១, ការចង់បានផលចំណេញក្នុងរយៈពេលខ្លី៖ តាមគោលការណ៍គណនេយ្យ ដីធ្លី និងប្រភេទអចលនទ្រព្យទាំងអស់ត្រូវបានចាត់ទុកថាជាទ្រព្យរយៈពេលវែង ដែលអាចបង្វិលជាសាច់ប្រាក់វិញក្នុងរយៈពេលយ៉ាងតិច១ឆ្នាំ។ ប៉ុន្តែ មានអ្នកវិនិយោគជាច្រើនមិនយល់ពីគោលការណ៍នេះហើយបន្ទាប់ពីវិនិយោគរួចតែងទន្ទឹងចង់បានផលចំណេញភ្លាមៗ។ ហើយជារឿយៗយើងតែងឭពាក្យថា រកស៊ីអចលនទ្រព្យ ឬដីធ្លីមិនល្អទេព្រោះកប់លុយ។ តាមពិតមិនកប់លុយទេ មកពីអ្នកវិនិយោគរំពឹងខុស និងគ្មានផែនការវិនិយោគរយៈពេលវែង។
២, ការចង់បានលំហូរសាច់ប្រាក់ (ចំណូល) ពីការវិនិយោគ៖ បន្ថែមលើពេលវេលារយៈពេលវែង ការវិនិយោគលើដីធ្លីត្រូវការដើមទុនច្រើន អ្នកវិនិយោគខ្លះមានទុនតិចតួចហើយប្រាថ្នាចង់បានលំហូរសាច់ប្រាក់ពីការជួលដី ការណ៍នេះមិនអាចសំរេចបាននោះទេ។ ទោះបីជួលជាដីទទេ ធ្វើជាឃ្លាំង ឬជាតូបជួល ក៏ត្រូវការដើមទុនយ៉ាងតិចចន្លោះពី១០-២០ម៉ឺនដុល្លារដែរ។
អត្ថបទទាក់ទង!
៣, ខ្វះផែនការហិរញ្ញវត្ថុ៖ ដោយសារតែចង់បានចំណូល និងផលចំណេញរយៈពេលខ្លី អ្នកវិនិយោគជាច្រើនមិនបានធ្វើផែនការហិរញ្ញវត្ថុសម្រាប់រយៈពេលវែងនោះទេ។ ប្រការនេះហើយ ដែលនាំឲ្យពួកគេធ្លាក់ក្នុងវិបត្តិលំហូរសាច់ប្រាក់ និងឈានដល់ដំណាក់កាលបង្ខំចិត្តលក់ខាតផងក៏មាន។
៤, ខ្វះយន្តការទប់ទល់នឹងហានិភ័យ៖ ការវិនិយោគលើដីធ្លីត្រូវការដើមទុនច្រើន និងរយៈពេលវែង ដូច្នេះអ្នកវិនិយោគត្រូវកំណត់នូវយន្តការនានាដើម្បីទប់ទល់នឹងហានិភ័យដែលកើតឡើងជាយថាហេតុ។ យន្តការរួមមានបង្កើតចំណូលពីប្រភពផ្សេងៗ អភិវឌ្ឍគម្រោងនានា ឬត្រៀមលក់ទ្រព្យសម្បត្តិដែលមិនកើនតម្លៃនាពេលអនាគត។
៥, មិនមានចំណេះដឹងគ្រប់គ្រាន់៖ អ្វីដែលបានរៀបរាប់ក្នុងចំណុចទី១ ទី២ ទី៣ និងទី៤ ខាងលើសុទ្ធតែជាចំណេះដឹងចាំបាច់។ ប៉ុន្តែ បន្ថែមលើនេះ អ្នកវិនិយោគត្រូវមានការយល់ដឹងផ្សេងៗទៀតដូចជា ប្រភេទដី ទំហំ ទំរង់ ទីតាំង និងលក្ខខណ្ឌច្បាប់នានា។ល។ ជាងនេះទៅទៀត ត្រូវមានការយល់ដឹងថា លក្ខខណ្ឌដីបែបហ្នឹង ទំរង់បែបហ្នឹង ទីតាំងបែបហ្នឹង តម្លៃប៉ុណ្ណឹងវាសមនឹងយកទៅអភិវឌ្ឍជាអ្វី? ហើយអ្នកណាជាអតិថិជន? សរុបមក អ្នកវិនិយោគ ត្រូវមានចំណេះដឹងលម្អិត ហើយចាត់ទុកការវិនិយោគជាអាជីពទើបជាការល្អ។ បើវិនិយោគតាមគេតាមឯង ឬទិញដីបន្តិចបន្តួចទុកយកចំណេញ នោះឱកាសជោគជ័យមានតិចណាស់។
៦, ខ្វះព័ត៌មាន៖ នៅក្នុងការវិនិយោគវិស័យដីធ្លីក៏ដូចជាការធ្វើអាជីវកម្មនានាដែរ ទាមទារឲ្យ អ្នកមានព័ត៌មានគ្រប់ជ្រុងជ្រោយ។ ដូចជាស្ថានភាពតម្រូវការ និន្នាការទីផ្សារ តម្លៃ ទីតាំងភូមិសាស្ត្រ ទំនាក់ទំនងជាមួយអាជ្ញាធរមូលដ្ឋាន គម្រោងអភិវឌ្ឍន៍ហេដ្ឋារចនាសម្ពន្ធ័នានា។ល។ ដូច្នេះ អ្នកត្រូវផ្តោតការវិនិយោគតែលើតំបន់ដែលអ្នកអាចក្តោបបានព័ត៌មានគ្រប់ជ្រុងជ្រោយ។
ចំពោះកត្តាចំណេះដឹងនិងព័ត៌មាននេះដែរ កន្លងទៅលោក ឧកញ៉ា ចេង ខេង អគ្គនាយកក្រុមហ៊ុនអចនទ្រព្យស៊ីភីអែល តែងតែលើកឡើងនូវបញ្ហាទាំង២នេះ ព្រោះថា ក្នុងនាមលោកជាអ្នករកស៊ីនៅក្នុងវិស័យអចលទ្រព្យអស់ជារយៈពេល២០ឆ្នាំ លោកថា លោកមិនដែលលើកនូវអ្វីដែលមិនមែនជាការពិតនោះទេ ហើយលោកតែងតែទទូចឲ្យអ្នកដែលមានបំណងចង់វិនិយោគទៅលើវិស័យនេះ ព្យាយាមស្វែងរកព័ត៌មានឲ្យបានគ្រប់ជ្រុងជ្រោយ ហើយបើសិនជាខ្លួនខ្វះចំណេះដឹង និងព័ត៌មានទាំងនេះ ត្រូវស្វែងរកការពិភាក្សាពីអ្នកជំនាញ ជៀសវាងសម្រេចចិត្តបោះទុនហើយ មានការស្តាយក្រោយ៕
None
