ដោយសារមានការព្រួយបារម្ភកាន់តែខ្លាំងឡើងពីភាពមិនប្រាកដប្រជា និង អសន្តិសុខ ដែលបាននាំឱ្យមានវិបត្តិមនុស្សធម៌នៅអាហ្វហ្គានីស្ថាន រដ្ឋមន្ត្រីការបរទេសជប៉ុនបានសន្យាថា នឹងផ្តល់ជំនួយ ចំនួន ៦៥លានដុល្លារ តាមរយៈអង្គការអន្តរជាតិ ដើម្បីជួយដល់ប្រជាជនក្នុងប្រទេសអាហ្វហ្គានីស្ថាន រួមមាន ជម្រកស្នាក់នៅ ម្ហូបអាហារ ទឹក និង សម្ភារៈផ្សេងៗទៀត។
ដោយឡែកប្រទេសដទៃទៀត ក៏បានសន្យាស្រដៀងៗគ្នានេះដែរ នឹងទំនុកបម្រុងជំនួយមនុស្សធម៌ដល់អាហ្វហ្គានីស្ថាន ប៉ុន្តែមិនបានបញ្ជាក់ថាមានទឹកប្រាក់ប៉ុន្មាន ឬ តាមរយៈអ្វីនោះទេ។
អ្វីដែលគួរឲ្យកត់សម្គាល់គឺនៅត្រង់ថា ក្រសួងការបរទេសជប៉ុននៅមុនពេលកិច្ចប្រជុំធ្លាប់បានបញ្ជាក់ថា ភាគីរុស្សី និងចិន នឹងត្រូវចូលរួមក្នុងកិច្ចប្រជុំខាងលើនេះដែរ ប៉ុន្តែជាក់ស្តែង គេមិនបានឃើញប្រទេសទាំងពីរនេះចូលរួមពិភាក្សាឡើយ។
យ៉ាងណាមិញ ភាគីចិន បែរជាបានទៅជួបប្រជុំពិភាក្សាជាមួយប្រទេសក្បែរខាងអាហ្វហ្គានីស្ថានទៅវិញ មានដូចជា ប៉ាគីស្ថាន អ៊ីរ៉ង់ អ៊ូបេគីស្ថាន ជាដើម។
អត្ថបទគួរអាន
ក្នុងកិច្ចប្រជុំនោះ ចិនបានប្រកាសដោយខ្លួនឯងថា ចិននឹងផ្តល់ជំនួយជាង ៣១លានដុល្លារអាមេរិកដល់អាហ្វហ្គានីស្ថាន រួមបញ្ចូលទាំងស្បៀងអាហារ ថ្នាំពេទ្យ និងវ៉ាក់សាំងប្រឆាំងកូវីដ១៩ផងដែរ។
សូមជម្រាបថាកាលពីពេលថ្មីៗនេះ ក្រុមតាលីបង់ទើបតែបានប្រកាសពីបេក្ខភាពក្បាលម៉ាស៊ីនដឹកនាំរដ្ឋបណ្តោះអាសន្នរបស់ខ្លួន ដោយក្នុងនោះភាគច្រើននៃពួកគេ សុទ្ធសឹងជាមេដឹកនាំជាន់ខ្ពស់របស់ក្រុមតាលីបង់ ហើយដែលសុទ្ធសឹងជាអ្នក ធ្លាប់ជាប់ឈ្មោះជាមុខសញ្ញាក្នុងបញ្ជីខ្មៅរបស់អាមេរិក។
យ៉ាងណាក៏ដោយ ក្រោយពីរដ្ឋាភិបាលបណ្តោះអាសន្ននេះត្រូវបានប្រកាសឡើង ភាគីចិនបានចេញមុខមុនគេ មកអះអាងថា ខ្លួននឹងនៅតែបន្តទំនាក់ទំនងជាមួយអាហ្វហ្គានីស្ថានដដែល គ្រាន់តែមកទល់ពេលនេះ ពុំទាន់មានប្រទេសណាមួយទទួលស្គាល់រដ្ឋាភិបាលអាហ្វហ្គានីស្ថានថ្មីនេះ ជាផ្លូវការនៅឡើយទេ សូម្បីតែប្រទេសចិន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
