តាមការរាយការណ៍ដោយសារព័ត៌មានអន្តរជាតិធំៗជាច្រើន កំណើនអ្នកឆ្លងកូវីដ-១៩យ៉ាងគំហុកនៅឥណ្ឌា បានបង្កើនការព្រួយបារម្ភយ៉ាងខ្លាំង ចំពោះសមត្ថភាពនៃវិស័យសុខាភិបាលក្នុងការដោះស្រាយរលកឆ្លងដ៏កាចសាហាវនៅឥណ្ឌាលើកនេះ។ គេព្រួយបារម្ភថា ឥណ្ឌាអាចនឹងទប់ទល់លែងជាប់ទៀតហើយ ខណៈដែលការឆ្លងរាលដាលនឹងកើនឡើងថែមទៀតជាបន្តបន្ទាប់ នៅពេលខាងមុខនេះ។
ទន្ទឹមនឹងការឆ្លងយ៉ាងគំហុកនេះ ចំនួនអ្នកស្លាប់ដោយសារកូវីដ-១៩ ក៏មានច្រើនណាស់ដែរ នៅក្នុងប្រទេសមានប្រជាជនច្រើនលំដាប់ទី២មួយនេះ។ ជាក់ស្ដែង គិតនៅថ្ងៃទី ២២ ខែមេសា មានអ្នកស្លាប់ដល់ទៅជាង ២ពាន់នាក់ក្នុងមួយថ្ងៃ។
គួររំឭកថា ការចម្លងដ៏លឿនរហ័សនឹងកាចសាហាវលើកនេះ ត្រូវបានគេជឿថា បណ្តាលមកពីវិរុសកូវីដ-១៩បំប្លែងខ្លួនថ្មី ដែលទើបរកឃើញនៅឥណ្ឌាកាលពីខែមុន ដោយបានឆ្លងរាលដាលពីមនុស្សម្នាក់ទៅម្នាក់យ៉ាងលឿនក្នុងសហគមន៍នៃប្រទេសឥណ្ឌា ដែលមានមនុស្សចរាចរទៅមកយ៉ាងកកកុញជាប្រចាំ។
អត្ថបទទាក់ទង!
ការធ្វេសប្រហែសរបស់រដ្ឋាភិបាលឥណ្ឌាក្នុងការរិតបន្ដឹងសុវត្ថិភាព ក្រោយមើលឃើញពីការថយចុះនៃការឆ្លងកូវីដ-១៩កាលពីដើមឆ្នាំ២០២១ ដោយបានអនុញ្ញាតឲ្យមានការប្រារព្វពិធីសាសនាផ្សេងៗដែលមានមនុស្សចូលរួមយ៉ាងកកកុញ ក៏ជាមូលហេតុមួយជំរុញឲ្យស្ថានការណ៍កាន់តែអាក្រក់ដូចបច្ចុប្បន្នផងដែរ។ ប្រការនេះបានធ្វើឲ្យនាយករដ្ឋមន្ត្រីឥណ្ឌាលោកណារីនដ្រា ម៉ូឌី កំពុងរងការរិះគន់យ៉ាងខ្លាំងពីមជ្ឈដ្ឋានជាតិ។
សូមបញ្ជាក់ថា ការឆ្លងរាលដាលខ្លាំងនៅឥណ្ឌា ជារឿងមួយជាក់ច្បាស់ដែលមិនអាចប្រកែកបានថា កូវីដ-១៩មិនទាន់បានទៅណាឆ្ងាយពីពិភពលោកនោះទេ ទោះបីមានវត្តមាននៃវ៉ាក់សាំងបង្ការក្តី។ ផ្ទុយទៅវិញ វាថែមទាំងបានបង្ហាញឥទ្ធិពលដ៏ខ្លាំងក្លាជាងមុនថែមទៀត តាមរយៈការបំប្លែងខ្លួនជាជាទម្រុងថ្មីជាច្រើន។ អ្វីដែលបាននិងកំពុងកើតឡើងនៅឥណ្ឌា នឹងក្លាយជាគំរូ ប្រាប់ទៅកាន់ពិភពលោក ឲ្យបង្កើនការប្រុងប្រយ័ត្ន និងការពារបន្ថែមទៀតជៀសវាងមានសោកនាដកម្មកើតឡើង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
