តួយ៉ាង តាមការរាយការណ៍របស់សារព័ត៌មានអន្តរជាតិធំៗ បានឲ្យដឹងថា មានរោងចក្រចម្រាញ់ប្រេងនៅជិតទីក្រុងកំពង់ផែស៊ីកា (Sikka) ភាគខាងលិចប្រទេសឥណ្ឌាជាកន្លែង ដែលក្រុមហ៊ុន Reliance Industries និងក្រុមហ៊ុនឥណ្ឌាមួយចំនួនទៀតកំពុងប្រតិបត្តិការនៅទីនោះ កំពុងស្ថិតក្រោមតាមដានរបស់សហរដ្ឋអាមេរិកនាពេលថ្មីៗនេះ ចំពោះការក្លាយជាមជ្ឈមណ្ឌលសម្រាប់«ការលាងសម្អាតប្រេង» របស់រុស្ស៊ីដើម្បីនាំចេញទៅតំបន់បស្ចិមលោក។
មន្ត្រីអាមេរិកជឿថា ប្រេងឆៅរបស់រុស្ស៊ីកំពុងលួចចម្រាញ់នៅក្នុងប្រទេសឥណ្ឌាមុនពេលនាំចេញទៅកាន់សហរដ្ឋអាមេរិក និងតំបន់អឺរ៉ុប ដោយជៀសផុតពីទណ្ឌកម្មដែលបានដាក់លើរដ្ឋាភិបាលរបស់ប្រធានាធិបតីរុស្ស៊ីលោក វ្លាឌីមៀ ពូទីន ចំពោះការលុកលុយលើអ៊ុយក្រែន។
លោក អាម៉ូស ហចស្តេន (Amos Hochstein) ទីប្រឹក្សាជាន់ខ្ពស់នៅក្រសួងការបរទេសសហរដ្ឋអាមេរិកសម្រាប់សន្តិសុខថាមពល បាននិយាយនៅក្នុងសវនាការព្រឹទ្ធសភាកាលពីពេលថ្មីៗនេះថា លោកបានណែនាំមន្រ្តីឥណ្ឌាសូមជៀសឱ្យឆ្ងាយពីការទិញប្រេងរបស់រស្ស៊ី។
លោក ហចស្តេន បានបន្ថែមថា លោកនឹងស្នើសុំ ២ ចំណុច គឺចំណុចទី១សុំឱ្យឥណ្ឌាកុំហួសហេតុពេក គឺកុំធ្វើទង្វើមើលទៅដូចជា ឥណ្ឌាកំពុងតែទាញយកប្រយោជន៍ពីការឈឺចាប់ដែលកំពុងតែកើតមាននៅក្នុងគ្រួសារអឺរ៉ុប និងសហរដ្ឋអាមេរិកអ៊ីចឹងអី។ ចំណុចទី២គឺត្រូវប្រាកដថាឥណ្ឌាចរចាឱ្យបានល្អ ព្រោះប្រសិនបើឥណ្ឌាមិនទិញប្រេងពីរុស្ស៊ីទេ គឺគ្មានអ្នកផ្សេងទៀតទិញវាឡើយ។
បើតាមក្រុមហ៊ុនស្រាវជ្រាវនិងវាយតម្លៃហិរញ្ញវត្ថុ Refinitiv បានឱ្យដឹងថា ប្រេងឆៅជិត ២៤ លានបារ៉ែលរបស់រុស្ស៊ីបានដឹកមកដល់ប្រទេសឥណ្ឌាក្នុងខែឧសភា ដែលបានកើនឡើងជាង ៨ ដងបើធៀបនឹងឆ្នាំមុន។ នៅក្នុងខែមិថុនា ចំនួននេះនៅតែខ្ពស់រហូតដល់ជាង ២០ លានបារ៉ែលបន្ថេមទៀត។
