អ្នកជំនាញ៖ ចរន្ដពុះដីឡូតិ៍នៅឆ្នាំ២០១៨នេះ នឹងថយចុះជាងឆ្នាំមុន

ចរន្តនៃការអភិវឌ្ឍពុះដីឡូតិ៍លក់នៅឆ្នាំ២០១៨នេះ ត្រូវបានអ្នកជំនាញផ្នែកអចលនទ្រព្យអះអាងថា នឹងមានការថយចុះជាងឆ្នាំមុន ខណៈដែលកន្លងមក ការទិញលក់ដីឡូតិ៍ ពិសេស នៅតាមតំបន់ជាយៗរាជធានីភ្នំពេញ មានការពេញនិយមយ៉ាងភ្លូកទឹកភ្លូកដី។ យ៉ាងណាក៏ដោយ បើតាមក្រុមអ្នកជំនាញអចលទ្រព្យ បើមើលឲ្យស៊ីជម្រៅសម្រាប់រយៈពេលវែង ការអភិវឌ្ឍពុះដីឡូតិ៍នេះ គឺមានភាពវិជ្ជមានតិចជាងអវិជ្ជមាន។

អ្នកជំនាញថា ឆ្នាំ២០១៨នេះ ចរន្តនៃការពុះដីឡូតិ៍លក់នឹងថមថយចុះជាងឆ្នាំមុន។

លោកឧកញ៉ា នួន រិទ្ធី ប្រធានក្រុមហ៊ុនអចលនទ្រព្យ KFA ដែលបាននិងកំពុងវិវឌ្ឍខ្លួនទៅជាក្រុមហ៊ុនអភិវឌ្ឍន៍អចលនទ្រព្យមួយនៅកម្ពុជាដែរនោះ បានមានប្រសាសន៍ថា នៅឆ្នាំ២០១៨នេះ តាមការស្រាវជ្រាវ និងប៉ាន់ស្មានរបស់ក្រុមហ៊ុនលោកផ្ទាល់ បានមើលឃើញថា ចលនាទីផ្សារពុះដីឡូតិ៍នឹងមានការថយចុះ ដោយសារតែបច្ចុប្បន្ន កំណើននៃការផ្គត់ផ្គង់លំនៅដ្ឋានតម្លៃសមរម្យ បាននិងកំពុងមានការអភិវឌ្ឍកាន់តែច្រើនឡើងៗ ដែលបានបង្វែរឲ្យប្រជាពលរដ្ឋដែលមានចំណូលទាបនិងមធ្យម ងាកមកការទិញលំនៅដ្ឋានទាំងនោះវិញ ជាជាងការទិញដីឡូតិ៍។

មួយវិញទៀត ដ្បិតថា ដីឡូតិ៍មានតម្លៃសមរម្យជាងការទិញផ្ទះក៏ដោយ ប៉ុន្ដែ ក៏មានអ្នកអភិវឌ្ឍពុះដីឡូតិ៍មួយចំនួន ហាក់មិនសូវគោរពទៅតាមបទដ្ឋានរបស់អាជ្ញាធរដែលបានកំណត់ ដែលធ្វើឲ្យអ្នកទិញដីឡូតិ៍មិនហ៊ានសម្រេចចិត្តទិញដូចមុនៗនោះឡើយ។

បើតាមការគូសបញ្ជាក់ពីលោកឧកញ៉ា នួន រិទ្ធី នៅថ្ងៃខាងមុខ ការអភិវឌ្ឍពុះដីឡូតិ៍នេះ ក៏អាចនឹងត្រូវបានរឹតបន្តឹងពីអាជ្ញាធរផងដែរ ប្រសិនបើអ្នកអភិវឌ្ឍពុះដីឡូតិ៍មិនព្រមអនុវត្តទៅតាមបទដ្ឋានរបស់អាជ្ញាធរ។ តួយ៉ាង ដីឡូតិ៍មួយចំនួនពុះលក់ទំហំតូច ខ្វះប្រព័ន្ធលូទឹក និងការតភ្ជាប់ទឹកភ្លើង ព្រមទាំងមិនមានបន្សល់ចំណីមុខ និងក្រោយផ្ទះ និងការសង់សំណង់មិនមានសោភ័ណភាពជាដើម។

