លទ្ធផលនៃការស្ទង់មតិមួយ ដែលបានចេញផ្សាយដោយវេទិកាសេដ្ឋកិច្ចពិភពលោក បានឲ្យដឹងថា ប្រហែល ១ ភាគ ៤ នៃការងារ ត្រូវបានកំណត់ថានឹងផ្លាស់ប្តូរក្នុងរយៈពេលប្រាំឆ្នាំខាងមុខ។
របាយការណ៍ចង្អុលប្រាប់ថា ការងារថ្មីប្រហែល ៦៩ លាននឹងត្រូវបានបង្កើតឡើង ប៉ុន្តែការងារ ៨៣ លានកន្លែង នឹងត្រូវបាត់បង់នៅត្រឹមឆ្នាំ ២០២៧ ជាហេតុបណ្ដាលឱ្យការងារបច្ចុប្បន្នថយចុះក្នុងអត្រា ២ ភាគរយ។
លទ្ធផលនៃការស្ទង់មតិនេះគឺផ្អែកលើធាតុចូលដែលវេទិកាសេដ្ឋកិច្ចពិភពលោកបានទទួលពីវិស័យឯកជនចំនួន ៨០០ ក្រុមហ៊ុន ដែលបាននិងកំពុងផ្តល់ការងារឱ្យមនុស្សជាង ១១ លាននាក់។ លទ្ធផលខាងលើក៏ផ្អែកលើការប្រើប្រាស់សំណុំទិន្នន័យការងារសរុបចំនួន ៦៧៣ លានកន្លែងដែរ។
សេចក្តីសង្ខេបនៃរបាយការណ៍បានបញ្ជាក់ថា វិស័យបច្ចេកវិទ្យា និងឌីជីថលភាវូបនីយកម្ម ជាកត្តាជំរុញនៃការបង្កើតការងារ និងជាកត្តាបំផ្លាញការងារដែរ។
របាយការណ៍នេះបានសង្កត់ធ្ងន់ថា៖ «ការទទួលយកបច្ចេកវិទ្យា រួមផ្សំនឹងការបង្កើនការធ្វើឌីជីថលភាវូបនីយកម្ម នឹងបង្កឱ្យមានការរង្គោះរង្គើទីផ្សារការងារគួរឱ្យកត់សម្គាល់នាពេលអនាគត។»
ប្រភពដដែលបានអះអាងថា មុខងារដែលនឹងថយចុះលឿនបំផុតគឺផ្នែកលេខាធិការ និងផ្នែករដ្ឋបាល ដូចជាបេឡាករនិងអ្នកគិតលុយនៅតាមធនាគារជាដើម គឺសុទ្ធតែមានហានិភ័យ ដោយសារតែការងារទាំងនោះអាចបំពេញដោយប្រព័ន្ធស្វ័យកម្ម នៅពេលដែលតម្រូវការអ្នកជំនាញវិស្វកម្មតាមប្រព័ន្ធបញ្ញាសិប្បនិម្មិត (AI) និងអ្នកជំនាញផ្នែកសន្តិសុខតាមអ៊ីនធឺណិត ត្រូវបានគេរំពឹងថានឹងកើនឡើងយ៉ាងខ្លាំង៕
