គម្រោងកញ្ចប់ថវិកាចំណាយខាងលើនឹងត្រូវ បញ្ចូនទៅរដ្ឋសភាជប៉ុន នៅខែ មករាខាងមុខ ក្រោយការអនុម័តដោយគណៈរដ្ឋមន្ត្រីនៅចុងខែធ្នូនេះ។
ក្នុងចំណោមខ្ទង់ចំណាយទាំងអស់ ការចំណាយទាក់ទងនឹងជំងឺរាតត្បាតកូវីដ១៩ មានចំណែកធំបំផុត ក្នុងទំហំទឹកប្រាក់សរុបចំនួន ៥ទ្រីលានយ៉េន ឬស្មើនឹងជាង ៤៣ពាន់លានដុល្លារអាមេរិក។ ប៉ុន្តែការចំណាយផ្នែកយុទ្ធសាស្ត្រ លើវិស័យផ្សេងៗនឹងមានកម្រិតទាប ដែលបង្ហាញថា រដ្ឋាភិបាលក្រុងតូក្យូ មិនអាចកំណត់ផ្លូវឆ្ពោះទៅរកកំណើនប្រកបដោយចីរភាពនៅឡើយទេ ក្រៅតែពីការព្យាយាមដោះស្រាយវិបត្តិកូវីដ១៩ឲ្យរួចសិន។ មែនទែនទៅ ប្រទេសជប៉ុនបានអនុម័ត ច្រើនលើកច្រើនសារមកហើយនូវថវិកាជំរុញសេដ្ឋកិច្ចបន្ថែម ចាប់តាំងពីការចាប់ផ្តើមនៃជំងឺរាតត្បាតកូវីដ១៩ ដើម្បីគាំទ្រដល់សេដ្ឋកិច្ច។
វាមិនមែនជារឿងចម្លែកនោះទេ ដែលក្រុងតូក្យូត្រូវ ចាយវាយថវិកាដ៏ច្រើនក្នុងឆ្នាំ២០២២បែបនេះ ព្រោះកន្លងមក ពិសេសក្នុងឆ្នាំ២០២១ គ្រាដែលកញ្ចប់ថវិកាចាយវាយមានតិចជាងនេះ ក្រសួងហិរញ្ញវត្ថុជប៉ុនបានប្រើប្រាស់ថវិកាបន្ថែមរហូតមក ដើម្បីដោះស្រាយការចំណាយបណ្តោះអាសន្នលើការគ្រប់គ្រងការឆ្លងរាលដាលកូវីដ១៩ និងវិធានការជំរុញសេដ្ឋកិច្ច។
ក្រៅតែពីចំណាយទាក់ទងនឹងកូវីដ១៩ ដែលធ្វើឲ្យគម្រោងចាយវាយកើនឡើង ចំនួនប្រជាជនដែលមានវ័យចំណាស់ច្រើននៅប្រទេសជប៉ុន ក៏នឹងជំរុញការចំណាយលើថ្លៃរបបសន្តិសុខសង្គមឲ្យកើនឡើងផងដែរ។ រាជរដ្ឋាភិបាលជប៉ុនគ្រោងនឹងបង្កើនថវិកាសម្រាប់របបសន្តិសុខសង្គមដល់ ៦៦០ពាន់លានយ៉េនឬស្មើនឹងជិត ៦ពាន់លានដុល្លារអាមេរិក ខណៈពេលដែលឆ្នាំ២០២១ ខ្ទង់ចំណាយមានត្រឹម ៤៨០ពាន់លានយេនឬស្មើនឹងជាង ៤ពាន់លានដុល្លារប៉ុណ្ណោះ។
អត្ថបទគួរអាន
ដោយឡែក ថវិកាការពារជាតិនឹងកើនឡើងដល់កំណត់ត្រាថ្មីផងដែរ
ក្នុងចំនួនជិត៦ទ្រីលានយេន ឬជាង៥២ពាន់លានដុល្លារអាមេរិក។
កំណើននេះឆ្លុះបញ្ចាំងពីការព្រួយបារម្ភផ្នែកសន្តិសុខលើកូរ៉េខាងជើង
និងការឈានទៅមុខយ៉ាងឆាប់រហ័សរបស់យោធាចិន។
សូមជម្រាបថា ជាមួយនឹងខ្ទង់ចំណាយដ៏ច្រើនសម្បើមបែបនេះ គណៈរដ្ឋមន្ត្រីជប៉ុនបានព្យាករណ៍ថា សេដ្ឋកិច្ចនឹងកើនឡើង ៣,៧% នៅឆ្នាំសារពើពន្ធ២០២១ ហើយកំណើននឹងនៅតែបន្ត ក្នុងអត្រា ២,២%ក្នុងឆ្នាំសារពើពន្ធ ២០២២៕