លោកឧកញ៉ា នួន រិទ្ធី អគ្គនាយកក្រុមហ៊ុនសេវាអចលនទ្រព្យ KFA។

លោកឧញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL ដែលជាក្រុមហ៊ុនមានវ័យចំណាស់ជាងគេមួយនៅកម្ពុជា បានលើកឡើងដែរថា ថ្វើបើ បច្ចុប្បន្ន ការទិញលក់ដីឡូតិ៍មានសន្ទុះកើនឡើង ដែលបង្ហាញពីសញ្ញារស់រវើកនៃទីផ្សារដីធ្លីក៏ដោយ ប៉ុន្ដែ ការពុះដីឡូតិ៍ដែលមិនមានស្ដង់ដារ ឬមិនបានគិតគូរពីហេដ្ឋារចនាសម្ព័ន្ធច្បាស់លាស់ វានឹងធ្វើឲ្យអ្នករស់នៅតំបន់នោះ នឹងជួបញ្ហាទៅថ្ងៃអនាគត ហើយរាជរដ្ឋាភិបាលក៏គួរតែគិតគូរពីបញ្ហានេះផងដែរ។ ជាក់ស្ដែង ដីឡូតិ៍ភាគច្រើន ត្រូវបានពុះលក់ ដោយមិនមានប្រព័ន្ធលូទឹក និងផ្លូវត្រឹមត្រូវ មិនមានទុកទីធ្លារ សួនច្បារ ឬកន្លែងហាត់ប្រាណជាដើម។

បញ្ហាទាំងអស់នេះហើយ នឹងធ្វើឲ្យមានបញ្ហាប្រឈមទៅថ្ងៃអនាគត ហើយតម្លៃដីឡូតិ៍នោះទៀតសោត ក៏មិនអាចឡើងថ្លៃបានខ្ពស់នោះដែរ។ លោកឧកញ៉ា បានគូសបញ្ជាក់ទៀតថា ការពុះដីឡូតិ៍ដោយមិនស្របទៅតាមបទដ្ឋាន ឬប្លង់គោលរបស់អាជ្ញាធរ វាក៏នឹងធ្វើឲ្យខូចទ្រង់ទ្រាយដីសម្រាប់ការអភិវឌ្ឍសំខាន់ៗនាពេលអនាគត ហើយវាក៏ជាបញ្ហាឈឺក្បាលមួយដែលអាជ្ញាធរនឹងត្រូវប្រឈម ប្រសិនបើមិនមានវិធានការទប់ស្កាត់ឲ្យបានជាក់លាក់។

លោកឧកញ៉ា ចេង ខេង ស្ថាបនិក និងជាអគ្គនាយកក្រុមហ៊ុនអចលនទ្រព្យ CPL។

បើតាមអ្នកជំនាញអចលនទ្រព្យខាងលើ មុននឹងឈានទៅផ្ដល់ជូនអាជ្ញាប័ណ្ណក្នុងការអភិវឌ្ឍដីឡូតិ៍ទៅកាន់ក្រុមហ៊ុនអភិវឌ្ឍន៍ អាជ្ញាធរ ពិសេស ក្រសួងរៀបចំដែនដី នគរូបនីយកម្ម និងសំណង់ គួរតែធ្វើការត្រួតពិនិត្យឲ្យបានម៉ត់ចត់លើគម្រោងនោះ ពិសេស គឺការអភិវឌ្ឍស្របទៅតាមបទដ្ឋាន មានប្រព័ន្ធហេដ្ឋារចនាសម្ព័ន្ធត្រឹមត្រូវ និងធ្វើការតាមដានការសាងសង់នានា បន្ទាប់ពីការទិញដីនោះជាដើម ដើម្បីធានាថា ការសង់សំណង់ទាំងនោះត្រឹមត្រូវ តាមគោលការណ៍អភិវឌ្ឍន៍ទីក្រុងជាដើម ជៀសវាងការប្រឈមនឹងបញ្ហាទៅថ្ងៃក្រោយ។

សូមជម្រាបដែរថា បច្ចុប្បន្ន ការពុះដីឡូតិ៍នៅតំបន់ជាយៗរាជធានីភ្នំពេញ បាននិងកំពុងមានការផុសផុលយ៉ាងខ្លាំង ពិសេស គឺភាគច្រើន មានតំបន់ប៉ែកខាងលិចរាជធានីភ្នំពេញ ដូចជាតំបន់ទំបន់កប់ស្រូវ សង្កាត់ពន្សាំង និងព្រែកព្នៅ ជាដើម និងប៉ែកខាងត្បូងឈៀងខាងលិច ក៏មានការពុះដីឡូតិ៍ខ្លាំងផងដែរ។ លើសពីនេះ សូម្បីតែនៅតាមបណ្ដាខេត្តមួយចំនួនក៏មានការនិយមពុះដីឡូតិ៍នេះ ហើយបើតាមការអះអាងពីអ្នកជំនាញ គឺមានអ្នកអភិវឌ្ឍភាគច្រើនមិនសូវបានគិតគូរពីប្រព័ន្ធហេដ្ឋារចនាសម្ព័ន្ធច្បាស់លាស់នោះទេ។ ដូច្នេះ មុននឹងសម្រេចចិត្តទិញដីឡូតិ៍ ចូរអ្នកគិតគូរឲ្យបានគ្រប់ជ្រុងជ្រោយ ជាពិសេស ការពិនិត្យទៅលើប្លង់ដីជាមួយនឹងម្ចាស់គម្រោង ជាដើម៕