សារព័ត៌មាន First Post បានរាយការណ៍ថា ក្រសួងការពារជាតិចិន បានប្រកាសកាលពីថ្ងៃទី២៩ ខែកញ្ញា ថា មជ្ឈមណ្ឌលទ្រទ្រង់ និងហ្វឹកហ្វឺនរួមចិន-ឡាវ ព្រមទាំងសាលាបណ្តុះបណ្តាលអាកាសចរណ៍មិត្តភាពចិន-ឡាវ បានចាប់ផ្តើមដំណើរការជាផ្លូវការហើយនៅឯព្រលានយន្តហោះ បាន កឿន ស្ថិតនៅចម្ងាយប្រហែល៤៥គីឡូម៉ែត្រពីរដ្ឋធានីវៀងចន្ទន៍។ ភាគីចិន បានអះអាងថា មូលដ្ឋាននេះនឹងផ្តោតសំខាន់លើការលើកកម្ពស់សមត្ថភាព និងការហ្វឹកហ្វឺនអាកាសយានិកនៃកងទ័ពអាកាសឡាវ។
ទោះជាយ៉ាងណា ក្រសួងការពារជាតិចិន មិនបានទម្លាយព័ត៌មានលម្អិតអំពីចំនួនបុគ្គលិកយោធា គ្រឿងបរិក្ខារយុទ្ធភណ្ឌ ឬហេដ្ឋារចនាសម្ព័ន្ធបំពាក់នៅទីនោះឡើយ។ អ្វីដែលគួរឱ្យកត់សម្គាល់នោះ ទីតាំងយុទ្ធសាស្ត្រមួយនេះ ធ្លាប់ជាមូលដ្ឋានប្រតិបត្តិការរបស់កងទ័ពសហរដ្ឋអាម៉េរិក ក្នុងសម័យសង្គ្រាមស៊ីវិលឡាវ និងសង្គ្រាមវៀតណាម ដែលត្រូវបានបោះបង់ចោលបន្ទាប់ពីជម្លោះបានបញ្ចប់កាលពីឆ្នាំ១៩៧៥។
ភាគីចិន បានបញ្ជាក់ថា មជ្ឈមណ្ឌលទាំងពីរនេះនឹងត្រូវគ្រប់គ្រង និងប្រតិបត្តិការរួមគ្នាដោយកងទ័ពទាំងពីរចិន-ឡាវ ក្នុងគោលបំណងពង្រឹងកិច្ចសហប្រតិបត្តិការការពារជាតិ។ ទីក្រុងប៉េកាំង បានសង្កត់ធ្ងន់ថា ការបង្កើតមូលដ្ឋាននេះមិនមែនសំដៅប្រឆាំងនឹងភាគីទីបីណាមួយឡើយ ប៉ុន្តែគឺដើម្បីរួមចំណែកដល់សន្តិភាព និងស្ថិរភាពក្នុងតំបន់។
ការលេចរូបរាងនៃមជ្ឈមណ្ឌលយោធាថ្មីនៅលើទឹកដីឡាវនេះ បានធ្វើឡើងបន្ទាប់ពីចិន បានផ្តល់ជំនួយជួយបង្កើតមជ្ឈមណ្ឌលគាំទ្រ និងហ្វឹកហ្វឺនរួមគ្នាមួយនៅមូលដ្ឋានទ័ពជើងទឹករាម នៅប្រទេសកម្ពុជា។ លើសពីនេះ ក្រុងប៉េកាំង ក៏មានមូលដ្ឋានផ្គត់ផ្គង់យោធានៅប្រទេស ជីប៊ូទី (Djibouti) ដែលជាមូលដ្ឋានយោធានៅបរទេសដំបូងគេបង្អស់ដែលចិន បានទទួលស្គាល់ជាផ្លូវការ។
ការវិវឌ្ឍថ្មីនៅក្នុងប្រទេសឡាវនេះ ត្រូវបានអ្នកវិភាគមើលឃើញថា ជារបត់យុទ្ធសាស្ត្រដ៏សំខាន់ ព្រោះវាជាការបោះបង្គោលយោធាមួយទៀតនៅលើដែនដីអាស៊ីអាគ្នេយ៍ដីគោក ដែលជាតំបន់ទីក្រុងប៉េកាំងកំពុងពង្រីកឥទ្ធិពលសេដ្ឋកិច្ច ការទូត និងសន្តិសុខយ៉ាងសកម្ម។
កិច្ចសហប្រតិបត្តិការយោធាកាន់តែស្អិតល្មួតរវាងចិន ជាមួយឡាវ និងកម្ពុជា បានកើតឡើងចំពេលដែលទីក្រុងប៉េកាំង កំពុងក្រសោបយកទំនាក់ទំនងការពារជាតិ នៅទូទាំងតំបន់។ ពាក់ព័ន្ធនឹងមូលដ្ឋានទ័ពជើងទឹករាមវិញ មន្ត្រីកម្ពុជា និងចិន បានអះអាងស្របគ្នាថា ការអភិវឌ្ឍនេះធ្វើឡើងផ្អែកលើការពិភាក្សា និងយោគយល់គ្នាទៅវិញទៅមក ដើម្បីពង្រឹងសមត្ថភាពការពារជាតិ។ ទន្ទឹមនឹងនេះ កម្ពុជាតែងតែបដិសេធដាច់ខាតថា គ្មានការដាក់ពង្រាយកងទ័ពចិន ជាអចិន្ត្រៃយ៍នៅលើទឹកដីកម្ពុជា ឡើយ៕
អត្ថបទៈ សួន ឡង់ទី
