ថ្លែងនៅក្នុងសន្និសីទកាសែតក្នុងវិមានរដ្ឋសភា នាព្រឹកថ្ងៃទី៣០ ខែមីនា ឆ្នាំ២០២០ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអំពាវនាវ ស្នើឲ្យធនាគារ មីក្រូហិរញ្ញវត្ថុ ក៏ដូចជា ម្ចាស់បុរីលំនៅដ្ឋាន មេត្តាយោគយល់ និងផ្ដល់ការបន្ថូរបន្ថយ ដល់កូនបំណុលរបស់ខ្លួន ស្របពេលដែលប្រទេសកម្ពុជាបច្ចុប្បន្ននេះ កំពុងរងផលប៉ះពាល់ដោយសារបញ្ហា Covid-19។
សម្តេច បានសង្កត់ធ្ងន់ថា រាជរដ្ឋាភិបាលក៏កំពុងពិនិត្យលទ្ធភាពក្នុងការញ្ចេញនូវទុនបម្រុងប្រហែល ៥០០ ទៅ៦០០ លានដុល្លារ ដើម្បីឲ្យធនាគារឯកទេសខ្ចីក្នុងអត្រាការប្រាក់ទាប ហើយធនាគារឯកទេសទាំងនោះ ក៏នឹងអាចយកទៅឲ្យអតិថិជនខ្ចីបន្ត នៅក្នុងអត្រាការប្រាក់ទាបដែរ។ បើតាមការបញ្ជាក់របស់ប្រមុខរាជរដ្ឋាភិបាលកម្ពុជា ទឹកប្រាក់ប្រមាណ ៥០០ ទៅ៦០០ លានដុល្លារអាមេរិកនេះ គឺជាប្រាក់សន្សំរបស់រដ្ឋ។
អត្ថបទទាក់ទង!
នាយករដ្ឋមន្ត្រីកម្ពុជា បានមានប្រសាសន៍យ៉ាងដូច្នេះ «យើងក៏កំពុងតែពិនិត្យអំពីលទ្ធភាពបញ្ចេញទុនរបស់រាជរដ្ឋាភិបាល ៥ ឬ៦រយលានដុល្លារ ដើម្បីឲ្យធនាគារឯកទេសខ្ចី ក្នុងអត្រាការប្រាក់ទាប ហើយធនាគារឯកទេសទាំងនោះ នឹងយកទៅឲ្យអ្នកធ្វើអាជីវកម្ម ដោយការប្រាក់ទាបដែរ។ យើងកំពុងពិនិត្យបញ្ហានេះ ប៉ុន្ដែ មិនទាន់ឈានដល់ទេ តែយើងនឹងឈានដល់នៅជុំទី២ យើងប្រកាសជុំទី១ហើយ! ជុំទី២ ឬជុំទី៣ អំពីលទ្ធភាពនៃការបញ្ជេញទុនបម្រុងរបស់រដ្ឋ ប្រាក់សន្សំរបស់រដ្ឋ។»
បើតាមការគូសបញ្ជាក់របស់សម្តេចហ៊ុន សែន ក្នុងកាលៈទេសៈនេះ ធនាគារមិនគួរទៅរឹបអូសយកទ្រព្យដូចជាផ្ទះសម្បែង របស់កូនបំណុលខ្លួន ដោយសារតែពួកគេមិនមានលទ្ធភាពសងនោះទេ។
សម្តេច ហ៊ុន សែន មានប្រសាសន៍ថា «រដ្ឋគ្រាន់តែអំពាវនាវឲ្យវិស័យឯកជន និងវិស័យឯកជន ធ្វើការផ្ដល់នូវការយោគយល់គ្នា រាប់ទាំងវិស័យធនាគារ យោគយល់ចំពោះការពន្យារពេលសង គ្រាន់តែពន្យារពេលសងដល់គ្នា [កូនបំណុល] ។ ដល់ដំណាក់កាលសងបញ្ចប់ គ្នា [កូនបំណុល] មានការលំបាក ដូច្នេះ មិនគួរប្រើប្រាស់ពេលវេលានេះ ដើម្បីទៅរឹបអូសយកផ្ទះគ្នាទេ! ពន្យារ គេថា បន្ថយការប្រាក់!»។
