លោក វន សាវឿន អ្នកដាំម្រេច នៅខេត្តត្បូងឃ្មុំ បានកត់សម្គាល់ឃើញថា នៅដើមឆ្នាំ២០២២ ទីផ្សារម្រេច មានតម្លៃ ១ម៉ឺន៦ពាន់រៀល ក្នុង១គីឡូក្រាម ក៏ប៉ុន្តែ ក្រោយមកតម្លៃម្រេចក៏បានធ្លាក់ចុះតិចតួចមកនៅត្រឹម ១ម៉ឺន៥ពាន់រៀល ចាប់ពីមានការផ្ទុះឡើងនៃរវាងរុស្សី និងអ៊ុយក្រែន។ ដ្បិតថា ភាគច្រើននៃម្រេចរបស់កសិករខេត្តត្បូងឃ្មុំ បាននាំចេញទៅប្រទេសវៀតណាម តែកសិកររូបនេះ បានគូសបញ្ជាក់ថា កាលណាប្រទេសវៀតណាម មានបញ្ហាក្នុងការនាំចេញម្រេច នោះវាក៏អាចប៉ះពាល់ដល់ទីផ្សារម្រេចកម្ពុជា ខ្លះៗដែរ។ បើតាមកសិករខេត្តត្បូងឃ្មុំ លោក វន សាវឿន បញ្ហាសង្គ្រាមអ៊ុយក្រែន ហាក់មិនមែនជាឧបសគ្គធំឡើយ សម្រាប់ការនាំចេញម្រេច ហើយលោកក៏បានបង្ហាញនូវក្ដីសង្ឃឹមដែរថា ឆ្នាំ២០២២នេះ ទីផ្សារម្រេចនឹងកាន់តែប្រសើរ ព្រោះតម្រូវការទីផ្សារកាន់តែទូលាយ។
ជាធម្មតាចាប់ពីខែមីនា គឺជារដូវនៃការប្រមូលផលម្រេច ក៏ប៉ុន្តែ ដោយសារជួបបញ្ហាអាកាសធាតុ ការប្រមូលផលម្រេចនៅក្នុងខេត្តត្បូងឃ្មុំ ហាក់មានភាពយឺតយ៉ាវបន្តិច តែវាមិនបានក្លាយជាបញ្ហាធ្ងន់ធ្ងរឡើយ។ ប៉ុន្ដែអ្វី ដែលកសិករខេត្តត្បូងឃ្មុំ លោក វន សារឿន មានការព្រួយបារម្ភនោះគឺបញ្ហាអាកាសធាតុ ពិសេសការខ្វះខាតទឹកប្រើប្រាស់សម្រាប់ស្រោចស្រព និងបញ្ហាតម្លៃប្រេងឡើងថ្លៃ ដែលធ្វើឲ្យកសិករត្រូវចំណាយថ្លៃដើមខ្ពស់។ មួយវិញទៀត ការអូសបន្លាយនៃវិបត្តិសង្គ្រាមរវាងរុស្សី និងអ៊ុយក្រែន ក៏អាចនឹងធ្វើឲ្យទីផ្សារម្រេច គ្មានស្ថិរភាពផងដែរ។
អត្ថបទគួរអាន
ដោយឡែក លោក ងួន ឡាយ ប្រធានសមាគមម្រេចកំពត បានគូសបញ្ជាក់ថា រយៈពេល២ខែដំបូង ឆ្នាំនេះ ទាំងទីផ្សារម្រេចកំពត និងបរិមាណនៃការនាំចេញ មិនមានភាពខុសគ្នានឹងឆ្នាំមុននោះទេ សមាគមនៅតែបាន ចុះកុងត្រា ជាមួយនឹងក្រុមហ៊ុននាំចេញ។ បើតាមប្រធានសមាគមរូបនេះ រយៈពេល២ខែនេះ សមាគមបាននាំចេញម្រេចកំពត ក្នុងបរិមាណ៦តោន ទៅកាន់ទីផ្សារអឺរ៉ុប ដោយក្នុងនោះ សម្រាប់ម្រេចខ្មៅ មានតម្លៃ ១៥ដុល្លារ ក្នុង១គីឡូក្រាម។ រីឯ ម្រេចក្រហម មានតម្លៃ ២៥ដុល្លារ ក្នុង១គីឡូក្រាម។ ចំណែកឯ ម្រេចសវិញ មានតម្លៃ ២៥ដុល្លារ ទៅ២៨ដុល្លារ ក្នុង១គីឡូក្រាម។ យ៉ាងណាក៏ដោយ សម្រាប់ស្ថានភាពនៃការដាំដុះដំណាំម្រេច នាខេត្តកំពតវិញ លោក ងួន ឡាយ បានគូសបញ្ជាក់ថា មិនមានបញ្ហាអ្វីនោះទេ។
ជាមួយគ្នានេះ លោក ហែម ត្រូ កសិករដាំម្រេចមួយរូបទៀត នៅខេត្តកំពត ក៏បានអះអាងដែរថា ទីផ្សារម្រេច នៅដើមឆ្នាំ២០២២នេះ ក៏មិនខុសគ្នានោះដែរពីឆ្នាំមុន។ ទីផ្សារមិនខុសគ្នាក៏ព្រោះតែកសិករដាំម្រេចកំពត បានចងក្រងជាសហគមន៍ និងបានចុះកុងត្រាជាមួយក្រុមហ៊ុននាំចេញស្រាប់ ទើបធ្វឲ្យកសិករមិនបារម្ភពីការឡើងចុះនៃតម្លៃម្រេច។
សូមបញ្ជាក់ថា នៅឆ្នាំ២០២១ កន្លងទៅ កម្ពុជា បាននាំចេញម្រេច ក្នុងបរិមាណ ២ម៉ឺន៨ពាន់តោន ទៅកាន់ទីផ្សារសំខាន់ៗ ដូចជា តំបន់អឺរ៉ុប និងតំបន់អាស៊ាន ជាដើម។ ដោយឡែក នារយៈពេល ២ខែដំបូង ក្នុងឆ្នាំ២០២២នេះ កម្ពុជា បាននាំចេញម្រេច ជាង៩រយតោន ក្នុងចំណោមកសិផល សរុបជាង១លាន៣សែនតោន។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ៕
None
