ម៉ាស៊ីន ATM នេះគឺជារបស់ក្រុមហ៊ុន Goldsikka Pvt Ltd អាចផ្ទុកមាសបានដល់ ៥គីឡូក្រាម ជាមួយជម្រើសចំនួន ៨ សម្រាប់ចំនួនកាកមាស ដែលអាចទិញ និងដកបានចាប់ពី ០,៥ក្រាម, ១ក្រាម, ២ក្រាម រហូតដល់ ១០០ក្រាម។ ក្នុងនោះកាក់មាស ១០០ក្រាម គឺមានតម្លៃប្រហែល ៧ពាន់ដុល្លារ។
អតិថិជនអាចប្រើកាតឥណពន្ធ និងកាតឥណទាន ក្នុងការស៊កចូលម៉ាស៊ីន ATM នេះដើម្បីទិញមាស ដោយតម្លៃរបស់វាគឺត្រូវបានបង្ហាញតាមពេលវេលាជាក់ស្តែង នៅលើអេក្រង់របស់ម៉ាស៊ីនតែម្តង។
ក្រុមហ៊ុន Goldsikka បានឱ្យដឹងថា បន្ទាប់ពីបានធ្វើការស្រាវជ្រាវ ក្រុមហ៊ុនបានរកឃើញវាអាចទៅរួច ក្នុងការដាក់ឱ្យប្រើម៉ាស៊ីន ATM នេះ ដោយមានការគាំទ្របច្ចេកវិទ្យាក្រុមហ៊ុន OpenCube ហើយបានបញ្ជាក់ទៀតថា បើចង់ទិញមាសគឺអាចទិញតាមរយៈម៉ាស៊ីននេះបាន ដោយមិនចាំបាច់ចំណាយពេលទៅហាងលក់គ្រឿងអលង្ការនោះទេ។ រយៈពេលប្រតិបត្តិការនៃការស៊កកាតទិញមាសនេះ គឺមិនដល់ ១នាទីឡើយ។
អត្ថបទគួរអាន
សូមជម្រាបថា ម៉ាស៊ីន ATM នេះ ក៏បានបំពាក់ប្រព័ន្ធសុវត្ថិភាពផងដែរ ដោយរួមមានកាមេរ៉ា និងប្រព័ន្ធបន្លឺសំឡេងអាសន្ន ដែលអាចតភ្ជាប់ទំនាក់ទំនងជាមួយប៉ូលិសមូលដ្ឋានភ្លាមៗបាន។ ក្នុងករណីមានបញ្ហាបច្ចេកទេសមិនអាចដកមាសបាន គឺអតិថិជនអាចទទួលបានលុយត្រឡប់មកវិញ ក្នុងរយៈពេល ២៤ម៉ោង។
បន្ថែមលើសនេះ ក្រុមហ៊ុន Goldsikka ក៏មានគម្រោងដាក់ដំណើរការម៉ាស៊ីន ATM មាស ៣ទៀតផងដែរ នៅក្នុងទីក្រុង Hyderabad នេះ ក្នុងនោះក៏រួមមានព្រលានយន្តហោះផងដែរ។ ជារួម គឺក្រុមហ៊ុនគ្រោងដំឡើងម៉ាស៊ីន ATM មាសនេះ ចំនួន ៣ពាន់គ្រឿង នៅទូទាំងប្រទេសឥណ្ឌា ក្នុងរយៈពេល ២ឆ្នាំក្រោយ ព្រមទាំងមានមហិច្ឆតាដាក់នៅក្រៅប្រទេសទៀតផង។
សូមបញ្ជាក់ថា ឥណ្ឌា គឺជាប្រទេសប្រើប្រាស់មាសច្រើនបំផុតទី២ ក្នុងពិភពលោក។ ២ភាគ៣ នៃតម្រូវការមាសរបស់ឥណ្ឌា គឺមកពីតំបន់ជនបទ៕