ការនាំចូលប្រេងរបស់រុស្ស៊ីបានកើនឡើងតាំងពីក្រុងម៉ូស្គូបានបើកការឈ្លានពានអ៊ុយក្រែនក្នុងខែកុម្ភៈ។ ការលក់ប្រេងនៅក្នុងប្រទេសឥណ្ឌាត្រូវបានគេប៉ាន់ប្រមាណថា មានចំនួនជិត២ ពាន់លានដុល្លារក្នុងពេលមួយខែឧសភាតែប៉ុណ្ណោះ ដែលធ្វើឱ្យវាក្លាយជាប្រភពចំណូលដ៏សំខាន់សម្រាប់រដ្ឋាភិបាលរបស់លោក ពូទីន។
អត្ថបទគួរអាន
ប្រេងរុស្ស៊ីប្រហែល ២៦ លានបារ៉ែលត្រូវបានគេជឿថា បានដឹកទៅដល់ទីក្រុងកំពង់ផែ Sikka ប្រទេសឥណ្ឌានៅចន្លោះខែមេសា ដល់ខែមិថុនាពោលគឺបានកើនឡើងជាងជាង៥ដង បើធៀបនឹងកម្រិតដឹកជញ្ជូនកាលពីឆ្នាំមុន ខណៈដែលប្រេងរុស្ស៊ីមានចំនួន ២០% នៃចំនួនសរុបដែលត្រូវបានបញ្ជូនទៅដល់ទីក្រុង Sikka តាមច្រកសមុទ្រ។
ប្រទេសឥណ្ឌាបានកែច្នៃប្រេងឆៅទៅជាប្រេងឥន្ធនៈសម្រាប់នាំចេញទៅក្រៅប្រទេសមានដូចជាប្រេងសាំង ប្រេងម៉ាស៊ូត និងប្រេងយន្តហោះ ហើយផលិតផលប្រេងដែលនាំចេញពីកំពង់ផែ Sikka មានចំនួនសរុបប្រហែល ៧៥ លានបារ៉ែលក្នុងអំឡុងខែមេសា ដល់ខែមិថុនាដោយក្នុងនោះ ២០% បាននាំទៅតំបន់អឺរ៉ុប ឬក៏សហរដ្ឋអាមេរិក។
បុគ្គលិកម្នាក់នៅក្រុមហ៊ុនលក់ប្រេងបោះដុំជប៉ុនធំមួយបាននិយាយថា ប្រេងទាំងនេះមិនបានរក្សាទុកក្នុងធុងផ្សេងៗគ្នាតាមប្រភពនីមួយៗនោះទេ ដូច្នេះហើយវាស្ទើរតែមិនអាចកំណត់បានច្បាស់ថា តើប្រេងទាំងនេះបាននាំចូលមកពីប្រភពណានោះឡើយ។
ក្រុមហ៊ុន Reliance Industries របស់ឥណ្ឌាបានបដិសេធធ្វើអត្ថាធិប្បាយលើការចោទប្រកាន់ដែលថា ប្រេងឆៅរបស់រុស្ស៊ីអាចនឹងត្រូវបានលាយបញ្ចូលគ្នាជាមួយវត្ថុធាតុដើមសម្រាប់ផលិតផលប្រេងដែលនាំចេញទៅកាន់តំបន់បស្ចិមលោក។
សូមបញ្ជាក់ថា ប្រេងរុស្ស៊ី ដែលលក់ទៅឲ្យឥណ្ឌា គឺមានការបញ្ចុះតម្លៃទាបជាងទីផ្សារប្រេងពិភពលោកដល់ទៅ ៣០ ទៅ៤០ដុល្លារក្នុងមួយធុងបារ៉ែលឯណោះ ដូច្នេះហើយ បានជាធ្វើឲ្យឥណ្ឌាបញ្ជាទិញយ៉ាងច្រើនយ៉ាងដូច្នេះ។ មិនមែនឥណ្ឌាទេដែលទិញ ប្រទេសចិនវិញក៏ទិញច្រើនដូចគ្នាដែរ។ តួយ៉ាង តាមរបាយការណ៍ពីសារព័ត៌មានរ៉យទ័របានឲ្យដឹងថា កាលពីខែឧសភាចិនមានការទិញប្រេងពីរុស្ស៊ីកើនឡើងដល់ទៅ ៥០%ឯណោះ ធៀបនឹងកាលពីឆ្នាំមុន៕
