ថ្នាក់ដឹកនាំ CSX ចាត់ទុកវត្តមានរបស់ ជេអេសលែន ជាឱកាសសម្រាប់វិនិយោគិនក្នុងការទទួលបានឱកាសវិនិយោគពីរក្នុងពេលតែមួយ។ តាមរយៈវត្តមានរបស់ក្រុមហ៊ុនចុះបញ្ជីថ្មីនេះ ថ្នាក់ដឹកនាំ CSX រំពឹងថា វានឹងស្រូបទាញអតិជន និងក្រុមហ៊ុនកាន់តែច្រើនថែមទៀតឲ្យមកចូលរួមវិនិយោគក្នុងផ្សារមូលបត្រកម្ពុជា។
ក្រុមហ៊ុន ជេអេសលែន ដែលមាននិមិត្តសញ្ញា JSL បានក្លាយជាក្រុមហ៊ុនបើកឆាកដំបូងគេក្នុងការចុះបញ្ជីនៅផ្សារមូលបត្រកម្ពុជានៅឆ្នាំ២០២២ ដោយក្រុមហ៊ុននេះ នឹងចូលទៅគោះជួងបោះផ្សាយលក់ភាគហ៊ុននៅថ្ងៃទី១០ ខែកុម្ភៈ ឆ្នាំ២០២២។ ការបោះផ្សាយលក់ភាគហ៊ុនដំបូងរបស់ក្រុមហ៊ុននេះគ្រោងជួញដូរក្នុងតម្លៃ១ពាន់៩រយរៀលក្នុង១ភាគហ៊ុន ខណៈក្រុមហ៊ុននេះបានចុះបញ្ជីលក់ភាគហ៊ុនជិត២៦លានភាគហ៊ុន។ ក្រុមហ៊ុននេះ ជាក្រុមហ៊ុនទីពីរហើយដែលបានបោះផ្សាយលក់មូលបត្រកម្មសិទ្ធិនៅលើទីផ្សារកំណើននៃផ្សារមូលបត្រកម្ពុជា។
អត្ថបទទាក់ទង!
អគ្គនាយកក្រុមហ៊ុនផ្សារមូលបត្រកម្ពុជា ឯកឧត្តម ហុង សុហួរ ចាត់ទុកការត្រៀមបោះផ្សាយលក់មូលបត្រកម្មសិទ្ធិរបស់ក្រុមអភិវឌ្ឍន៍លំនៅឋានជេអេស លែន ជាការផ្តល់ជម្រើសកាន់តែសម្បូរបែបបន្ថែមទៀតជូនអតិថិជនក្នុងផ្សារមូលបត្រកម្ពុជា។ សម្រាប់ ឯកឧត្តម តាមរយៈវត្តមានក្រុមហ៊ុននេះ អតិថិជន នឹងទទួលបានឱកាសវិនិយោគពីរក្នុងពេលតែមួយទាំងលើវិស័យអចលនទ្រព្យ និងវិស័យភាគហ៊ុន។ ឯកឧត្តមរំពឹងថា តាមរយៈវត្តមានរបស់ក្រុមហ៊ុនអចលទ្រព្យនេះក្នុងផ្សារមូលបត្រវានឹងជួយស្រូបទាញអ្នកវិនិយោគលើវិស័យអចលនទ្រព្យ ឲ្យងាកមកវិនិយោគក្នុងវិស័យមូលបត្រកាន់តែច្រើន ក៏ដូចជាជួយទាក់ទាញក្រុមហ៊ុនផ្សេងៗឲ្យមកចុះបញ្ជីផងដែរ។
បច្ចុប្បន្នផ្សារមូលបត្រកម្ពុជាមានក្រុមហ៊ុនចុះបញ្ជីសរុបចំនួន១៤ក្រុមហ៊ុន ក្នុងនោះ មាន៨ក្រុមហ៊ុនចុះបញ្ជីលក់ភាគហ៊ុន និង៦ក្រុមហ៊ុនទៀតចុះបញ្ជីលក់សញ្ញាបណ្ណ ឬបណ្ណបំណុល។ នៅឆ្នាំ២០២១កន្លងទៅនេះ បរិមាណជួញដូភាគហ៊ុនប្រចាំថ្ងៃគិតជាមធ្យមមានជាង ២៣ម៉ឺនភាគហ៊ុន និងតម្លៃជួញដូរភាគហ៊ុនមានជាង ២៥ម៉ឺនដុល្លារ បើធៀបនឹងឆ្នាំ២០២០ ទំហំជួញដូរភាគហ៊ុនមានការកើនឡើងរហូតប្រមាណ ៤០០% និងតម្លៃជួញដូរវិញកើនឡើងដល់ទៅ ១២៧% ឯណោះ។ អគ្គនាយកផ្សារមូលបត្រកម្ពុជា មានក្ដីរំពឹងថា បើសិនជាស្ថានភាពកូវីដ១៩ បានធូរស្បើយ ផ្សារមូលបត្រនឹងបន្តកើនឡើង ក្នុងរយៈពេលប៉ុន្មានឆ្នាំទៅមុខទៀត ដោយលោករំពឹងថា នៅឆ្នាំ២០២២នេះទំហំជួញដូរប្រចាំថ្ងៃនឹងមានប្រមាណ ៣០ម៉ឺនដុល្លារ៕
None
