លោកស្រី ឆាយ ស៊ីវលីន ប្រធានសមាគមទីភ្នាក់ងារទេចរណ៍កម្ពុជាបានគូសបញ្ជាក់ថា ប្រសិនបើនៅចុងឆ្នាំ២០២០នេះវ៉ាក់សាំងបង្កាជំងឺកូវីដ ១៩ ត្រូវបានចេញដាក់ឲ្យប្រើប្រាស់ ទើបស្ថានភាពវិស័យទេសចរណ៍នៅកម្ពុជាអាចនឹងត្រឡប់មករកសភាពដើមវិញបាននៅអំឡុងពេលយ៉ាងតិច ៣ ទៅ៥ឆ្នាំ និងអាចលើសពីនេះបើវ៉ាក់បន្តរហូតដល់ចុងឆ្នាំ២០២១។
លោកស្រីបន្ថែមថា ស្ថិតស្ថានភាពនេះ ភ្ញៀវទេសចរជាតិ និងអន្តរជាតិភាគច្រើនត្រូវខ្លាចរអា និងបាក់ស្មារតីគ្រប់ៗគ្នាដោយមិនចង់ធ្វើដំណើរកម្សាន្ដទៅកន្លែងណាភ្លាមៗនោះឡើយ ដោយម្នាក់ៗនៅបារម្ភអំពីបញ្ហាសុខភាព ដូច្នេះ ស្ថានភាពនេះ ក៏ត្រូវទាមទារពេលវេលាយូរទៅមុខទៀតដែរ ខណៈនៅប្រទេសផ្សេងៗទៀត បើទោះបីជា មានវ៉ាក់សាំងក៏ពិតមែនក៏មិនមានន័យថា វ៉ាក់សាំងនោះប្រើប្រាស់បានភ្លាមៗនោះដែរ។
អត្ថបទទាក់ទង
លោកស្រី អះអាងទៀតថា កម្ពុជាយើងមិនអាចពឹងតែភ្ញៀវក្នុងស្រុកដើម្បីជួយគាំទ្រដល់សេដ្ឋកិច្ចនោះបានឡើយ ខណៈការចេញដើររបស់ភ្ញៀវក្នុងស្រុកនៅមានកម្រិត ដែលភាគច្រើននៃការធ្វើដំណើរកម្សាន្ដរបស់ពួកគាត់មានតែនៅតាមតំបន់ទេសចរណ៍ តែនៅរដូវកាលបុណ្យទានតែប៉ុណ្ណោះ។
ជាមួយគ្នានេះដែរ លោក ហូ វណ្ណឌី សហប្រធានការងារវិស័យទេសចរណ៍ និងជាអគ្គនាយកក្រុមហ៊ុនភ្នាក់ងារទេចរណ៍ វើល អ៊ិចប្រេស បានឲ្យដឹងដែរថា បច្ចុប្បន្នអ្នកដែលរងគ្រោះធំជាងគេបំផុតនៅក្នុងវិស័យទេសចរណ៍នេះគឺក្រុមហ៊ុនអាកាសចរណ៍ និងបន្ទាប់មកមានក្រុមហ៊ុនវិនិយោគកន្លែងស្នាក់នៅសម្រាប់ភ្ញៀវ ក្រុមហ៊ុនដឹកជញ្ជូន ក្រុមហ៊ុនទីភ្នាក់ងារទេសចរណ៍ជាដើម ហើយក្នុងអំឡុងពេលនេះ ខេត្តដែលរងផលប៉ះពាល់ខ្លាំងជាងគេគឺខេត្តសៀមរាប។ លោកបន្តថាបើទោះបីវ៉ាក់សាំងមានក៏ដោយចុះ ក៏ត្រូវការពេលវេលាពី ៥ទៅ៧ឆ្នាំ ដើម្បីស្តារស្ថានភាពនេះ នឹងត្រលប់មកភាពដើមឡើងវិញ។
របាយការណ៍ក្រសួងទេសចរណ៍ ក្នុងរយៈពេល៩ខែ ឆ្នាំ២០២០ ទេសចរអន្តរជាតិមកទស្សនាកម្ពុជាមានត្រឹមតែជា ១លាន២សែននាក់ ថយចុះជាង ៧៤ភាគរយ និងភ្ញៀវទេសចរក្នុងស្រុកមានជាង ៧លាន២សែននាក់ ថយចុះជិត៥២ភាគរយ ដែលការថយចុះនេះ គឺដោយសាររងផលប៉ះពាល់ខ្លាំងពីវិបត្តិជំងឺកូវីដ-១៩៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