បើតាមសម្តេច ហ៊ុន សែន ខាងរាជរដ្ឋាភិបាល តាមរយៈធនាគារជាតិ បានមានវិធានការច្រើនហើយ ចំពោះធនាគារ និងមីក្រូហិរញ្ញវត្ថុ ដូចជាពាក់ព័ន្ធនឹងទុនបម្រុងកាតព្វកិច្ច ដោយកាលពីពេលកន្លងទៅ បម្រុងកាតព្វកិច្ចតម្រូវឲ្យមាន ជាង ១២% ប៉ុន្ដែ ឥឡូវខាងធនាគារជាតិ បានបន្ថយឲ្យមានមកនៅត្រឹម ៧%ប៉ុណ្ណោះ។ វិធានការបន្ថូរបន្ថយរបស់ធនាគារជាតិនេះ ក៏បានធ្វើឲ្យខាងធនាគារ និងមីក្រូហិរញ្ញវត្ថុទាំងអស់មានទុនប្រហែល ១៨០០ លានដុល្លារអាមេរិក ដើម្បីដោះស្រាយជួយដល់កូនបំណុលរបស់ខ្លួន។
សម្តេច ហ៊ុន សែន បានគូសបញ្ជាក់ថា បន្តថា ក្នុងកាលៈទេសៈនេះ រាជរដ្ឋាភិបាលកម្ពុជាបានត្រឹមតែធ្វើការអំពាវនាវដល់វិស័យឯកជន ពិសេសខាងធនាគារ ម្ចាស់បុរីលំនៅដ្ឋានឲ្យធ្វើការយោគយល់ប៉ុណ្ណោះ ប៉ុន្ដែ នៅពេលដែលប្រទេសត្រូវបានដាក់ចូលក្នុងគ្រាអាសន្ន នៅពេលខាងមុខនេះ រាជរដ្ឋាភិបាលអាចនឹងមានសិទ្ធិក្នុងការកំណត់លើថ្លៃទំនិញមួយចំនួន។ ប៉ុន្ដែ សម្តេចថា បើទោះបីជាមានច្បាប់ដាក់ប្រទេសក្នុងគ្រាអាសន្នក៏ដោយ ក៏រាជរដ្ឋាភិបាល នឹងមិនទៅលូកដៃរវាងឯកជន និងឯកជននោះដែរ។ ទោះយ៉ាងណា រាជរដ្ឋាភិបាលនៅតែអំពាវនាវ ឲ្យវិស័យឯកជន និងឯកជនមានការយោគយល់គ្នា។
សារព័ត៌មានខេមបូណូមីសមិនអាចសុំការបញ្ជាក់បន្ថែមពីលោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា និងលោក គា បូរាណ ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុនៅកម្ពុជាបានទេ នៅរសៀលថ្ងៃទី ៣០ ខែមីនានេះ ដោយទូរស័ព្ទចូលជាច្រើនលើក តែមិនមានអ្នកទទួល។
សូមបញ្ជាក់ថា បើតាមប្រសាសន៍របស់សម្តេច ហ៊ុន សែន កម្ពុជា បានត្រៀមថវិកាដើម្បីសង្គ្រោះសេដ្ឋកិច្ចរបស់របស់ខ្លួន ដែលកំពុងរងផលប៉ះពាល់ដោយបញ្ហា Covid-19 នេះ ដោយសម្រាប់ផលប៉ះពាល់រយៈពេល ៦ខែ រដ្ឋត្រៀមចំណាយ ៨០០ លានដុល្លារ តែបើបញ្ហានេះ អូសបន្លាយដល់មួយឆ្នាំ នោះរដ្ឋនឹងមានថវិកាត្រៀម ២ពាន់លានដុល្លារ។ ទោះយ៉ាងណា សម្តេច បញ្ជាក់ថា មកទល់ពេលនេះ រដ្ឋមិនទាន់បានប្រើប្រាស់កញ្ចប់ថវិកានេះនៅឡើយទេ ដោយគ្រាន់តែប្រើប្រាស់ថវិកាដែលសល់ពីការចំណាយចរន្ដ ដែលបានមកពីការប្រមូលពន្ធដារ និងពន្ធគយប៉ុណ្ណោះ។
សម្តេច ហ៊ុន សែន បានគូសបញ្ជាក់ថា សម្រាប់ការប្រមូលពន្ធគយនៅខែមីនានេះ គឺមានការថមថយតិចតួច ប៉ុន្ដែ ការប្រមូលចំណូលពន្ធដារនៅតែកើនឡើង ដែលនៅខែមីនានេះ ចំណូលទាំងបានមកពន្ធដារ និងពន្ធគយ គឺអាចនឹងមានរហូតដល់ជិត ៧០០ លានដុល្លារអាមេរិក ខណៈដែលការចំណាយរន្ដរបស់រដ្ឋមានប្រមាណ ៤០០ លានដុល្លារអាមេរិក ក្នុងមួយខែ៕
None
