រដ្ឋមន្ត្រីការបរទេសជប៉ុន លោកយ៉ូស្សីមាសា (Yoshimasa Hayashi) ជាមួយរដ្ឋមន្ត្រីការពារជាតិ លោកយ៉ាសូកាហ្សូ (Yasukazu Hamada) បានជួបជាមួយរដ្ឋមន្ត្រីការបរទេសឥណ្ឌា លោកចៃសានកា (Subrahmanyam Jaishankar) និងរដ្ឋមន្ត្រីក្រសួងការពារជាតិ លោករ៉ាចណាត សីង (Rajnath Singh) នៅទីក្រុងតូក្យូក្នុងកិច្ចពិភាក្សា «ពីរបូកពីរ» របស់ខ្លួន។
រដ្ឋមន្ត្រីទាំងបួនរូបបានបញ្ជាក់ឡើងវិញ ពីការប្រឆាំងរបស់ខ្លួនចំពោះការប៉ុនប៉ងផ្លាស់ប្តូរសណ្តាប់ធ្នាប់ពិភពលោកដោយឯកតោភាគី ពីសំណាក់ប្រទេសចិនក្នុងការពង្រីកដែនសីមារបស់ខ្លួននៅក្នុងសមុទ្រចិនខាងត្បូង និងសមុទ្រចិនខាងកើត។
ក្នុងសេចក្តីថ្លែងការណ៍រួមមួយក្រោយកិច្ចប្រជុំ ភាគីជប៉ុនបានគូសបញ្ជាក់អំពីផែនការពង្រឹងសមត្ថភាពការពារខ្លួនរយៈពេលប្រាំឆ្នាំ រួមទាំងសមត្ថភាពក្នុងវាយបកផងដែរ។ រីឯប្រទេសឥណ្ឌា ក៏បានបង្ហាញពីការគាំទ្ររបស់ខ្លួនឆ្ពោះទៅរកការពង្រឹងកិច្ចសហប្រតិបត្តិលើវិស័យយោធា និងសន្តិសុខដូចគ្នា។
នាយករដ្ឋមន្ត្រីឥណ្ឌា លោក Narendra Modi ក៏ត្រូវបានគេរំពឹងថា នឹងទៅជួបជាមួយនាយករដ្ឋមន្ត្រីជប៉ុន លោក Fumio Kishida ក្នុងអំឡុងពេលលោកនឹងទៅចូលរួមពិធីបុណ្យសពអតីតមេដឹកនាំជប៉ុន លោក Shinzo Abe នៅថ្ងៃទី ២៧ ខែ កញ្ញា ខាងមុខផងដែរ។
មែនទែនទៅ ក្នុងពេលថ្មីៗនេះ ប្រទេសជប៉ុន និងឥណ្ឌាកំពុងខិតជិតគ្នាលើវិស័យយោធា និងសន្តិសុខជាងពេលណាណាទាំងអស់ ដោយមើលឃើញពីការពង្រីកខ្លួនរបស់យោធាចិនក្នុងសមុទ្រចិនខាងត្បូង ពិសេសភាពតានតឹងនៅច្រកសមុទ្រតៃវ៉ាន់ រហូតដល់រឿងរ៉ាវដ៏ចម្រូងចម្រាស់នៃកប៉ាលយោធាចិន ដែលបានចុះចតនៅកំពង់ផែស្រីលង្កាកាលពីខែមុន ដែលជាបញ្ហាដ៏រសើបសម្រាប់ឥណ្ឌា។
អត្ថបទគួរអាន
លើសពីនេះ ជប៉ុនក៏ចង់ទប់ទល់ទំនាក់ទំនងជិតស្និទ្ធរបស់ឥណ្ឌាជាមួយរុស្ស៊ីផងដែរ ខណៈដែលប្រទេសចិន និងរុស្ស៊ីកាន់តែមានភាពជិតស្និទ្ធផ្នែកយោធានោះ ជប៉ុន និងសហរដ្ឋអាមេរិកផ្ទុយទៅវិញមានការព្រួយបារម្ភថា ទំនាក់ទំនងកាន់តែជិតស្និទ្ធរវាងរុស្ស៊ី និងឥណ្ឌាអាចធ្វើឲ្យខូចខាតនូវតុល្យភាពអំណាចយោធាបច្ចុប្បន្ននៅតំបន់អាស៊ីបូព៌ា។ ហេតុអ្វី? នោះក៏ដោយសារគេមើលឃើញថា រុស្សីបានផ្គត់ផ្គង់សម្ភារៈយោធាជាងពាក់កណ្តាលទៅឲ្យឥណ្ឌាក្នុងរយៈពេលប្រាំឆ្នាំចុងក្រោយនេះ ហើយនៅពេលថ្មីៗនេះ ឥណ្ឌាក៏បានចូលរួមសមយុទ្ធវុស្តុក (Vostok 2022) ដែលដឹកនាំដោយរុស្សីផងដែរ។
ទោះយ៉ាងណា ទីក្រុងញូដេលីវិញសម្លឹងឃើញថា ការចងទំនាក់ទំនងជាមួយរុស្សី គឺជាគន្លឹះដ៏សំខាន់ក្នុងការត្រួតពិនិត្យមើលទីក្រុងប៉េកាំង ក៏ព្រោះតែទំនាក់ទំនងរវាងញូដេលី និងទីក្រុងប៉េកាំងនៅតែជាប់គាំងមកទល់នឹងពេលនេះ ដែលបណ្តាលមកពីការប៉ះទង្គិចគ្នានៅតាមព្រំដែន និងឥទ្ធិពលចិនកំពុងតែរះឡើងនៅប៉ាគីស្ថាន និងស្រីលង្កាជាដើម។
ទន្ទឹមនឹងនេះ ឥណ្ឌាក៏ក្រឡេកឃើញថា កិច្ចសហប្រតិបត្តិការជាមួយជប៉ុន និងសហរដ្ឋអាមេរិក ក៏ជាមធ្យោបាយមួយ ដើម្បីទប់ទល់នឹងការពង្រីកខ្លួនរបស់ចិននៅដែនសមុទ្រតែម្តង ហើយប្រទេសជប៉ុនសង្ឃឹមថា កិច្ចសន្ទនាសន្តិសុខចតុភាគី Quad ដែលរួមមានសហរដ្ឋអាមេរិក និងអូស្ត្រាលីផងនោះ នឹងចងឥណ្ឌានៅក្នុងវិស័យសន្តិសុខ ដូចជាការវិនិយោគលើហេដ្ឋារចនាសម្ព័ន្ធ និងបច្ចេកវិទ្យាទំនើបផងដែរ៕
