សណ្ឋាគារនៅជប៉ុន ត្រូវការកម្មករបរទេសជាច្រើន ដើម្បីឆ្លើយតបនឹងកំណើនភ្ញៀវទេសចរ

ក្រុមហ៊ុន Tokyo Resorts & Stays គ្រោងនឹងបង្កើនកម្លាំងពលកម្មបរទេសពីប្រហែល ១២០នាក់ទៅ៥៨០នាក់ នៅត្រឹមឆ្នាំ២០៣៣ និងបង្កើនប្រាក់បៀវត្សរ៍ពី៦% ក្នុងពេលបច្ចុប្បន្នដល់ប្រហែល៣០% ខណៈដែលក្រុមហ៊ុននេះបន្តបើករមណីយដ្ឋាន និងសណ្ឋាគារថ្មីៗបន្ថែមទៀត។

តម្រូវការកម្មករបរទេសនេះនឹងផ្អែកលើកម្មវិធីកម្មករជំនាញជាក់លាក់របស់ប្រទេសជប៉ុន។ ក្រុមហ៊ុនតូក្យូរីសតនេះ ធ្លាប់នាំយកកម្មករជំនាញមកពីប្រទេសហ្វីលីពីន និងមីយ៉ាន់ម៉ា ក្រោមក្របខណ្ឌនេះ ប៉ុន្តែឥឡូវក្រុមហ៊ុននេះគ្រោងនឹងសំឡឹងទៅប្រទេសផ្សេងទៀតដូចជាឥណ្ឌូនេស៊ី និងនេប៉ាល់ជាដើម ដោយផ្ដោតលើកម្មករជំនាញខាងចុងភៅ និងអ្នកបម្រើសេវា។

ចំណែកសណ្ឋាគារ Seibu Prince Hotels Worldwide គ្រោងនឹងជួលកម្មករបរទេស២០% បន្ថែមទៀតនៅឆ្នាំសារពើពន្ធ២០២៤ និងទទួលយកអ្នកហាត់ការបន្ថែមទៀតសម្រាប់មុខតំណែងពេញម៉ោង ហើយសណ្ឋាគារនេះនឹងផ្តល់អត្ថប្រយោជន៍ជាច្រើនរួមទាំងប្រាក់ឧបត្ថម្ភការរស់នៅប្រចាំខែចំនួន១៣៦ដុល្លារ និងប្រាក់ឧបត្ថម្ភជិត៦៨០ដុល្លារជារៀងរាល់ឆ្នាំ សម្រាប់ការធ្វើដំណើរទៅលេងស្រុកកំណើតពីរដងក្នុងមួយឆ្នាំផងដែរ។

ក្រុមហ៊ុនអភិវឌ្ឍន៍អចលនទ្រព្យ Mori Trust បានព្យាករថា ភ្ញៀវទេសចរទៅលេងប្រទេសជប៉ុននឹងកើនឡើង៣៨% នៅឆ្នាំនេះ ដោយឡើងដល់ចំនួនជាង៣៤លាននាក់ ហើយទោះបីជាតម្រូវការកន្លែងស្នាក់នៅកើនឡើងក៏ដោយ ប៉ុន្តែសណ្ឋាគារមួយចំនួនមានចេតនាទុកបន្ទប់ឱ្យនៅទំនេរដោយសារខ្វះបុគ្គលិកបម្រើសេវាសម្រាប់ភ្ញៀវទេសចរទាំងនេះ៕

អត្ថបទ៖ សុខ មង្គល