រមណីយដ្ឋានទូទាំងប្រទេសអាច បើកដំណើរការឡើងវិញ តែត្រូវកំណត់ចំនួនទេសចរ និងអនុវត្តវិធានការការពារកូវីដ-១៩

ឯកឧត្តម តុប សុភ័ក អ្នកនាំពាក្យក្រសួងទេសចរណ៍យល់ឃើញថា ការសម្រេចរបស់រាជរដ្ឋាភិបាលក្នុងការអនុញ្ញាតបើកឲ្យធ្វើចរាចរណ៍ឆ្លងខេត្ត និងបើកតំបន់រមណីយដ្ឋានទេសចរណ៍ទូទាំងប្រទេសឡើងវិញ គឺជាកត្តារួមចំណែកមួយក្នុងការជួយស្តារវិស័យទេសចរណ៍ ដែលរងផលប៉ះពាល់ខ្លាំងដោយសារការរាតត្បាតនៃជំងឺកូវីដ-១៩។ ប៉ុន្តែវាអាចជួយក្នុងកម្រិតតិចតួចប៉ុណ្ណោះ ខណៈតំបន់ទេសចរណ៍ធំៗមួយចំនួននៅតែបន្តបិទទ្វារនៅឡើយដោយសារវិធានការបិទខ្ទប់។

ពាក់ព័ន្ធការបើកឲ្យដំណើរការតំបន់ទេសចរណ៍នេះដែរ លោក ធួន ស៊ីណាន ប្រធានសមាគមទីភ្នាក់ងារទេសចរណ៍អាស៊ីប៉ាស៊ីហ្វិកកម្ពុជាយល់ឃើញស្រដៀងគ្នាថា ការអនុញ្ញាតបើកតំបន់ទេសចរណ៍ឡើងវិញក្នុងអំឡុងនៃវិបត្តិកូវីដ-១៩ វាមិនអាចជួយស្តារឲ្យវិស័យទេសចរណ៍មានភាពល្អប្រសើរនោះទេ។ លោកគូសបញ្ជាក់ថា វាអាចជួយក្នុងកម្រិតតិចតួច និងរយៈពេលខ្លីប៉ុណ្ណោះ។ ផ្ទុយទៅវិញ ការអនុញ្ញាតនេះ ក៏អាចបង្កហានិភ័យក្នុងការចម្លងជំងឺកូវីដ-១៩ នៅតាមតំបន់ទេសចរណ៍ផងដែរ ប្រសិនបើភ្ញៀវទេសចរ និងតំបន់ទេសចរណ៍មានការធ្វេសប្រហែសពាក់ព័ន្ធនឹងវិធានការពារកូវីដ-១៩ ដែលបានដាក់ចេញដោយរាជរដ្ឋាភិបាល ក៏ដូចជាក្រសួងសុខាភិបាល។ 

បើតាមឯកឧត្តម តុប សុភ័ក នៅព្រឹកថ្ងៃទី២៦ ខែមេសា ក្រសួងទេសចរណ៍បានបើកកិច្ចប្រជុំតាមប្រព័ន្ធវីដេអូ ដើម្បីពិភាក្សាគ្នាពាក់ព័ន្ធបញ្ហាការបើកតំបន់រមណីយដ្ឋានទេសចរណ៍នេះ។ ក្នុងនោះកិច្ចប្រជុំនោះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានជំរុញឲ្យមន្ទីរទេសចរណ៍គ្រប់រាជធានី-ខេត្ត សហការជាមួយរដ្ឋបាល និងមន្ត្រីពាក់ព័ន្ធចុះអប់រំ និងណែនាំនៅតាមគោលដៅទេសចរណ៍ ពីវិធានការការពារជំងឺកូវីដ-១៩ឲ្យបានខ្ជាប់ខ្ជួន។

បើតាមសារាចរណ៍ណែនាំរបស់ក្រសួងទេសចរណ៍ គឺតម្រូវឲ្យគ្រប់គោលដៅទេសចរណ៍ ដែលបើកដំណើរការឡើងវិញនេះ ត្រូវមានម៉ាស៊ីនវាស់កម្តៅ អាល់កុល ឬជែលសម្រាប់លាងដៃ អនុវត្តវិធានការរក្សាគម្លាតសុវត្ថិភាពសង្គម និងកំណត់ចំនួនភ្ញៀវទេសចរឲ្យបានជាក់លាក់ជាដើម។ ជាពិសេស មិនត្រូវអនុញ្ញាតឲ្យភ្ញៀវទេសចរ ដែលរស់នៅក្នុងតំបន់ដែលមានការឆ្លងជំងឺកូវីដ-១៩ រាលដាលខ្លាំងចូលទៅកម្សាន្តនៅតាមតំបន់ទេសចរណ៍នោះឡើយ។ បន្ថែមលើនេះ ក្រសួងក៏បានប្រមានចាត់វិធានការចំពោះតំបន់រមណីយដ្ឋានទេសចរណ៍ណា ដែលមិនអនុវត្តវិធានការការពារជំងឺកូវីដ-១៩ ផងដែរ៕