ហេតុអ្វី អឺរ៉ុបនឹងបើកជើងមេឃ ទទួលពលរដ្ឋអាមេរិក ដែលបានចាក់វ៉ាក់សាំងរួច?

ប្រធានសហភាពអឺរ៉ុបគឺ លោកស្រី អ៊ូស៊ូឡា វ៉ុនឌឺលីយ៉ែន បានប្រាប់សារព័ត៌មានអាមេរិក The New York Times ថា សមាជិកទាំង២៧ប្រទេសនៃសហភាពអឺរ៉ុប នឹងទទួលយករាល់ភ្ញៀវទេសចរ និងពលរដ្ឋមកពីជុំវិញពិភពលោក ដែលបានចាក់វ៉ាក់សាំង ដែលទទួលស្គាល់ដោយភ្នាក់ងារឱសថអឺរ៉ុបរួច ដើម្បីបានចូលមកទឹកដីអឺរ៉ុបបានឡើងវិញ។ ។

លោកស្រីបញ្ជាក់ថា អឺរ៉ុបមិនមែនទទួលយកតែពលរដ្ឋអាមេរិកនោះទេ ប៉ុន្តែការអនុញ្ញាតឲ្យពលរដ្ឋអាមេរិកបានចូលមកអឺរ៉ុបនៅមុនរដូវក្តៅនេះ គឺដោយហេតុថា អាមេរិកបានប្រើប្រាស់វ៉ាក់សាំងទាំង ៣ប្រភេទដែលភ្នាក់ងារឱសថអឺរ៉ុបបានទទួលស្គាល់ ដូចជាវ៉ាក់សាំង Moderna Pfizer និង Johnson&Johnson។

លើសពីនេះ លោកស្រីប្រធានសហភាពអឺរ៉ុបរូបនេះ បានគូសបញ្ជាក់ពីស្ថានការណ៍ប្រសើរឡើងនៅអាមេរិក ដោយហេតុថា ករណីឆ្លងក៏មានការថយចុះ ចំណែកឯកម្មវិធីចាក់វ៉ាក់សាំងក៏មានដំណើរការល្អផងដែរនៅអាមេរិក ដោយប្រទេសនេះ នឹងសម្រេចបានការចាក់វ៉ាក់សាំងដល់ពលរដ្ឋពេញវ័យក្នុងចំនួន៧០% ត្រឹមពាក់កណ្តាលខែមិថុនានេះ។ លោកស្រីសង្ឃឹមថា ស្ថានការណ៍នៅអឺរ៉ុបក៏អាចនឹងប្រសើរឡើងដូចគ្នាដែរ។

យ៉ាងណាក៏ដោយ អឺរ៉ុបមិនកំណត់កាលបរិច្ឆេទច្បាស់លាស់ នៃការបើកជើងហោះហើរចូលទឹកដីអឺរ៉ុបវិញនោះទេ ក្រៅតែពីបង្ហើបថា នឹងបើកនៅមុនរដូវក្តៅឆ្នាំនេះ។

រដូវក្តៅនៅតំបន់អឺរ៉ុប ក្នុងឆ្នាំនេះនឹងចាប់ផ្តើមពីថ្ងៃពាក់កណ្តាលខែមិថុនា ដល់ពាក់កណ្តាលខែកញ្ញាឆ្នាំ ២០២១នេះ។

សូមជម្រាបថា ប្រទេសនៅអឺរ៉ុបធ្លាប់ព្រមព្រៀងគ្នា ថានឹងផ្តើអនុវត្តកម្មវិធីលិខិតឆ្លងដែនវ៉ាក់សាំងនៅក្នុងខែនេះ ដែលវានឹងអនុញ្ញាតឲ្យពលរដ្ឋណាដែលបានចាក់វ៉ាក់សាំងរួច ឬមានលិខិតបញ្ជាក់ថា បានជាពីជំងឺកូវីដ ឬបញ្ជាក់ថាអវិជ្ជមានកូវីដ-១៩ ចូលមកអឺរ៉ុបនឹងធ្វើដំណើរបានងាយស្រួល។ ប៉ុន្តែប្រការនេះពុំទាន់ឃើញមានការអនុវត្ត ឬកំណត់ផែនការណាមួយច្បាស់លាស់ និងជាផ្លូវការនៅឡើយទេ៕