ការលើកឡើងរបស់លោក នីទីន ហ្គាតការី រដ្ឋមន្ត្រីក្រសួងដឹកជញ្ជូនឥណ្ឌាយ៉ាងដូច្នេះ នៅក្រោយពេលដែលកំពូលមហាសេដ្ឋីអាមេរិក លោក Elon Musk ដែលជានាយកប្រតិបត្តិក្រុមហ៊ុន Tesla បានចុះបញ្ជីក្រុមហ៊ុននៅក្នុងប្រទេសឥណ្ឌា ដែលអាចនឹងចាប់ផ្ដើមគម្រោងរបស់ខ្លួននៅក្នុងពាក់កណ្ដាលឆ្នាំ២០២១នេះ។ ក្រុមហ៊ុន Tesla មានផែនការចាប់ផ្ដើមនាំចូល និងលក់រថយន្ដអេឡិចត្រូនិករបស់ខ្លួន Model 3 នៅក្នុងប្រទេសឥណ្ឌាឆាប់ៗនេះហើយ។
រដ្ឋមន្ត្រីដឹកជញ្ជូនឥណ្ឌាបានបញ្ជាក់ទៀតថា ជំនួសឲ្យការដំឡើងរថយន្ដនៅក្នុងប្រទេសឥណ្ឌា ក្រុមហ៊ុនគួរតែបង្កើតផលិតកម្មទាំងមូលនៅក្នុងប្រទេសឥណ្ឌាតែម្ដង ដោយជួលដៃគូក្នុងស្រុកសម្រាប់បម្រើដល់ការផលិតរបស់ក្រុមហ៊ុនTeslaនេះ។ ដូច្នេះ រដ្ឋនឹងអាចផ្ដល់សម្បទាន ដល់ក្រុមហ៊ុនបានកាន់តែច្រើន
អត្ថបទទាក់ទង!
រដ្ឋមន្ត្រីក្រសួងដឹកជញ្ជូនឥណ្ឌាបានសង្កត់ធ្ងន់ថា «រដ្ឋាភិបាលនឹងធ្វើឲ្យប្រាកដថា តម្លៃផលិតកម្មសម្រាប់ក្រុមហ៊ុនTesla នឹងមានទាបជាងគេបំផុតក្នុងពិភពលោក គឺទាបជាងប្រទេសចិនទៅទៀត នៅពេលដែលក្រុមហ៊ុនចាប់ផ្ដើមរោងចក្រផលិតរថយន្ដអគ្គីសនីរបស់ខ្លួននៅឥណ្ឌា។ យើងនឹងធានាធ្វើឲ្យបាន !»។
ប្រទេសឥណ្ឌាចង់ជំរុញរោងចក្រផលិតយានយន្ដអគ្គិសនីក្នុងស្រុក ផលិតអាគុយ និងគ្រឿងបង្គុំ ដើម្បីកាត់បន្ថយថ្លៃចំណាយនាំចូល និង ការបំពុលបរិស្ថានក្នុងទីក្រុងផងដែរ។
ទោះបីយ៉ាងណា ប្រទេសឥណ្ឌា ត្រូវបានគេមើលឃើញថា ហាក់មានទីផ្សារក្មេងខ្ចីនៅឡើយ សម្រាប់ទីផ្សារយានយន្តអគ្គិសនីនេះ ដោយកាលពីឆ្នាំមុនឥណ្ឌាលក់បានរថយន្ដប្រភេទនេះ ប្រមាណតែ ៥ពាន់គ្រឿងប៉ុណ្ណោះ ក្នុងចំណោមរថយន្ដសរុប ២លាន៤សែនគ្រឿងដែលបានលក់កាលពីឆ្នាំមុន ដោយសារតែហេដ្ឋារចនាសម្ព័ន្ធសម្រាប់ផ្ដល់ជាកន្លែងសាកអាគុយមិនទាន់មានដំណើរការនៅឡើយ ហើយរថយន្ដអគ្គិសនីក៏មានតម្លៃខ្ពស់ដែរ។
ផ្ទុយទៅវិញ សម្រាប់ប្រទេសចិន ដែលក្រុមហ៊ុន Tesla បានផលិតរថយន្ដអគ្គិសនីនៅទីនោះ មានការលក់រថយន្ដប្រភេទដឹកអ្នកដំណើរប្រើថាមពលថ្មី មានដល់ទៅ ជាង១លាន២សែនគ្រឿង រួមទាំងរថយន្ដអគ្គិសនីផ្សេងទៀត សរុបមានដល់ទៅ ២០លានគ្រឿង កាលពីឆ្នាំមុន ពោលគឺ ទីផ្សារចិនមានទំហំជាង១ភាគ៣ទៅហើយ នៃការលក់ទូទាំងសកលលោករបស់ក្រុមហ៊ុន Tesla៕
None
