ទោះប្រឈមនឹងកង្វះខាតបន្ទះឈីប តែក្រុមហ៊ុន GM បានចាត់វិធានការឆ្លើយតបយ៉ាងមានប្រសិទ្ធភាព ទៅតាមតម្រូវការរបស់អតិថិជន ជាហេតុធ្វើឱ្យក្រុមហ៊ុននេះ អាចដណ្តើមយកតំណែងកំពូលតារាងរបស់ខ្លួនមកវិញ។ នេះបើតាមការចុះផ្សាយរបស់សារព័ត៌មានអន្តរជាតិធំៗ។
ក្រុមហ៊ុន GM បានប្រកាសកាលពីថ្ងៃទី៤ខែមករា អំពីការលក់រថយន្តរបស់ខ្លួននៅអាមេរិកថាបាន កើនឡើង ២,៥% ស្មើនឹងចំនួនជាង ២លាន២សែនគ្រឿងក្នុងឆ្នាំ២០២២។ មិនតែប៉ុណ្ណោះ កំណើននៃការលក់រថយន្តរបស់ក្រុមហ៊ុនអាមេរិកនេះ បានវ៉ាដាច់ក្រុមហ៊ុនយក្សជប៉ុន Toyota ស្របពេលដែលក្រុមហ៊ុននេះលក់បានចំនួនជាង២លាន១សែនគ្រឿង។
ក្រុមហ៊ុនរថយន្តយក្សអាមេរិកដដែលអះអាងថា ខ្លួនអាចឆ្លើយតបបានប្រសើរនូវតម្រូវការខ្លាំងសម្រាប់រថយន្តទូទៅ និងរថយន្តដឹកទំនិញ បើទោះបីជាឧស្សាហកម្មយានយន្តក្នុងពិភពលោក បានពើបប្រទះនឹងកង្វះខាតឈីប ដែលបានប៉ះពាល់ដល់ការផលិតយ៉ាងណាក្តី។
អត្ថបទគួរអាន
គួររំឭកថា កាលពីឆ្នាំ២០២១ ក្រុមហ៊ុន GM បានបាត់បង់តំណែងលេខ១ ក្នុងការលក់រថយន្តនៅអាមេរិកជាលើកដំបូងចាប់តាំងពីឆ្នាំ១៩៣១មក ដោយវាបានធ្លាក់ទៅក្នុងដៃរបស់ក្រុមហ៊ុន Toyota។
ប៉ុន្តែចាប់ពីឆ្នាំ២០២២មក ក្រុមហ៊ុន Toyota គឺស្ថិតក្នុងចំណោមក្រុមហ៊ុនរថយន្តនានា ដែលទទួលរងផលប៉ះពាល់ពីកង្វះខាតគ្រឿងបង្គុំ ជាពិសេសគឺបន្ទះឈីបតែម្តង ដែលត្រូវបង្ខំចិត្តកាត់បន្ថយចំនួនផលិតកម្មរបស់ខ្លួន ហើយធ្វើឱ្យការលក់នៅអាមេរិកបានធ្លាក់ចុះ ទៅតាមនោះដែរ។ ដោយឡែក ក្រុមហ៊ុនកូរ៉េ Hyundai វិញក៏បានបង្ហាញឱ្យដឹងដែរថា ខ្លួនលក់រថយន្តបានចំនួនជាង៧២ម៉ឺនគ្រឿងក្នុងឆ្នាំ២០២២ នៅអាមេរិក ដែលបានធ្លាក់ចុះ២%។
យោងតាមក្រុមហ៊ុនប្រឹក្សាឧស្សាហកម្ម Cox Automovite បានឱ្យដឹងថា ការលក់រថយន្តថ្មីៗនៅអាមេរិកឆ្នាំ២០២២ នឹងមានចំនួនប្រហែល១៣លាន៩សែនគ្រឿង ធ្លាក់ចុះ ៨% ពីឆ្នាំ២០២១ និងធ្លាក់ចុះ ២០% ពីចំនួនច្រើនបំផុតនៃការលក់ដែលធ្លាប់បានកត់ត្រាទុកក្នុងឆ្នាំ២០១៦។ អ្នកវិភាគមួយចំនួនបានប៉ាន់ស្មានថា តម្លៃរថយន្តឆ្នាំនេះនឹងកើនឡើងដោយសារបញ្ហាអតិផរណា និងការដំឡើងអត្រាការប្រាក់គោល។
ទោះជាយ៉ាងណាក៏ដោយ ថ្វីបើការលក់នៅអាមេរិកត្រូវបានគ្របដណ្តប់ដោយរថយន្តរបស់ក្រុមហ៊ុន GM ក៏ពិតមែន ប៉ុន្តែការលក់រថយន្តរបស់ Toyota នៅទូទាំងពិភពលោក វិញ នៅតែបន្តនាំមុខគេក្នុងរយៈពេល ៣ឆ្នាំជាប់ៗគ្នា។ ក្រុមហ៊ុនជប៉ុនមួយនេះ បានប្រកាសឱ្យដឹងកាលពីចុងខែធ្នូកន្លងទៅថា ខ្លួនបានលក់រថយន្តជាង ៩លាន៥សែន៦ម៉ឺនគ្រឿង នៅទូទាំងពិភពលោក គិតពីខែមករា ដល់ខែវិច្ឆិកា ឆ្នាំ២០២២ ដែលជាចំនួនច្រើនជាងគេបង្អស់៕
