នៅក្នុងសញ្ញាកើនឡើងនៃដាក់សម្ពាធលើការផ្គត់ផ្គង់អាហារ និងបញ្ហាតម្លៃទំនិញកើនឡើង ប្រភពរដ្ឋាភិបាលមួយចំនួនបានលើកឡើងថា ប្រទេសមួយចំនួនចាប់ផ្ដើមចាត់វិធានការរឹតបន្ដឹងលើការនាំចេញស្បៀងអាហារសំខាន់ៗរបស់ខ្លួន ដូចជាប្រទេសឥណ្ឌាអាចនឹងរឹតបន្តឹងការនាំចេញស្ករសជាលើកដំបូងរបស់ខ្លួនផងដែរ ក្នុងរយៈពេលប្រាំមួយឆ្នាំចុងក្រោយ ដើម្បីទប់ស្គាត់ការកើនឡើងនៃតម្លៃក្នុងស្រុកជាដើម។
អ្នកស្រីហ្គីតា ហ្កូភីណាថ (Gita Gopinath) អគ្គនាយករងទីមួយនៃមូលនិធិរូបិយវត្ថុអន្តរជាតិបានប្រាប់ថាការកើនឡើងនៃអសន្តិសុខស្បៀងអាហារ វាជាបញ្ហាចម្បង ដែលយើងត្រូវដោះស្រាយនៅចំពោះមុខ និងអាកខានមិនបានឡើយ។
អត្ថបទគួរអាន
លើសពីនេះទៅទៀត វិធានការគាំពារនិយរបស់ប្រទេសមួយចំនួន ត្រូវបានលើកយកមកពិភាក្សាយ៉ាងផុសផុលក្នុងវេទិកាសេដ្ឋកិច្ចពិភពលោកនៅទីក្រុងដាវ៉ូសប្រទេសស្វីស ហើយក្រុមអ្នកជំនាញ បានអំពាវនាវឱ្យមានការចរចាជាបន្ទាន់ ដើម្បីជៀសវាងការផ្ទុះកើតមានសង្គ្រាមពាណិជ្ជកម្មពាសពេញពិភពលោក ដោយសារតែវិធានការគាំពារនិយមនេះ។
អ្នកស្រី Gopinath បាននិយាយទៀតថា សម្រាប់អ្នករស់នៅក្នុងប្រទេសនៅក្នុងតំបន់សាហារ៉ា-អាហ្រ្វិក ៤០% នៃការប្រើប្រាស់របស់ពួកគេត្រូវបានចំណាយលើស្បៀងអាហារ ហើយវានឹងប៉ះពាល់យ៉ាងខ្លាំងចំពោះការរស់នៅ និងថ្លៃចំណាយផ្សេងៗទៀត ដោយវិបត្តិសាកលមួយនេះ។
លោកដេវីដ បៀស្លី (David Beasley) នាយកប្រតិបត្តិនៃកម្មវិធីស្បៀងអាហារពិភពលោករបស់អង្គការសហប្រជាជាតិបាននិយាយថា "ពិភពលោកបាននិងកំពុងប្រឈមមុខនឹងវិបត្តិម្ហូបអាហារដ៏អាក្រក់ ក្រោយពេលសង្គ្រាមអ៊ុយក្រែនចាប់ផ្តើម ដែលធ្វើឲ្យ តម្លៃម្ហូបអាហារ តម្លៃទំនិញ ថ្លៃដឹកជញ្ជូនបានកើនឡើងទ្វេដង។ លោកបានប្រាប់ទៀតថា ភាពអត់ឃ្លានជាសាកលបានកើនឡើងពី ៨០ លាននាក់ដល់ ២៧៦ លាននាក់ក្នុងរយៈពេល ៤ ទៅ ៥ ឆ្នាំចុងក្រោយនេះ។
លោកបានមានប្រសាសន៍ថា "ការនៅតែបន្តបិទកំពង់ផែប្រទេសអ៊ុយក្រែន ដោយកងទ័ពរុស្សីនោះ វាមានន័យថា ជាការប្រកាសសង្រ្គាមលើការផ្គត់ផ្គង់ស្បៀងអាហារពិភពលោក ខណៈដែលរដូវប្រមូលផលស្រូវសាលីនឹងមកដល់ឆាប់ៗខាងមុននេះ ។
គួររំលឹកថា ការលុកលុយរបស់រុស្ស៊ីលើអ៊ុយក្រែន ដែលទីក្រុងមូស្គូប្រកាសតែខ្លួនឯងថាជា "ប្រតិបត្តិការយោធាពិសេស" នោះ បាននាំឱ្យកើតមានវិបត្តិស្បៀងអាហារយ៉ាងធ្ងន់ធ្ងរ តែមួយប៉ប្រិចភ្នែក ដ្បិតថា ប្រទេសអ៊ុយក្រែន និងរុស្ស៊ី គឺជាប្រទេសផលិត និងផ្គត់ផ្គង់ស្បៀងអាហារដ៏ធំបំផុតរបស់ពិភពលោក៕
អត្ថបទ: ហ៊ុន គន្ធថៃ
None
