លោក អិល ឈិញ ប្រធានសមាគមកសិករដំឡូងមីខ្មែរ បានគូសបញ្ជាក់ប្រាប់ខេមបូណូមីសថា ទីផ្សារដំឡូងមីស្រស់នៅតំបន់មួយចំនួនក្នុងខេត្តបាត់ដំបង បន្ទាយមានជ័យ ឧត្តរមានជ័យ ព្រះវិហារ និងខេត្តសៀមរាប ជាដើម បានធ្លាក់ថ្លៃខ្លាំងមកនៅត្រឹមជាង១០០រៀលក្នុង១គីឡូក្រាមប៉ុណ្ណោះ។ ការធ្លាក់ថ្លៃនេះ ត្រូវបានប្រធានសមាគមកសិករដំឡូងមីខ្មែរ រូបនេះអះអាងថា គឺដោយសារចម្ការដំឡូងមីមួយចំនួននៅក្នុងតំបន់ទាំងនោះ បានរងផលប៉ះពាល់ពីការឡើងកម្ដៅខ្លាំង ដែលបង្កឡើងដោយបាតុភូតអែលនីណូ ជាហេតុធ្វើឱ្យដំឡូងជាច្រើនបាត់បង់គុណភាព ធ្លាក់កម្រិតជាតិម្សៅខ្លាំង និងឈានដល់រលួយទៀតផង ដែលធ្វើឱ្យរោងចក្រពិបាកក្នុងការទិញយកទៅកែច្នៃ។
តែយ៉ាងណា ប្រធានសមាគមកសិករដំឡូងមីខ្មែររូបនេះអះអាងថា ការធ្លាក់ថ្លៃដំឡូងមីស្រស់នេះ មិនមែនកើតឡើងនៅទូទាំងតំបន់នោះទេ ពោលគឺនៅតំបន់ខ្លះដូចជានៅខេត្តកំពង់ចាម និងខេត្តស្ទឹងត្រែងជាដើម អាចលក់បានចន្លោះពី៣០០ ទៅ៤០០រៀល ក្នុង១គីឡូក្រាម ព្រោះដំឡូងមីនៅក្នុងតំបន់ទាំងនេះ នៅមានគុណភាពល្អ និងមានជាតិម្សៅខ្ពស់។
បើតាមលោក អិល ឈិញ ប្រធានសមាគមកសិករដំឡូងមីខ្មែរលើកឡើងថា ការឡើងកម្ដៅដោយសារបាតុភូតអែលនីណូនាពេលកន្លងទៅ បានបង្កផលប៉ះពាល់ដល់ចម្ការដំឡូងមីរាប់ម៉ឺនហិកតា ហើយក្នុងនោះចម្ការខ្លះត្រូវបានភ្ជូរចោលទាំងស្រុងក៏មាន។
ជុំវិញការធ្លាក់ចុះតម្លៃដំឡូងមីនេះដែរ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ថ្លៃដំឡូងមីតែងតែឡើងចុះទៅតាមរដូវកាល តែជាមធ្យមថ្លៃក្នុងឆ្នាំ២០២៤នេះល្អជាងឆ្នាំកន្លងទៅ លើកលែងតែសម្រាប់អ្នកដកលក់ក្នុងអំឡុងពេលនេះ ដែលភាគច្រើនជាដំឡូងមីមានបញ្ហាខាងផ្នែកស្តង់ដាគុណភាព មើមដំឡូងស្វិត និងបាត់បង់កម្រិតជាតិម្សៅ ដោយបានធ្លាក់ចុះពីរង្វង់២៥%-២៩% មកនៅត្រឹមតែ១៥% ឬក្រោមនេះ។
អត្ថបទគួរអាន
បើតាមមន្រ្តីជាន់ខ្ពស់រូបនេះ បញ្ហាធ្លាក់ចុះជាតិម្សៅនេះបណ្តាលមកពីកត្តាអាកាសធាតុក្តៅខ្លាំងក្នុងពេលកន្លងមក ដែលបានធ្វើឱ្យប៉ះពាល់ដល់ការលូតលាស់របស់ដំណាំជាច្រើនប្រភេទរួមទាំងដំឡូងមី ហើយមិនមែនតែកម្ពុជានោះទេ សូម្បីដំឡូងមីនៅក្នុងប្រទេសជិតខាង ក៏ធ្លាក់ចុះគុណភាពដោយសារមូលហេតុស្រដៀងគ្នានេះដែរ។
យ៉ាងណាក៏ដោយ ឯកឧត្តម ឃឹម ហ្វីណង់ បានអះអាងថា ថ្លៃដំឡូងមីស្ងួតមិនសូវមានបញ្ហានោះទេ ជាពិសេសដំឡូងដែលមានគុណភាពត្រូវតាមស្តង់ដា។ ម្យ៉ាងទៀត បច្ចុប្បន្នដំឡូងមីមួយភាគធំត្រូវបានប្រមូលផលរួចហើយនៅសល់តិចតួចប៉ុណ្ណោះ ហើយរដូវនេះក៏មិនសមស្របសម្រាប់ដកដំឡូងមីលក់នោះដែរ។
ពាក់ព័ន្ធនឹងតម្លៃដំឡូងមីស្រស់នេះដែរ រោងចក្រកែច្នៃ និងប្រមូលទិញដំឡូងមីស្រស់ TWPC នៅក្នុងខេត្តឧត្តរមានជ័យបានលើកឡើងថា តម្លៃដំឡូងមីស្រស់ត្រូវបានទិញចូលតាមកម្រិតជាតិម្សៅរបស់វា។ ក្នុងនោះកាលពីថ្ងៃទី១១ ខែមិថុនា ឆ្នាំ២០២៤ រោងចក្រនេះទិញចូលដំឡូងមីស្រស់ ដែលមានភាគរយម្សៅពី៨ដល់១១% ក្នុងតម្លៃ១២០រៀលក្នុង១គីឡូក្រាម និងភាគរយម្សៅខ្ពស់ពី២៤ដល់២៧% ទិញចូលក្នុងតម្លៃ២៧០រៀលក្នុង១គីឡូក្រាម ពោលគឺតម្លៃដំឡូងមីស្រស់អាស្រ័យលើកម្រិតជាតិម្សៅប៉ុណ្ណោះ។
បើយោងតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ នៅរយៈពេល៥ខែឆ្នាំ២០២៤នេះ កម្ពុជា បាននាំចេញដំឡូងមីស្រស់ជិត១លាន៦សែនតោន មានការកើនឡើងយ៉ាងគំហុកបើធៀបនឹងបរិមាណនាំចេញក្នុងរយៈពេលដូចគ្នាកាលពីឆ្នាំ២០២៣ ដែលមានត្រឹមតែជាង២៥ម៉ឺនតោនប៉ុណ្ណោះ៕
អត្ថបទ៖ បូ ដូឡា
None
