​ត្រូវការជ្រើសរើសមនុស្សជាង៥ពាន់នាក់ ដើម្បីបំពេញការងារនេះ​ នៅឯទីតាំងផលិតរបស់ខ្លួនមួយស្ថិតនៅភាគខាងជើងនៃប្រទេសអង់គ្លេស។

គំរូដំបូងនៃនាវាមុជទឹកនេះនឹងប្រគល់ជូនរដ្ឋាភិបាលអង់គ្លេស នៅចុងទសវត្សរ៍ឆ្នាំ២០៣០។ នាវាមុជទឹកដើរដោយថាមពលនុយក្លេអ៊ែនេះ ពិបាកនឹងរកឃើញនៅតាមប្រព័ន្ធរ៉ាដា ហើយវាអាចធ្វើដំណើរបានចម្ងាយឆ្ងាយ និងអាចផ្ទុកកាំជ្រួចមីស៊ីលទំនើបៗផងដែរ៕

អត្ថបទ៖ សុខ ជា