លោក វីឆៃ ផូឆាណាគីត នាយកប្រតិបត្តិនៃនាយកដ្ឋានពាណិជ្ជកម្មផ្ទៃក្នុងថៃ បានគូសបញ្ជាក់ថា បើតាមការសិក្សា តម្លៃនៃផលិតផលកសិកម្ម នឹងឡើងថ្លៃ ជាពិសេស អង្ករម្លិះ ដែលនឹងមានស្ថិរភាពថ្លៃនៅកម្រិតមួយខ្ពស់ ចន្លោះពី ៤៦០ដុល្លារ ទៅ ៥០០ដុល្លារអាមេរិក ក្នុងមួយតោន។
រីឯ អង្ករដំណើប វិញក៏មានតម្លៃប្រមាណ ៤៦០ដុល្លារ ក្នុងមួយតោន ដោយសារតែផលិតកម្មអង្ករស្រូវប្រាំងត្រូវបានបំផ្លាញសឹងតែពាក់កណ្តាលទៅហើយ ដែលពីមុនប្រមូលផលស្រូវបាន ៨លានតោន តែឥឡូវបានត្រឹមតែ ៣លាន ទៅ ៤លានតោនប៉ុណ្ណោះ។
ដោយឡែក បន្លែស្រស់ជាច្រើនប្រភេទ ដែលត្រូវការប្រើប្រាស់ ទឹកច្រើន នឹងឡើងថ្លៃដូចគ្នាដែរ ហើយនាយកដ្ឋានពាណិជ្ជកម្មផ្ទៃក្នុងថៃ ក៏បានស្នើឲ្យមានការដាំដុះ ប្រភេទបន្លែផ្សេង ដែលប្រើប្រាស់ទឹកតិច និងអាចជំនួសគ្នាបាន។
អត្ថបទទាក់ទង!
សូម្បីតែ តម្លៃសាច់ជ្រូកនៅក្នុងប្រទេសថៃ ដែលទាបជាងគេក្នុងតំបន់ ក៏អាចឡើងថ្លៃដែរ ដោយសារតែ អាកាសធាតុក្តៅ នឹងប៉ះពាល់ដល់ការលូតលាស់របស់សត្វជ្រូក គួបផ្សំនឹងការផ្ទុះជម្ងឺប៉េស្តជ្រូកក្នុងតំបន់ ដែលធ្វើឲ្យតម្លៃជ្រូករស់ ក្នុងប្រទេសចិនកើនដល់ជាង ៦ដុល្លារ ក្នុងមួយគីឡូក្រាម នៅវៀតណាមមានតម្លៃជាង ៤ដុល្លារ ខណៈដែរ តម្លៃជ្រូករស់នៅថៃ មិនលើសពី ៧៥បាត ឬជាង ២ដុល្លារអាមេរិកនោះឡើយ។
នាយកដ្ឋានពាណិជ្ជកម្មផ្ទៃក្នុងថៃ ក៏បានប្រឹក្សាយោបល់ជាមួយ សមាគមចិញ្ចឹមជ្រូកថ្នាក់ជាតិ ដោយបានសម្រេចថា បើសិនតម្លៃជ្រូករស់ លើសពី ៨០បាត ក្នុងមួយគីឡូក្រាម រាជរដ្ឋាភិបាល នឹងចាត់វិធានការកំណត់លើការនាំចូល ដោយធានាឲ្យបានថា នឹងមានសាច់ជ្រូកប្រើប្រាស់ក្នុងស្រុក បានគ្រប់គ្រាន់ ហើយតម្លៃមិនកើនឡើងខ្ពស់ពេក។
សូមជម្រាបដែរថា ដោយសារតែគ្រោះរាំងស្ងួតនេះ សូម្បីតែតម្លៃទឹកបរិសុទ្ធ សម្រាប់ប្រើប្រាស់ប្រចាំថ្ងៃ ក៏មានការកើនឡើងផងដែរ តែយ៉ាងណាក៏ដោយ រាជរដ្ឋាភិបាលថៃ ក៏មានវិធានការបង្ការទុកមុនរួចជាស្រេច បើសិនជាមានបញ្ហាធ្ងន់ធ្ងរណា អាចកើតមានឡើងក្នុងចន្លោះពេលនេះ៕
None
