លោក Thomas Helbling នាយករងនៃនាយកដ្ឋានទទួលបន្ទុកតំបន់អាស៊ីប៉ាស៊ីហ្វិករបស់IMF បាននិយាយនៅក្នុងសន្និសីទមួយថា វិធានការ និងគោលនយោបាយថ្មីៗរបស់អាជ្ញាធរចិនត្រូវជារឿងល្អ ប៉ុន្តែតាមទស្សនៈរបស់លោក គឺគេត្រូវការវិធានការបន្ថែម ដើម្បីបញ្ចប់វិបត្តិអចលនទ្រព្យមួយនេះ។ លោក ថូមាស់ អះអាងថាវិធានការកន្លងមករបស់ប៉េកាំងគឺល្អសម្រាប់អ្នកអភិវឌ្ឍមួយចំនួន ប៉ុន្តែបញ្ហារបស់អ្នកអភិវឌ្ឍន៍អចលនទ្រព្យមួយចំនួន ដែលប្រឈមនឹងការលំបាកផ្នែកហិរញ្ញវត្ថុធ្ងន់ធ្ងរ ដូចមាន Evergrande ជាដើមនៅមិនទាន់ដោះស្រាយនៅឡើយទេ។ បញ្ហាលំនៅឋានដែលសាងសង់មិនទាន់រួចសម្រាប់អតិថិជន ក៏នៅមិនទាន់ដោះស្រាយនៅឡើយ។
អាផាតមិននៅក្នុងប្រទេសចិនជាច្រើនត្រូវបានលក់ទៅឱ្យអ្នកទិញផ្ទះមុនពេលដែលគេបញ្ចប់ការសាងសង់។ កូវីដ១៩និងការលំបាកផ្នែកហិរញ្ញវត្ថុបានធ្វើឱ្យការសាងសង់យឺតយ៉ាវយ៉ាងខ្លាំង ដែលធ្វើឱ្យអ្នកទិញផ្ទះមួយចំនួនបានបញ្ឈប់ការទូទាត់ប្រាក់រំលោះប្រចាំខែរបស់ពួកគេកាលពីរដូវក្តៅឆ្នាំមុន។
អត្ថបទគួរអាន
បើយោងតាមតួលេខផ្លូវការ អគារលំនៅដ្ឋានដែលត្រូវបានលក់នៅក្នុងប្រទេសចិនបានធ្លាក់ចុះជិត២៧% កាលពីឆ្នាំមុន ខណៈដែលការវិនិយោគលើអចលនទ្រព្យបានធ្លាក់ចុះ១០%។ ទោះយ៉ាងណា មន្ត្រីជំនាញរបស់ចិន បានច្រានចោលរបាយការណ៍និងការអះអាងរបស់អ្នកជំនាញ IMF ដោយបដិសេដក្នុងការចាត់ទុកភាពរង្គោះរង្គើវិស័យអចលនទ្រព្យនៅចិនថាជា វិបត្តិ។
សូមជម្រាបថា IMF កាលពីសប្តាហ៍បានបង្កើនការរំពឹងទុកកំណើនសេដ្ឋកិច្ចសាកលរបស់ខ្លួនសម្រាប់ឆ្នាំនេះ ដោយសារតែកំណើនល្អប្រសើរជាងការរំពឹងទុកនៅក្នុងប្រទេសធំៗកាលពីចុងឆ្នាំមុន ការបន្ថយសម្ពាធអតិផរណា និងការបញ្ចប់ការគ្រប់គ្រងកូវីដ១៩ដ៏តឹងរ៉ឹងរបស់ប្រទេសចិន។ ការព្យាករណ៍កំណើន ២,៩% ថ្មីសម្រាប់ពិភពលោកគឺបានកើនឡើង 0,២% ល្អជាងការរំពឹងទុកកាលពីខែតុលា។ ប៉ុន្តែវានៅតែជាការធ្លាក់ចុះពីកំណើនប្រមាណ៣,៤%ក្នុងឆ្នាំ២០២២។ សម្រាប់ប្រទេសចិនវិញ មូលនិធិរូបិយវត្ថុអន្តរជាតិបានព្យាករថានឹងមានកំណើន ៥,២% នៅក្នុងឆ្នាំនេះ ដែលល្អជាងកំណើន ៣%មានក្នុងឆ្នាំ ២០២២៕
