តើហេតុអ្វីបានជាត្រូវបិទទ្វារយូរដល់ទៅ១ខែពេញបែបនេះ ហើយថា តើបុណ្យចូលឆ្នាំចិន បង្កផលប៉ះពាល់ដល់ខ្សែច្រវាក់ផលិតកម្ម ក៏ដូចជាវិស័យដឹកជញ្ជូន និងភ័ស្ដុភារកម្មរបស់ពិភពលោកបែបណា?
អំឡុងពិធីបុណ្យចូលឆ្នាំថ្មីប្រពៃណីចិន គ្រប់រោងចក្រទាំងអស់នៅក្នុងប្រទេសនេះ គឺត្រូវបិទទ្វារគ្មានសល់ ហើយបើទោះជារដ្ឋាភិបាលចិន ប្រកាសអនុញ្ញាតឱ្យឈប់សម្រាកត្រឹមតែ៧ថ្ងៃ ទៅ៨ថ្ងៃ ក៏ដោយចុះ ក៏រោងចក្រភាគច្រើនត្រូវបិទទ្វារទាំងស្រុងរយៈពេលពី២សប្ដាហ៍ ទៅ៤សប្ដាហ៍ឯណោះ។
បន្ថែមពីលើនេះ កម្មកររោងចក្រចិន ភាគច្រើនសុំច្បាប់ឈប់សម្រាកបន្ថែមពីលើថ្ងៃឈប់សម្រាកផ្លូវការ ដែលរដ្ឋាភិបាលប្រកាសអនុញ្ញាត ដើម្បីទៅលេងស្រុកឱ្យបានយូរបន្តិច និងណាមួយពួកគេត្រូវចំណាយពេលច្រើនថ្ងៃក្នុងការធ្វើដំណើរទៅមក ជាហេតុបង្ខំឱ្យរោងចក្រនានាត្រូវបិទទ្វារយូរបែបនេះ។ ហើយក្រោយពិធីបុណ្យចូលឆ្នាំចិន កម្មករភាគច្រើនមិនទាន់ត្រលប់មកពីស្រុកវិញទេ នេះមានន័យថា ទម្រាំតែផលិតកម្មរបស់រោងចក្រឈានដល់ពេញសមត្ថភាពឡើងវិញ គឺត្រូវការពេល១ខែឯណោះ ក្រោយពីចប់បុណ្យចូលឆ្នាំចិន។
អត្ថបទគួរអាន
ដូចនេះច្បាស់ណាស់ថា ពិធីបុណ្យចូលឆ្នាំចិន ពិតជាបង្កផលប៉ះពាល់ខ្លាំងដល់ខ្សែច្រវាក់ផលិតកម្ម ក៏ដូចជាវិស័យដឹកជញ្ជូន និងភ័ស្ដុភារកម្មរបស់ពិភពលោក ព្រោះមហាយក្សចិន គឺជាប្រទេសនាំចេញ និងជាប្រទេសផលិតកម្មដ៏ធំបំផុតមួយរបស់ពិភពលោក។
ទន្ទឹមនេះ មាន៥ចំណុចដែលអ្នកគួរដឹងទាក់ទិននឹងការបិទទ្វាររោងចក្រអំឡុងរដូវកាលបុណ្យចូលឆ្នាំចិន មានដូចជា៖ ទី១, រោងចក្រនានាត្រូវការពេល១ខែពេញក្រោយចប់បុណ្យចូលឆ្នាំចិន ទម្រាំផលិតកម្មរបស់ខ្លួនឈានដល់ពេញសមត្ថភាពឡើងវិញ, ទី២ បញ្ហាគុណភាពទំនិញកើនឡើងទាំងមុន និងក្រោយបុណ្យចូលឆ្នាំចិន, ទី៣ ថ្លៃដើមនៃការដឹកជញ្ជូនតាមកប៉ាល់ហក់ឡើងខ្ពស់ខ្លាំងអំឡុងពេលបុណ្យចូលឆ្នាំចិន, ទី៤ កុំកក់លុយបញ្ជាទិញទំនិញកៀកថ្ងៃបុណ្យចូលឆ្នាំចិន ខ្លាំងពេក ព្រោះអ្នកអាចនឹងខាតបង់លុយទាំងនោះដោយមិនអាចយកមកវិញបាន ប្រសិនបើរោងចក្រដែលអ្នកកក់លុយមានបំណងបិទទ្វារជាអចិន្ត្រៃយ៍ដោយមិនប្រាប់ឱ្យអ្នកដឹង ខណៈរោងចក្រដែលចង់បិទទ្វារជាអចិន្ត្រៃយ៍ច្រើនតែបិទអំឡុងពិធីបុណ្យចូលឆ្នាំនេះ
ហើយចុងក្រោយទី៥ គឺអ្នកចាំបាច់ត្រូវព្យាករពីចម្ងាយទាក់ទិននឹងផលិតកម្មក្នុងប្រទេសចិន ក្នុងករណីអ្នកបញ្ជាទិញទំនិញពីប្រទេសនេះ ព្រោះមានកត្តាជាច្រើនដែលធ្វើឱ្យប៉ះពាល់ដល់ផលិតកម្មអំឡុងរដូវកាលបុណ្យចូលឆ្នាំចិន ដូចបានរៀបរាប់ពីខាងលើ៕
None
