រដ្ឋមន្ត្រីក្រសួងសុខាភិបាលឥណ្ឌូនេស៊ី លោកប៊ូឌី ហ្គាណាឌី សាឌីគីន បានបង្ហាញមហិច្ឆតារបស់ខ្លួន ដោយគ្រោងនឹងចាប់ផ្តើមគំនិតផ្តួចផ្តើមផ្តល់អាទិភាពក្នុងការទិញវ៉ាក់សាំងការពារជំងឺកូវីដ -១៩ ពីក្រុមហ៊ុន ដែលបានចែករំលែកបច្ចេកវិទ្យា និង បង្កើតការផលិតវ៉ាក់សាំងនៅក្នុងប្រទេសឥណ្ឌូនេស៊ីផ្ទាល់។
រដ្ឋមន្ត្រីក្រសួងសុខាភិបាលឥណ្ឌូនេស៊ី បានបន្តទៀតថា ប្រទេសឥណ្ឌូនេស៊ីមានទីតាំងល្អក្នុងការនាំចេញវ៉ាក់សាំងនៅជុំវិញពិភពលោក ជាពិសេសដោយសារប្រទេសនេះសម្បូរប្រជាជនមូស្លីមច្រើនជាងគេបំផុតនៅលើពិភពលោក ហើយអាចធានាបានថា ការចាក់វ៉ាក់សាំងនឹងមិនមានការប៉ះពាល់ទៅដល់អ្នកកាន់សាសនាអ៊ីស្លាមនោះឡើយ។
ជាក់ស្ដែង ក្រុមហ៊ុនឱសថឥណ្ឌូនេស៊ីកំពុងពិភាក្សាជាមួយក្រុមហ៊ុនផលិត និង អភិវឌ្ឍន៍វ៉ាក់សាំងជាច្រើន ក្នុងនោះក៏មានក្រុមហ៊ុន ស៊ីណូវ៉ាក់ផងដែរ។ តែយ៉ាងណាមិញ រដ្ឋាភិបាលឥណ្ឌូនេស៊ី ក៏បើកឱកាសដូចគ្នាចំពោះក្រុមហ៊ុន AstraZeneca និង Pfizer ពោលគឺ នឹងបើកចំហចំពោះក្រុមហ៊ុនផលិតវ៉ាក់សាំងទាំងអស់មកកាន់ឥណ្ឌូនេស៊ី។
ទន្ទឹមនេះ ក្រុមហ៊ុនឱសថរដ្ឋធំជាងគេរបស់ឥណ្ឌូនេស៊ីបានបញ្ជាក់ថា កិច្ចពិភាក្សាកំពុងដំណើរការហើយ តែជំហានដំបូង គឺត្រូវសហការគ្នាលើការផ្ទេរបច្ចេកវិទ្យា។ ដូចនេះ យ៉ាងហោចណាស់ វានឹងចំណាយពេលពីរ ឬបីឆ្នាំ ដើម្បីសាងសង់រោងចក្រផលិតវ៉ាក់សាំងនេះ។
អត្ថបទគួរអាន
សូមជម្រាបថា អ្នកនាំពាក្យរបស់អង្គការសុខភាពពិភពលោកបានឱ្យដឹងថា ប្រទេសឥណ្ឌូនេស៊ីគឺជាប្រទេសមួយក្នុងចំណោមប្រទេស ២៥ ដែលមានចំណូលទាប និងមធ្យម ហើយបានបង្ហាញការចាប់អារម្មណ៍ក្នុងការធ្វើជាមជ្ឈមណ្ឌលផ្តល់វ៉ាក់សាំងកូវីដ១៩។
គួរកត់សម្គាល់ថា អត្រានៃការឆ្លង និងការស្លាប់នៅឥណ្ឌូនេស៊ីបានធ្លាក់ចុះខ្លាំង នៅក្នុងរយៈពេលប៉ុន្មានសប្តាហ៍ថ្មីៗនេះ។ ដោយគិតត្រឹមថ្ងៃទី ១៥ ខែកញ្ញា អ្នកឆ្លងថ្មីមានចំនួនជិត ៤ ពាន់នាក់ និងករណីស្លាប់ថ្មីប្រមាណ ២៦០ នាក់ ដែលធ្វើឱ្យអ្នកឆ្លងសរុបកើនឡើង ជាង ៤ លាននាក់ និងអ្នកស្លាប់សរុប ជាង ១៤ម៉ឺននាក់។
ជាមួយគ្នានេះ ប្រទេសឥណ្ឌូនេស៊ី ទើបតែបានចាក់វ៉ាក់សាំងគ្រប់ចំនួន ២ដូស ២៥ ភាគរយប៉ុណ្ណោះ នៃប្រជាជនគោលដៅរបស់ខ្លួន ២០៨ លាននាក់។ ប្រទេសឥណ្ឌូនេស៊ីក៏កំពុងបន្តកិច្ចខិតខំប្រឹងប្រែងក្នុងការចាក់ដូសជំរុញជូនពលរដ្ឋរបស់ខ្លួនផងដែរ៕
None
