ក្នុងពេលជាមួយគ្នា សភាឥណ្ឌូនេស៊ីក៏បានផ្តល់សច្ចាប័នលើកិច្ចព្រមព្រៀងពាណិជ្ជកម្មទ្វេភាគីជាមួយកូរ៉េខាងត្បូង ដោយសង្ឃឹមថា នឹងទាក់ទាញការវិនិយោគដើម្បីអភិវឌ្ឍឧស្សាហកម្មរថយន្តអគ្គិសនី និងអាគុយនៅក្នុងស្រុកផងដែរ។នេះបើតាមការចុះផ្សាយដោយទីភ្នាក់ងារសារព័ត៌មានរ៉យទ័រ។
រដ្ឋមន្ត្រីពាណិជ្ជកម្មឥណ្ឌូនេស៊ីលោក ហ្សូលគីលី ហាសាន់(Zulkifli Hasan) បាននិយាយថា RCEP នឹងជំរុញពាណិជ្ជកម្ម ការវិនិយោគផ្ទាល់ និងបង្កើនកំណើន GDP របស់ប្រទេសបន្ថែមក្នុងអត្រា ០,០៧%។ លោកចាត់ទុកកិច្ចព្រមព្រៀងនេះថា ជាផ្លូវដើម្បីចូលទៅក្នុងទីផ្សារពិភពលោក ហើយវាជាពេលវេលាសម្រាប់ប្រទេសឥណ្ឌូនេស៊ីក្នុងការវាយលុកទីផ្សារអន្តរជាតិផងដែរ។
កិច្ចព្រមព្រៀង RCEP ដែលប្រទេសចិនបានផ្តួចផ្តើមឡើងនោះ បានគ្របដណ្តប់ជិតមួយភាគបីនៃចំនួនប្រជាជនពិភពលោក និងប្រហែល ៣០% នៃផលិតផលក្នុងស្រុកសរុបរបស់ពិភពលោកផងដែរ។ វាត្រូវបានចាប់កំណើតដំបូងក្រោមការព្រមព្រៀងរវាងមេដឹកនាំនៃប្រទេសអាស៊ីប៉ាស៊ីហ្វិកចំនួន១៥កាលពីខែវិច្ឆិកាឆ្នាំ២០២០។
កិច្ចព្រមព្រៀងពាណិជ្ជកម្មដ៏ធំ ដែលមិនរាប់បញ្ចូលសហរដ្ឋអាមេរិកនេះ បានចូលជាធរមាននៅថ្ងៃទី០១ខែមករាឆ្នាំនេះ បន្ទាប់ពីប្រទេសចំនួន ៧នៅអាស៊ីអាគ្នេយ៍ បូករួម អូស្ត្រាលី ចិន ជប៉ុន និងនូវែលសេឡង់បានផ្តល់សច្ចាប័នលើកិច្ចព្រមព្រៀងនេះកាលពីឆ្នាំទៅមិញរៀងៗខ្លួន។ ជាមួយគ្នានេះ កម្ពុជាដែលជាសមាជិក RCEP ដែរនោះ ក៏បានផ្ដល់សច្ចាប័នរួចហើយដែរ កាលពីខែតុលាឆ្នាំ២០២១។
អត្ថបទគួរអាន
ដោយឡែក សម្រាប់កិច្ចព្រមព្រៀងជាមួយកូរ៉េខាងត្បូង ទីក្រុងហ្សាកាតា និងសេអ៊ូលនឹងលុបចោលជាង ៩០% នៃរនាំងពន្ធរៀងៗខ្លួន។ ក្រសួងពាណិជ្ជកម្មឥណ្ឌូណេស៊ីបាននិយាយនៅក្នុងសេចក្តីថ្លែងការណ៍មួយថា ប្រទេសឥណ្ឌូណេស៊ីនឹងផ្តល់ការអនុគ្រោះពន្ធដើម្បីគាំទ្រដល់ការវិនិយោគរបស់កូរ៉េក្នុងវិស័យជាច្រើនចាប់ពីរថយន្តរហូតដល់សម្លៀកបំពាក់។
សូមជម្រាបថា នៅមួយរយៈចុងក្រោយនេះក្រុមហ៊ុនកូរ៉េខាងត្បូងជាច្រើន ពិសេសក្រុមហ៊ុនរថយន្ត មានចំណាប់អារម្មណ៍ខ្លាំងក្នុងការវិនិយោគនៅប្រទេសបងធំសេដ្ឋកិច្ចរបស់អាស៊ានមួយនេះ។ ក្នុងនោះមានដូចជា Hyundai Motor Group និង LG Energy Solution បច្ចុប្បន្នស្ថិតក្នុងចំណោមអ្នកវិនិយោគកំពូលនៅក្នុងឧស្សាហកម្មរថយន្តអគ្គិសនី និងថ្មអាគុយនៅក្នុងប្រទេសឥណ្ឌូនេស៊ី ដោយសារក្រុមហ៊ុនទាំងនេះសម្លឹងឃើញការទាញយកអត្ថប្រយោជន៍ សារធាតុនីកែលដ៏សម្បូរបែប ដែលជាធនធានធម្មជាតិដ៏សំខាន់របស់ឥណ្ឌូនេស៊ី និងវត្ថុធាតុដើមចំបងក្នុងការផលិតអាគុយអគ្គិសនី៕
